രണ്ട് വയസ്സുകാരനെ പുള്ളിപ്പുലി ആക്രമിച്ചു; രക്ഷിച്ചത് അമ്മയുടെ ധൈര്യം!

വീട്ടിലെ മുറിയിൽ കയറി രണ്ട് വയസ്സുകാരനെ ആക്രമിച്ച് പുള്ളിപ്പുലി. ധൈര്യത്തോടെ പുള്ളിപ്പുലിയെ എതിരിട്ട ധീരയായ അമ്മയാണ് രക്ഷകയായത്. ഗുജറാത്തിലെ വഡോദരയിലുള്ള ഗോഗംബ താലൂക്കിലാണ് സംഭവം ഉണ്ടായത്. മുറിയിൽ ഉറങ്ങാൻ കിടക്കുകയായിരുന്ന ഗണേഷ് ഭൂപേന്ദ്രയെന്ന രണ്ട് വയസ്സുകാരന് നേരെയാണ് പുള്ളിപ്പുലിയുടെ ആക്രമണം ഉണ്ടായതെന്ന് വനം വകുപ്പ് ഉദ്യോഗസ്ഥർ പറഞ്ഞു. ഞായറാഴ്ച രാവിലെയാണ് സംഭവം.

അമ്മയ്ക്കൊപ്പം വീട്ടിലെ ഏറ്റവും മുന്നിലുള്ള മുറിയിൽ കിടക്കുകയാരുന്നു ഗണേഷ്. അച്ൻ കൃഷിയിടത്തിലേക്ക് പോയതിനാൽ വീട്ടിൽ അമ്മയും മകനും മാത്രമേ ഉണ്ടായിരുന്നുള്ളൂ. ചൂടുകാലം ആയതിനാൽ വീടിൻെറ വാതിൽ തുറന്നിട്ടിരിക്കുകയായിരുന്നു. സമീപത്തെ കാട്ടിൽ നിന്നാണ് പുള്ളിപ്പുലി ഇവിടെയെത്തിയത്.

Also Read: കൊവിഡ് 19 വാക്സിൻ പരീക്ഷണം മനുഷ്യരിൽ വിജയിക്കാതെ പോയാൽ? ഇന്ത്യയിൽ നിയമപരിരക്ഷയില്ലെന്ന് വിദഗ്ദർ!

മുറിയിൽ കയറിയ പുള്ളിപ്പുലി കുട്ടിയുടെ തലയിൽ കടിക്കുകയായിരുന്നു. പെട്ടെന്ന് കുട്ടിയുടെ കരച്ചിൽ കേട്ട് ഉണർന്ന അമ്മയാണ് കാലിൽ പിടിച്ച് വലിച്ച് ഗണേഷിനെ രക്ഷിച്ചത്. കുട്ടിയുടെ തലയിൽ കടിയ്ക്കാൻ ശ്രമിച്ച പുലിക്ക് ഗ്രിപ്പ് കിട്ടിയില്ലെന്നും ഇതിനാലാണ് പെട്ടെന്ന് വലിച്ചെടുക്കാൻ സാധിച്ചതെന്നും വനംവകുപ്പ് ഉദ്യോഗസ്ഥർ പറഞ്ഞു.

വലതുകണ്ണിന് മുകളിലും നെറ്റിയിലും കുട്ടിക്ക് മുറിവുണ്ടായിട്ടുണ്ട്. വഡോദരയിലെ എസ്എസ്ജി ആശുപത്രിയിലാണ് ചികിത്സ തേടിയത്. ഈ പ്രദേശത്ത് കഴിഞ്ഞ മാസം 29ന് ഒരു 13 വയസ്സുകാരന് നേരെയും ആക്രമണമുണ്ടായിരുന്നു.