ചരിത്രത്തിലെ ആദ്യത്തെ കെ 9 സ്‌ക്വാഡ് അംഗങ്ങൾ ഒരുങ്ങുന്നു; തയ്യാർ ആവുന്നത് 11 ദക്ഷിണേന്ത്യൻ ബ്രീഡുകൾ

ദക്ഷിണേന്ത്യൻ ഇനങ്ങളായ പതിനൊന്ന് നായ്ക്കളെ ആണ് പരിശീലനം നല്‍കി കെ 9 സ്‌ക്വാഡ് അംഗങ്ങള്‍ ആക്കാന്‍ തയ്യാറാക്കുന്നത്. തൃശൂരിലെ കേരള പോലീസ് അക്കാദമിയിലെ സ്റ്റേറ്റ് ഡോഗ് ട്രെയിനിംഗ് സ്കൂൾ (എസ്ഡിടിഎസ്) ആണ് ഇവയ്ക്ക് പരിശീലനം നല്‍കുന്നത്. ദക്ഷിണേന്ത്യൻ ഇനങ്ങളായ മുധോൾ ഹൗണ്ട്, ചിപ്പിപ്പരായ്, കന്നി എന്നീ നായ്ക്കൾക്ക് ആണ് പരിശീലനം നല്‍കുന്നത്. നവംബറിൽ പരിശീലനം പൂര്‍ത്തിയാക്കും. പിന്നീട് 1959 ൽ സ്ഥാപിതമായ കേരള പോലീസിന്റെ കെ 9 ഡോഗ് സ്ക്വാഡിൽ
ഉള്‍പ്പെടുത്താന്‍ സാധിക്കുമെന്നാണ് പ്രതീക്ഷ.

Also Read: വായനാശീലം വളർത്തണം; അരുണാചൽ പ്രദേശിൽ കുട്ടികൾക്കായി സ്ട്രീറ്റ് കോർണർ ലൈബ്രറി ആരംഭിച്ച് യുവതി

പ്രധാനമന്ത്രി നരേന്ദ്ര മോദി അടുത്തിടെ നടന്ന മാൻ കി ബാത്ത് പ്രസംഗത്തിൽ തദ്ദേശീയ നായകളെ സൈനിക, സുരക്ഷാ പ്രവർത്തനങ്ങളിൽ ഉൾപ്പെടുത്തണമെന്ന ആവശ്യവുമായി എത്തിയിരുന്നു. വിവിധ ഇനം ഇന്ത്യന്‍ ബ്രീഡുകളെ കുറിച്ച് അദ്ദേഹം പ്രസംഗത്തില്‍ പറഞ്ഞിരുന്നു. ഇതാദ്യമായാണ് സംസ്ഥാന പോലീസിലേക്ക് പരിശീലനം നല്‍കുന്നതിനായി ഇന്ത്യല്‍ ബ്രീഡുകളെ കൊണ്ടുവരുന്നത്. ഇവരുടെ പ്രകടനത്തെ അടിസ്ഥാനമാക്കി കൂടുതൽ തദ്ദേശീയ ഇനങ്ങളെ പരിശീലനത്തിനായി കൊണ്ടുവരാൻ
തീരുമാനിക്കുമെന്ന് പോലീസ് അക്കാദമി എ.ഡി.ജി.പി ട്രെയിനിംഗ് & ഡയറക്ടർ ബി സന്ധ്യ പറഞ്ഞു.

Also Read: ആഘോഷം ഇനി കുടുംബത്തോടൊപ്പം; തമിഴ്‌നാട്ടിൽ പോലീസുകാർക്ക് ജന്മദിനത്തിൽ അവധി പ്രഖ്യാപിച്ച് സൗത്ത് സോൺ ഐജി
നന്നായി പരിശീലനം ലഭിച്ചാൽ ഇന്ത്യൻ നായ്ക്കൾ വിദേശ ഇനങ്ങളെ അപേക്ഷിച്ച് നല്ല പ്രകടനം കാഴ്ചവെക്കുമെന്ന് കേരള പോലീസ് ഡോഗ് ട്രെയിനർമാർ പറഞ്ഞു. തദ്ദേശീയ ഇനങ്ങളെ പരിശീലിപ്പിക്കാൻ കഴിയില്ലെന്ന തെറ്റിദ്ധാരണയുണ്ട്. എന്നാല്‍ അത് ശരിയല്ല. പരിശീലനം ആരംഭിക്കുമ്പോൾ ഒരു നായയ്ക്ക് മൂന്ന് മാസത്തിൽ താഴെ പ്രായമുണ്ടായിരിക്കണം എന്നതാണ് ഏക മാനദണ്ഡമെന്ന് മാസ്റ്റർ ഡോഗ് ട്രെയിനറായ പി രമേശ് പറഞ്ഞു. ഇപ്പോൾ അക്കാദമിയിൽ പരിശീലനം നേടുന്ന നായ്ക്കളിൽ അഞ്ച് കന്നി നായ്ക്കൾ, അഞ്ച് ചിപ്പിപ്പരായ്, ഒരു മുധാൽ ഹൗണ്ട് എന്നിവ ഉൾപ്പെടുന്നു. ബാക്കിയുള്ള 32 വിദേശ ഇനങ്ങളിൽ 20 ബെൽജിയൻ മാലിനോയിസ്, അഞ്ച് ബീഗിൾസ്, ആറ് ലാബ്രഡോർ എന്നിവയാണ്.