​ജീവിതാഭിലാഷം നിറവേറ്റി; കൈത്തണ്ടയിൽ ടാറ്റൂ അടിച്ച് 103 വയസുള്ളൊരു മുത്തശ്ശി

ജീവിച്ചിരിക്കെ ചെയ്യണമെന്ന് ആഗ്രഹിക്കുന്ന നിരവധി കാര്യങ്ങൾ എല്ലാവർക്കുമുണ്ടാകും. ചെറിയ കുട്ടികൾ മുതൽ പ്രായമായവർക്കുവരെ ആഗ്രഹങ്ങളുടെ ഒരു നീണ്ട ലിസ്റ്റ് തന്നെ കാണും. ജൂണിൽ തന്റെ 103-ാം പിറന്നാൾ ആഘോഷിച്ച ഡോറോത്തി പൊളാക്ക് എന്ന മുത്തശ്ശിയ്ക്കും കുറച്ച് ആഗ്രഹങ്ങൾ ഉണ്ട്. അതിൽ ഒന്നായിരുന്നു ദീർഘനാളായി മനസ്സിൽക്കൊണ്ടു നടന്ന ടാറ്റൂ ചെയ്യണമെന്ന ആഗ്രഹം. ഒടുവിൽ തന്റെ ജീവിതാഭിലാഷം സഫലമായി. കൈത്തണ്ടയിലൊരു കുഞ്ഞു പച്ചത്തവളയുടെ ടാറ്റൂ ആണ് ഡോറോത്തി മുത്തശ്ശി ചെയ്തത്. തന്റെ ആഗ്രഹ പട്ടികയിലെ ഒരുകാര്യം നടന്നതിന്റെ സന്തോഷത്തിലാണ് മുത്തശ്ശി ഇപ്പോൾ.

കൊറോണ വൈറസിനെ തുടർന്ന് മിഷിഗണിലെ ഒരു നഴ്‌സിംഗ് ഹോമിൽ ഐസോലേഷനിലായിരുന്നു മുത്തശ്ശി. ആരോഗ്യ പ്രശ്‌നങ്ങളെത്തുടര്‍ന്ന് ആശുപത്രിയിൽ തുടർന്ന മുത്തശ്ശിയുടെ പിറന്നാള്‍ ഇവിടെവച്ചായിരുന്നു ആഘോഷിച്ചിരുന്നത്. ഐസോലേഷൻ സമയത്ത് മുത്തശ്ശി വിഷാദത്തിലായിരുന്നുവെന്ന് നഴ്സ് പറയുന്നു. മുത്തശ്ശിയെ കാണാൻ അനുവാദമുണ്ടായിരുന്നില്ലെന്നും അതുകൊണ്ട് അവരുടെ അവസ്ഥ എന്താണെന്നറിയാതെ ടെന്‍ഷനിലായിരുന്നു തങ്ങളെന്നും കൊച്ചുമകളായ തെരോസ സാവിറ്റ് ജോണ്‍സ് പറഞ്ഞു. കേള്‍വിശക്തിക്ക് കുഴപ്പമുള്ളതിനാല്‍ ഫോണ്‍ വിളിക്കാനും സാധിച്ചിരുന്നില്ലെന്നും അവർ കൂട്ടിച്ചേർത്തു.

Also Read: വസ്ത്രമാണെന്ന് കരുതി വാഷിങ് മെഷീനിൽ നിന്ന് പെരുമ്പാമ്പിനെ വാരി എടുക്കാന്‍ ചെന്നു; ഒടുവിൽ സംഭവിച്ചത്?

നഴ്‌സിംഗ് ഹോമില്‍ നിന്ന് വീട്ടിലെത്തി ഒന്ന് രണ്ട് ആഴ്ച കഴിഞ്ഞപ്പോഴാണ് മുത്തശ്ശിയുടെ ടാറ്റൂ മോഹം പൂവണിഞ്ഞത്. അങ്ങനെ ഓഗസ്റ്റ് ഏഴിന് മുത്തശ്ശി A.W.O.L കസ്റ്റം ടാറ്റൂയിംഗ് സ്റ്റുഡിയോ സന്ദർശിക്കുകയും കൈത്തണ്ടയിൽ ടാറ്റൂ പച്ചക്കുത്തുകയും ചെയ്തു. തന്റെ ജീവിതത്തിലെ ഏറ്റവും വലിയ ആഗ്രഹങ്ങളിലൊന്നായിരുന്നു ഇതെന്ന് ഡോറോത്തി മുത്തശ്ശി പറഞ്ഞു. വർഷങ്ങൾക്കുമുമ്പ് തന്റെ ചെറുമകൻ തന്നോട് ടാറ്റൂ ചെയ്യാൻ ആവശ്യപ്പെട്ടിരുന്നു. അന്ന് താനതിന് സമ്മതിച്ചിരുന്നില്ല.

എന്നാൽ ഇപ്പോൾ പെട്ടെന്നായിരുന്നു ടാറ്റൂ ചെയ്യാൻ തീരുമാനിച്ചത്. തവളകളെ തനിക്ക് ഒരുപാട് ഇഷ്ടമാണ്. അതിനാലാണ് അവയെ തന്നെ ടാറ്റൂ ചെയ്തതെന്നും മുത്തശ്ശി കൂട്ടിച്ചേർത്തു. അതേസമയം ഇത്രയും പ്രായമേറിയ കസ്റ്റമര്‍ വരുന്നത് ആദ്യമായിട്ടാണെന്ന് ടാറ്റൂ ആര്‍ട്ടിസ്റ്റായ റേ റീസണര്‍ പറഞ്ഞു. അവര്‍ക്ക് വേദനിക്കുമോ എന്നായിരുന്നു പേടി. എന്നാല്‍ മുത്തശ്ശി വലിയ ആവേശത്തിലായിരുന്നുവെന്നും അദ്ദേഹം പറഞ്ഞു.