ബാബരി മസ്ജിദ് നിർമാണത്തിന് 5 ഏക്കർ ഭൂമി നൽകാം; പ്രധാനമന്ത്രിക്ക് കത്തെഴുതി ഉർദു കവി

ഉത്തർ പ്രദേശിലെ റായ് ബറേലിയിൽ ബാബറി മസ്ജിദ് നിർമാണത്തിനായി 5.5 ഏക്കർ ഭൂമി നൽകാൻ തയ്യാറാണെന്ന് അറിയിച്ച് പ്രധാനമന്ത്രി നരേന്ദ്ര മോദിക്ക് ഉർദു കവിയുടെ കത്ത്. പ്രശസ്ത ഉർദു കവി മുനവ്വർ റാണയാണ് കത്തെഴുതിയത്. റായ് ബറേലിയിലെ സായ് നദിക്കരയിലുള്ള സ്ഥലമാണ് നൽകാമെന്ന് വാഗ്ദാനം ചെയ്തിട്ടുള്ളത്. കവിക്ക് പാരമ്പര്യമായി ലഭിച്ചിട്ടുള്ള സ്വത്താണ് ഈ സ്ഥലം.

സുപ്രീം കോടതി വിധി പ്രകാരം നിലവിൽ ബാബറി മസ്ജിദ് നിർമാണത്തിന് സർക്കാർ അനുവദിച്ചിട്ടുള്ള 5 ഏക്കർ ഭൂമി ദന്നിപൂർ ഗ്രാമത്തിലാണ്. ഈ സ്ഥലത്ത് ശ്രീരാമൻെറ പിതാവ് ദശരഥൻെറ പേരിൽ ഒരു ആശുപത്രി പണിയണമെന്നും അദ്ദേഹം അഭ്യർഥിച്ചു. സ്പീഡ് പോസ്റ്റിലാണ് കവി പ്രധാനമന്ത്രിക്ക് കത്തയച്ചത്.

Also Read: ക്വാറന്‍റൈൻ എന്ന ഇംഗ്ലീഷ് വാക്ക് പിറന്നതെങ്ങനെ? ചിരപരിചിതമായ 5 വാക്കുകളുടെ ചരിത്രം!

2015ൽ റാണയ്ക്ക് കേന്ദ്ര സാഹിത്യ അക്കാദമി പുരസ്കാരം പ്രഖ്യാപിച്ചിരുന്നു. എന്നാൽ രാജ്യത്തെ അസഹിഷ്ണുതയുടെ പേരിൽ അദ്ദേഹം പുരസ്കാരം തിരസ്കരിക്കുകയായിരുന്നു. പുതിയ മുസ്ലിം വഖഫ് ബോർഡ് രൂപീകരിക്കണമെന്നും റാണ കത്തിൽ പ്രധാനമന്ത്രിയോട് ആവശ്യപ്പെട്ടിട്ടുണ്ട്.