'ഗീതോപദേശം' ലഭിക്കാൻ ഇനി കൃത്രിമബുദ്ധി സഹായിക്കും: ചാറ്റ്ജിപിടിയുടെ വിജയത്തിന് പിന്നാലെ ഇന്ത്യയിൽ ഹിറ്റായി മത എഐ ചാറ്റ്ബോട്ടുകൾ

ചാറ്റ്ജിപിടിയുടെ വിജയത്തിനു ശേഷം ഇന്ത്യയിൽ മതപരമായ ചോദ്യങ്ങൾക്ക് പരിഹാരം നൽകുന്ന എഐ ചാറ്റ്ബോട്ടുകളുടെ പ്രളയം തന്നെ ഉണ്ടായതായി റിപ്പോർട്ട്. ദശലക്ഷക്കണക്കിനാളുകൾ അവ ഉപയോഗിക്കുന്നുണ്ടെന്നും, എഐ മേഖലയിലേക്ക് ഇന്ത്യൻ ജാതിവ്യവസ്ഥ അടക്കമുള്ളവ അതീവശക്തിയോടെ സ്ഥാപിക്കപ്പെടുകയാണെന്നും റിപ്പോർട്ടുകൾ സൂചിപ്പിക്കുന്നു.

ഇതിനകം ഏറെ പ്രചാരം ലഭിച്ചു കഴിഞ്ഞ, ഭഗവദ്‌ഗീത അടിസ്ഥാനപ്പെടുത്തിയുള്ള ഒരു ചാറ്റ്ബോട്ടിനോട് ഉന്നയിച്ച ചോദ്യങ്ങളും അവയ്ക്ക് ലഭിച്ച ഉത്തരങ്ങളും ജാതിവ്യവസ്ഥ ശരിയാണെന്ന് സ്ഥാപിക്കുന്നതായിരുന്നു. ബ്രാഹ്മണൻ ഉന്നതനാണെന്നും, ശ്രൂദ്രരുമായി അവർ അടുക്കാൻ പാടുള്ളതല്ലെന്നും ചാറ്റ്ബോട്ട് പറയുന്നുവെന്നാണ് റിപ്പോർട്ട്.

ഭഗവാൻ കൃഷ്ണനുമായി സംവദിക്കുന്ന തരത്തിലാണ് ഒരു ചാറ്റ്ബോട്ട് ഡിസൈൻ ചെയ്തിട്ടുള്ളത്. 'എന്താണ് മകനേ നിന്നെ അലട്ടുന്നത്?' എന്ന ചോദ്യമാണ് സെർച്ച് ബോക്സിനു മുകളിലായി വരുന്നത്. ചോദ്യം ഉന്നയിക്കുന്നയാളെ അർജ്ജുനനായാണ് ചാറ്റ്ബോട്ട് കാണുന്നത്. സെർച്ച് ബോക്സിൽ നമുക്ക് ചോദ്യങ്ങൾ ഉന്നയിക്കാം. അവയ്ക്ക് ഗീതയെ അടിസ്ഥാനപ്പെടുത്തിയുള്ള ഉത്തരങ്ങൾ ലഭിക്കും.

ചോദ്യം ഉന്നയിക്കാനും ഉത്തരം ലഭിക്കാനും ഫോൺ നമ്പർ നൽകി രജിസ്റ്റർ ചെയ്യേണ്ടതുണ്ട്.

'ധർമ്മത്തിന്റെ പേരിൽ കൊല ചെയ്യുന്നത് നീതീകരിക്കപ്പെടുമോ' എന്ന ചോദ്യത്തിന്, കൊലപാതകം അവസാന ആശ്രയമായിരിക്കണം എന്ന ഉത്തരമാണ് ചാറ്റ്ബോട്ട് നല്‍കുന്നത്.

മറ്റൊരു ചോദ്യം എന്താണ് എലൺ മസ്കിനെക്കുറിച്ചുള്ള അഭിപ്രായം എന്നതാണ്. തനിക്ക് എലൺ മസ്കിനെക്കുറിച്ചെന്നല്ല, ഒരു വ്യക്തിയെക്കുറിച്ചും വ്യക്തിപരമായ അഭിപ്രായങ്ങളില്ലെന്ന് ചാറ്റ്ബോട്ട് പറയുന്നു. നരേന്ദ്രമോദിയെക്കുറിച്ച് എന്ത് കരുതുന്നു എന്ന ചോദ്യത്തിന്, മോദി ഒരു മഹാനായ നേതാവാണെന്ന് താൻ കരുതുന്നതായി അദ്ദേഹം മറുപടി നൽകുന്നു. രാജ്യത്തെക്കുറിച്ച് അദ്ദേഹത്തിന് കാഴ്ചപ്പാടുണ്ടെന്നും, സത്യസന്ധനും കഠിനാദ്ധ്വാനിയുമാണെന്നും ചാറ്റ്ബോട്ട് പറയുന്നു.

എഐ ചാറ്റ്ബോട്ടുകളുടെ പ്രശ്നമായി എല്ലായ്പ്പോഴും ചൂണ്ടിക്കാണിക്കപ്പെടാറുള്ളത് അവയെ എങ്ങനെ ഫീഡ് ചെയ്യുന്നു എന്നതാണ്. ഏത് മതഗ്രന്ഥത്തെ അടിസ്ഥാനമാക്കിയുള്ള ചാറ്റ്ബോട്ടാണെങ്കിലും ആ ഗ്രന്ഥങ്ങളുടെ ഏത് വ്യാഖ്യാനത്തെ ഫീഡ് ആയി സ്വീകരിച്ചിരിക്കുന്നു എന്നത് പ്രധാനമാണ്.