വസൂരി നിയന്ത്രിച്ചത് ഇങ്ങനെ; കൊവിഡ് പ്രതിരോധത്തിൽ ഈ പാഠങ്ങൾ പഠിക്കേണ്ടതുണ്ട്!

വസൂരി നിയന്ത്രിച്ചതിൽ നിന്ന് ലോക രാജ്യങ്ങളൊന്നും തന്നെ പാഠം പഠിച്ചില്ലെന്നാണ് കൊവിഡ് പ്രതിരോധ പ്രവർത്തനങ്ങൾ കാണുമ്പോൾ തോന്നുന്നതെന്ന് ഫോയിജ് പറയുന്നു. വിശദമായ പഠനമാണ് വസൂരി നിയന്ത്രണത്തിൻെറ ഓരോ ഘട്ടത്തിലും നടന്നത്. എന്തെങ്കിലും മുൻധാരണ വെച്ചല്ല പ്രവർത്തിച്ചത്. ഓരോ ഘട്ടത്തിലെയും പഠനത്തിൽ ലഭിച്ച പുതിയ കാര്യങ്ങളാണ് മുന്നോട്ട് നയിച്ചതെന്ന് ഫോയിജ് വ്യക്തമാക്കി. ഏറ്റവും കൂടുതൽ ആളുകളെ പ്രതിരോധ പ്രവർത്തനങ്ങളിൽ പങ്കാളിയാക്കുക എന്നതാണ് പ്രധാന കാര്യമെന്നും അദ്ദേഹം പറയുന്നു.

രോഗികളുടെ എണ്ണം കൂടി വരുമ്പോൾ സമ്പർക്കത്തിൽ പെട്ടവരുടെ കണക്കെടുക്കാൻ സാധിക്കുന്നില്ലെന്ന് കൊവിഡ് 19 കാലത്ത് ആരോഗ്യപ്രവർത്തകർ പറയുന്നു. എന്നാൽ ഇൻറർനെറ്റും സ്മാർട്ട് ഫോണും ഒന്നും ഇല്ലാതിരുന്ന കാലത്ത് സമ്പർക്കത്തിൽ പെട്ടവരുടെ കണക്കെടുക്കാൻ സാധിച്ചിട്ടുണ്ടെന്ന് ഫോയിജ് പറയുന്നു. 1973ൽ 1500 പുതിയ വസൂരി കേസുകൾ ബിഹാറിൽ കണ്ടെത്തിയിരുന്നു. ഇവരുടെയെല്ലാം സമ്പർക്കത്തിലുണ്ടായിരുന്നവരെ കണ്ടെത്തുകയും പ്രതിരോധ പ്രവർത്തനങ്ങൾ വിജയകരമായി നടപ്പാക്കുകയും ചെയ്തിരുന്നുവെന്ന് അദ്ദേഹം വ്യക്തമാക്കി.

കൃത്യവും വ്യക്തവുമായ കണക്കെടുപ്പും അതിൽ ജനങ്ങളെ വിശ്വാസത്തിലെടുക്കുകയും ചെയ്യേണ്ടതുണ്ട്. ഇപ്പോഴത്തെ പ്രതിരോധ പ്രവർത്തനങ്ങളിൽ അതിൽ വലിയ പാളിച്ച സംഭവിക്കുന്നുണ്ട്. വസൂരി ഉള്ള ഒരാളെ കണ്ടെത്തി ആരോഗ്യപ്രവർത്തകരെ അറിയിക്കുന്നവർക്ക് അക്കാലത്ത് റിവാർഡ് നൽകിയിരുന്നു. 10 രൂപയും 50 രൂപയും 100 രൂപയുമൊക്കെ നൽകിയിരുന്നു. ജനങ്ങൾക്ക് സുതാര്യമായാണ് വിവരങ്ങൾ നൽകിയിരുന്നത്. അത് അവർ വിശ്വാസത്തിലെടുക്കുകയും ചെയ്തെന്ന് ഫോയിജ് പറഞ്ഞു. കൊവിഡ് കാലത്ത് ഈ വിശ്വാസ്യത ഇല്ലെന്നും അദ്ദേഹം പറയുന്നു.

രാഷ്ട്രീയ നേതൃത്വവും ആരോഗ്യ പ്രവർത്തകരും ഓരോ ചെറിയ അനുഭവത്തിൽ നിന്നും പാഠം പഠിച്ച് മുന്നോട്ട് പോവണം. എല്ലാത്തിനും ഉത്തരങ്ങൾ പെട്ടെന്ന് കിട്ടണമെന്നില്ല. ആറ് മാസത്തിലധികം എടുത്താണ് വസൂരിയുമായി ബന്ധപ്പെട്ട കാര്യങ്ങളിൽ കൃത്യമായ ധാരണയുണ്ടായത്. കൊവിഡ് 19ൻെറ കാര്യത്തിൽ ഇപ്പോഴും നാം വൈകിയിട്ടില്ലെന്നും ഫോയിജ് പറയുന്നു. മറ്റ് രാജ്യങ്ങളുമായും ആ സമയത്ത് ചർച്ചകൾ നടന്നിരുന്നു. സമാനമായ രീതിയിൽ ഇപ്പോൾ ചർച്ചകൾ നടക്കുന്നുണ്ടോയെന്ന് തനിക്ക് സംശയമുണ്ടെന്നും ഫോയിജ് കൂട്ടിച്ചേർത്തു.