ഗൂഗിളിന് പിറകെ ഫേസ്ബുക്കും: വര്‍ക്ക് ഫ്രം ഹോം ഒരു വര്‍ഷത്തേക്ക് നീട്ടി, വീട് ഓഫീസാക്കാന്‍ 75,000 രൂപ

കൊവിഡ്-19 പകർച്ചവ്യാധിയെ തുടർന്ന് ലോകമെമ്പാടുമുള്ള ഒട്ടുമിക്ക കമ്പനികളും സ്ഥാപനങ്ങളും അടച്ചുപൂട്ടിയിരിക്കുകയാണ്. ഇത്തരമൊരു സാഹചര്യത്തിൽ ജീവനക്കാർക്ക് വീട്ടിലിരുന്ന് ജോലി ചെയ്യാവുന്ന തരത്തിലുള്ള സൗകര്യം കമ്പനികൾ ഏർപ്പെടുത്തിയിട്ടുണ്ട്. ജീവനക്കാരുടെ ആരോഗ്യവും സുരക്ഷയും കണക്കിലെടുത്താണ് കമ്പനികൾ വർക്കം ഫ്രം ഹോം സൗകര്യം ഏർപ്പെടുത്തിയത്. കൊവിഡ് വ്യാപനത്തിന്റെ കണക്ക് ദിനംപ്രതി കൂടുന്ന സാഹചര്യത്തിൽ ഈ സൗകര്യം കുറച്ചധികം കാലത്തേക്ക് നീട്ടിക്കൊണ്ടുപോകേണ്ടി വരുമെന്നാണ് വിദഗ്ധർ പറയുന്നത്.

നേരത്തെ സെർച്ച് എഞ്ചിൻ ഭീമനമായ ഗൂഗിൾ 2021 ജൂലായ് 30 വരെ ജീവനക്കാര്‍ക്ക് വർക്ക് ഫ്രം ഹോം സൗകര്യം അനുവദിച്ചതായി പ്രഖ്യാപിച്ചിരുന്നു. കൊറോണ വൈറസ് വ്യാപനം മാറ്റമില്ലാതെ തുടരുന്ന സാഹചര്യത്തിലാണിതെന്നും ഗൂഗിൾ അറിയിച്ചു. ഓഫീസില്‍ വരേണ്ട ആവശ്യമില്ലാത്ത ജീവനക്കാർക്കാണ് 2021 ജൂണ്‍ 30 വരെ വീട്ടിൽ നിന്ന് ജോലി ചെയ്യാൻ ഗൂഗിൾ അനുമതി നൽകിയത്. രണ്ട് ലക്ഷത്തോളം ഗൂഗിള്‍ ജീവനക്കാരാണ് വര്‍ക്ക് ഫ്രം ഹോമില്‍ തുടരുക. സോഷ്യൽ മീഡിയ പ്ലാറ്റ്ഫോമായ ട്വിറ്ററും തങ്ങളുടെ ജീവനക്കാർക്ക് അനിശ്ചിത കാലത്തേക്ക് വര്‍ക്ക് ഫ്രം ഹോം അനുവദിച്ചിട്ടുണ്ട്.

Also Read: സർക്കാർ ഉദ്യോഗസ്ഥരുടെയും മാധ്യമ സ്ഥാപനങ്ങളുടെയും ട്വിറ്റർ അക്കൗണ്ടുകൾക്ക് പുതിയ ലേബൽ സംവിധാനം; പരിഷ്‌ക്കരണം കൂടുതൽ സുതാര്യത ലക്ഷ്യമിട്ട്

അതേസമയം ഗൂഗിളിന് പിന്നാലെ പ്രമുഖ സോഷ്യൽ മീഡിയ പ്ലാറ്റ്ഫോമായ ഫേസ്ബുക്കും വർക്ക് ഫ്രം ഹോം സൗകര്യം ദീർഘക്കാലത്തേക്ക് നീട്ടി. ഇനി 12 മാസത്തേക്ക് അതായത് ഒരു വർഷത്തേക്ക് ജീവനക്കാർക്ക് വീട്ടിലിരുന്ന് ജോലി ചെയ്യാം. 2021 ജൂലൈ 31 വരെയാണ് ഫേസ്ബുക്ക് വർക്ക് ഫ്രം ഹോം സൗകര്യം നീട്ടിയത്. വീട്ടിലിരുന്ന് ജോലി ചെയ്യുന്നവർക്ക് മറ്റ് ഓഫീസ് സകൗര്യം ലഭ്യമാക്കുന്നതിന് 1000 ഡോളർ (75,000 രൂപ) വരെ അനുവദിക്കും. ആരോഗ്യ രംഗത്തെയും സർക്കാർ വിദഗ്ധരുടെയും മാർഗനിർദേശങ്ങളും ഈ കാര്യങ്ങളെക്കുറിച്ച് നടത്തിയ ആഭ്യന്തര ചർച്ചയിൽ എടുത്ത തീരുമാനങ്ങളും അടിസ്ഥാനമാക്കിയാണ് വർക്ക് ഫ്രം ഹോം സൗകര്യം നീട്ടിയതെന്ന് ഫേസ്ബുക്ക് വക്താവ് ജീവനക്കാർക്ക് അയച്ച ഇമെയിൽ പ്രസ്താവനയിൽ അറിയിച്ചു.

സർക്കാർ മാർഗ്ഗനിർദ്ദേശം അനുവദിക്കുകയും പകർച്ചവ്യാധി നിയന്ത്രണവിധേയമാകുകയും ചെയ്യുന്ന കാലത്ത് ഓഫീസുകൾ വീണ്ടും തുറന്ന് പ്രവർത്തിക്കുമെന്ന് കമ്പനി അറിയിച്ചു. കൊവിഡ്-19 കേസുകളുടെ എണ്ണം കൂടുതലായതിനാൽ വർഷാവസാനത്തിനുമുമ്പ് അമേരിക്കയിലും ലാറ്റിൻ അമേരിക്കയിലും ഉള്ള ഓഫീസുകൾ വീണ്ടും തുറക്കാൻ സാധ്യതയില്ലെന്നും കമ്പനി കൂട്ടിച്ചേർത്തു.