'അവന്റെ മാമന്റെ കൈയിൽ പൈസയുണ്ട്'; അന്തസുണ്ടെങ്കിൽ ലോട്ടറി തിരികെ കൊടുക്കണം; അനൂപിനെക്കുറിച്ച് നാട്ടുകാർ

അനൂപിന്റേത് സാമാന്യം സാമ്പത്തികമുള്ള കുടുംബമാണെന്നാണ് നാട്ടുകാരിൽ ചിലർ പറയുന്നത്. കുടുക്ക പൊട്ടിച്ചാണ് ലോട്ടറിയെടുത്തത് എന്നുള്ള അനൂപിന്റെ വാദം കളവാണെന്നും നാട്ടുകാർ പറയുന്നു. ഇത്തരത്തിൽ പ്രതികരിക്കാൻ നാട്ടുകാരെ പ്രേരിപ്പിച്ച ഘടകം എന്തെന്ന് വ്യക്തമല്ല.

"അവന്റെ അമ്മാവന്റെ കൈയിൽ നല്ല രീതിയിൽ പണമുണ്ട്. ഇല്ലാത്തവനൊന്നുമല്ല. അവൻ ചുമ്മാ കള്ളം പറയുന്നതാണ്. കുടുക്ക പൊട്ടിച്ച് ലോട്ടറിയെടുത്തെന്നു പറയുന്നത് ചുമ്മാ കള്ളത്തരം. നിങ്ങളെയൊക്കെ പറ്റിക്കാൻവേണ്ടി പറയുന്നതാ. അവന്റെ കൈയിൽ നല്ല നിലയിൽ പണമുണ്ട്. ആൾക്കാരെ പറ്റിക്കാൻവേണ്ടി അങ്ങനെ പറയുന്നതാ. ലോട്ടറിയടിക്കുന്നത് ആദ്യത്തെ പ്രാവശ്യം തന്നെ. സർക്കാരിനെ കുറ്റം പറഞ്ഞവനാണ് അവൻ." നാട്ടുകാരിൽ ഒരാൾ പറയുന്നു.

ലോട്ടറി വിറ്റും മദ്യം വിറ്റും ലാഭമുണ്ടാക്കുന്ന സർക്കാരിനെ കുറ്റം പറഞ്ഞു നടന്ന ആളാണ് അനൂപ് എന്നാണ് ഇതേ നാട്ടുകാരൻ പറയുന്നത്. അത്തരത്തിൽ ഒരാൾക്കാണ് ലോട്ടറിയടിച്ചത്. അതുകൊണ്ട് അന്തസുണ്ടെങ്കിൽ ലോട്ടറി തിരികെ കൊടുക്കണമെന്നാണ് നാട്ടുകാരൻ പറയുന്നത്.

"ലോട്ടറി വിറ്റും മദ്യം വിറ്റും ജീവിക്കുന്ന സർക്കാരിനെ കുറ്റപ്പെടുത്തിയവനാണ് അവൻ. അത്ര അന്തസുണ്ടെങ്കിൽ ആ ലോട്ടറി തിരിച്ചു കൊടുക്കാൻ പറ." അല്ലാതെ സഹയാം അഭ്യർത്ഥിച്ചു വരുന്നവരെ മോശക്കാരാക്കി ചിത്രീകരിക്കരുതെന്നും നാട്ടുകാർ പറയുന്നു. ലോട്ടറിയടിക്കുന്നതിനു മുമ്പ് ലോട്ടറി വിൽക്കുന്ന സർക്കാരിനെ വിമർശിച്ച് പാൽക്കുളങ്ങരയിലെ യുവമോർച്ച ഭാരവാഹിയായ അനൂപ് ഫേസ്ബുക്കിൽ പോസ്റ്റ് ഇട്ടിരുന്നു.

"മദ്യവും ലോട്ടറിയും വിറ്റും ട്രിഫിക്ക് നിയമ ലംഘനത്തിന്റെ പേരിൽ ജനങ്ങളെ കൊള്ളയടിച്ചിട്ടും സർക്കാരിന് പിടിച്ചു നിൽക്കാനാകുന്നില്ല. ശമ്പളം കൊടുക്കാൻ പോലും പണം തികയാത്ത അവസ്ഥയിലാണ് നമ്മൾ." കേന്ദ്രത്തിൽ നിന്നും 5000 കോടി കടമെടുത്തതിനെ കുറ്റപ്പെടുത്തിയാണ് അനൂപിന്റെ ഫേസ്ബുക്ക് പോസ്റ്റ്. ലോട്ടറിയെ വിമർശിച്ചയാൾക്കു തന്നെ ലോട്ടറിയടിച്ചല്ലോയെന്ന പരിഹാസം നേരത്തെ തന്നെ അനൂപിനു നേർക്കുണ്ടായിരുന്നു. ലോട്ടറിയടിച്ചതിനു പിന്നാലെ അനൂപ് ഈ പോസ്റ്റ് ഫേസ്ബുക്കിൽ നിന്നും നീക്കം ചെയ്യുകയും ചെയ്തു.

അനൂപിന് ലോട്ടറിയടിച്ച വിവരം ബിബിസി വാർത്തയാക്കിയിരുന്നു. ഇതിനോട് രസകരമായ രീതിയിലാണ് വിദേശികൾ പ്രതികരിച്ചിരിക്കുന്നത്. ലോട്ടറിയടിച്ച വിവരം രഹസ്യമാക്കി വെക്കണമായിരുന്നുവെന്നാണ് പല വിദേശികളും ബിബിസിയുടെ ഫേസ്ബുക്ക് പോസ്റ്റിൽ കമന്റ് ചെയ്തിരിക്കുന്നത്. എന്നാൽ നൽകുന്നവർക്ക് ഒന്നും നഷ്ടമാകുന്നില്ലെന്നും ദാനം ചെയ്യുന്നത് നല്ലതാണെന്നുമാണ് മറ്റുചിലരുടെ കമന്റ്. പണം നന്നായി കൈകാര്യം ചെയ്യാൻ പഠിക്കൂ. അത് മുന്നോട്ടുള്ള ജീവിതത്തിന് ഉപകരിക്കുമെന്ന് അഭിപ്രായപ്പെട്ടവരുമുണ്ട്. തങ്ങൾക്ക് പണം ആവശ്യമാണെന്നും വേണമെങ്കിൽ അക്കൗണ്ട് നമ്പ‍ർ പറഞ്ഞു തരാം എന്ന് കമന്റ് ചെയ്ത രസികന്മാരും കമന്റ് ചെയ്തവരിൽ ഉൾപ്പെടുന്നു.