രക്തദാന ക്യാമ്പും കുട്ടികൾക്കായി പുസ്തക വിതരണവും; വിവാഹം വേറിട്ടതാക്കി ഒരു മണവാട്ടി

തന്‍റെ വിവാഹ ദിനത്തില്‍ രക്തദാന ക്യാമ്പ് സംഘടിപ്പിച്ചും കുട്ടികള്‍ക്ക് പുസ്തകങ്ങൾ വിതരണം ചെയ്തും വേറിട്ടു നില്‍ക്കുകയാണ് പശ്ചിമ ബംഗാളിലെ നാദിയയിൽ നിന്നുള്ള സ്‌കൂൾ അധ്യാപികയായ നൂർജഹാൻ ഖത്തുൻ. മുർഷിദാബാദിൽ നിന്നുള്ള ഒബിദുർ റഹ്മാൻ എന്ന സഹ സ്‌കൂൾ അധ്യാപികയെയാണ് ഇവര്‍ വിവാഹം കഴിക്കുന്നത്.

Also Read: ക്ഷേത്രംവിദ്യാലയമാക്കി ഒരു ഗ്രാമം; ഓഫ്‌ലൈൻ ക്ലാസുകൾക്ക് നേതൃത്വം നൽകുന്നത് പ്രധാന അധ്യാപകൻ

രാജ്യത്ത് പടര്‍ന്ന് പിടിച്ചിരിക്കുന്ന പകർച്ചവ്യാധി മൂലമാണ് ഈ ആശയം തെരെഞ്ഞെടുത്തതെന്ന് നൂർജഹാൻ പറഞ്ഞതായി ‍ടൈംസ് റിപ്പോര്‍ട്ട് ചെയ്യുന്നു. കൊവിഡ് -19 പ്രതിസന്ധിക്കിടെ ബ്ലഡ് ബാങ്കുകളില്‍ ആവശ്യത്തിന് സ്റ്റോക്ക് ഇല്ലെന്ന് അറിഞ്ഞു. അങ്ങനെയാണ് വിവാഹ ദിനത്തില്‍ ഇത്തരത്തിലൊരു ക്യാമ്പ് സംഘടിപ്പിക്കാന്‍ തീരുമാനിച്ചതെന്ന് അവര്‍ പറയുന്നു. ക്യാമ്പിൽ കുറഞ്ഞത് 32 പേർ പങ്കെടുത്തു. വിവാഹത്തിന് പങ്കെടുക്കാന്‍ എത്തിയ അയൽക്കാരും ബന്ധുക്കളും ആയിരുന്നു എല്ലാവരും. ധുബുലിയ ഗ്രാമത്തിലെ അവരുടെ വീട്ടില്‍ വെച്ചായിരുന്നു ചടങ്ങ്.ഇവിടെ തന്നെയാണ് ക്യാമ്പും സംഘടിപ്പിച്ചത്.

രക്തദാന ക്യാമ്പിനൊപ്പം വിദ്യാർത്ഥികൾക്കിടയിൽ പുസ്തകങ്ങള്‍ വിതരണം ചെയ്തു. ബോർഡ് പരീക്ഷകളിൽ മികച്ച പ്രകടനം കാഴ്ചവച്ച കുട്ടികള്‍ക്കാണ് പുസ്കതങ്ങള്‍ വിതരണം ചെയ്തത്. നിരവധി പേരാണ് നൂർജഹാൻറെ പ്രവൃത്തിയെ പിന്തുണച്ച് എത്തിയിരിക്കുന്നത്. തന്‍റെ മകളുടെ കല്യാണം ഇത്തരത്തില്‍ വിത്യസ്ഥമായ രീതിയിൽ നടത്താന്‍ സാധിച്ചതില്‍ സന്തോഷമുണ്ടെന്ന് യുവതിയുടെ പിതാവ് പറഞ്ഞു