'ആരാണ് സന്തോഷമാഗ്രഹിക്കാത്തത്?' ഈ പരസ്യവാചകം നമ്മുടെ ഓർമയിൽ പതിഞ്ഞു പോയിട്ടുണ്ടെങ്കിൽ അതിനൊരു കാരണം മാത്രമേയുള്ളൂ; നമ്മെ ഏറ്റവും സന്തോഷിപ്പിക്കുന്ന ആ വാക്ക്, 'സന്തോഷം' അഥവാ ഹാപ്പിനസ് അതിൽ ഉൾപെട്ടിട്ടുണ്ട് എന്നതു തന്നെയാണ്. മനസ്സുകൊണ്ട് ചിരിക്കുകയും ചിന്തകൾ കൊണ്ട് ആഹ്ലാദിക്കുകയും ചെയ്യുന്ന അസുലഭനിമിഷങ്ങളെയാണ് സന്തോഷം എന്ന ഒറ്റവാക്കിലേക്ക് പലപ്പോഴും നാം ഉൾചേർക്കുന്നത്. അതുകൊണ്ടു തന്നെ മാനസികമായി സന്തോഷത്തോടെ ഇരിക്കുക എന്നു പറഞ്ഞാൽ പോസീറ്റിവായിരിക്കുക എന്ന് തന്നെയാണ് അർത്ഥം. ഈയിടെ ഫേസ്ബുക്കിൽ വളരെ വൈറലായ ഒരു പോസ്റ്റിൽ ഡോക്ടർ അരുൺ ഉമ്മൻ പങ്കുവെച്ചതും സമാനമായ വിഷയമാണ്. മനസ്സ് ഏറ്റവും പോസീറ്റിവായിരുന്നാൽ പകുതിയോളം രോഗങ്ങളും നമ്മളിലേക്ക് അടുക്കില്ല എന്നാണ് അദ്ദേഹം പറയുന്നത്. നമ്മുടെ മനസ്സ് വളരെയധികം ഊർജ്ജം പുറപ്പെടുവിക്കുന്നു എന്നതിന് ശാസ്ത്രീയ അടിത്തറ ഉണ്ടെന്നും, എല്ലാ രംഗത്തും മികച്ച പ്രകടനം നടത്താൻ മനക്കരുത്ത് നമ്മളെ വളരെയധികം സഹായിക്കുന്നുന്നുണ്ടെന്നും അദ്ദേഹം ആ പോസ്റ്റിൽ പറയുന്നുണ്ട്.
അപ്പോൾപ്പിന്നെ എങ്ങനെ ഈ സന്തോഷം കണ്ടെത്താമെന്നല്ലേ? അതിനൊരു വഴിയുണ്ട്. നമ്മുടെ ശരീരത്തിൽ തന്നെയുള്ള ഹാപ്പിനെസ് ഹോർമോണുകളെ ഉത്തേജിപ്പിക്കുക തന്നെ. മനുഷ്യന് സന്തോഷം ഉണ്ടാകുമ്പോൾ പലവിധ രാസവ്യതിയാനങ്ങളാണ് ശരീരത്തിൽ സംഭവിക്കുന്നത്. അതിന് കാരണം ഹാപ്പിനെസ് ഹോർമോണുകൾ അഥവാ സന്തോഷ രാസത്വരകങ്ങൾ എന്നൊക്കെ പറയാവുന്ന രസവസ്തുക്കൾ ആണ്. ഇവയെ ഉത്തേജിപ്പിക്കുന്നതിലൂടെ സന്തോഷത്തോടെയിരിക്കാനും അതുവഴി ജീവിതശൈലീരോഗങ്ങളെ ഒരു പരിധിവരെ അകറ്റി നിർത്താനും സാധിക്കും.
മനുഷ്യനെ പോസീറ്റിവായിരിക്കാൻ സഹായിക്കുന്നത് ഹാപ്പി ഹോർമോണുകളാണ്. പോസീറ്റീവ് ചിന്തകൾ ഉള്ള ഒരാൾക്ക് എല്ലാ രംഗത്തും മികച്ച വിജയം കൈവരിക്കാൻ കഴിയുമെന്നാണ് പഠനങ്ങൾ പോലും പറയുന്നത്. ഓക്സിടോസിൻ, ഡോപാമിൻ, സെറോട്ടോണിൻ, എൻഡോർഫിൻ എന്നീ നാലു പ്രധാന ഹോർമോണുകളെയാണ് ഹാപ്പി ഹോർമോണുകൾ എന്ന് പൊതുവിൽ വിളിക്കുന്നത്. ഇതിൽ ഓക്സിടോസിൻ, ഡോപാമിൻ എന്നീ ഹോർമോണുകളെ കുറിച്ച് നമ്മൾ പലയിടത്തും വായിച്ചിട്ടുണ്ടാകും.
ഓക്സിടോസിൻ
പ്രണയത്തിലായിരിക്കുമ്പോഴും പ്രിയപ്പെട്ടവരെ കെട്ടിപ്പിടിക്കുമ്പോഴും ശാരീരികമായ അടുപ്പമുണ്ടാകുമ്പോഴുമൊക്കെ ഉത്തേജിക്കപ്പെടുന്ന ഹോർമോൺ ആണ് ഓക്സിടോസിൻ. അതുകൊണ്ടു തന്നെ പ്രണയ ഹോർമോൺ (ലവ് ഹോർമോൺ) എന്ന ഓമനപ്പേര് കൂടിയുണ്ട് ഓക്സിടോസിന്. ബന്ധങ്ങൾക്കിടയിൽ പരസ്പരമുള്ള അടുപ്പം, വിശ്വാസം, സഹാനുഭൂതി എന്നിവയൊക്കെ വർദ്ധിപ്പിക്കാൻ ഈ ഹോർമോൺ സഹായിക്കുന്നുണ്ട്. പുരുഷന്മാരെ അപേക്ഷിച്ച് സ്ത്രീകളിലെ സന്തോഷത്തിൽ വലിയൊരു പങ്ക് ഓക്സിടോസിനുണ്ട്. സ്ത്രീകളിൽ പ്രസവസമയത്തും കുഞ്ഞുങ്ങളെ മുലയൂട്ടുന്ന സമയത്തുമൊക്കെ ഓക്സിടോസിൻ വളരെ നിർണായകമാണ്. കുഞ്ഞിനും അമ്മയ്ക്കുമിടയിൽ വലിയൊരു ആത്മബന്ധം ഉടലെടുക്കുന്നതിനു പിന്നിലെ രഹസ്യവും മറ്റൊന്നല്ല.
ഒരു നല്ല പാട്ട് കേൾക്കുമ്പോൾ, ഇഷ്ടമുള്ള സിനിമ കാണുമ്പോൾ, അതുമല്ലെങ്കിൽ മനോഹരമായ, മറക്കാനാകാത്ത ചില ഓർമകളിലേക്ക് മനസ്സിങ്ങനെ പാറിപ്പറക്കുമ്പോൾ ഒരു പ്രത്യേക സുഖം അനുഭവപ്പെടാറില്ലേ? അതിന് കാരണം വേറൊന്നുമല്ല. ഡോപാമിൻ എന്ന ഹോർമോൺ ആണ് അത്തരം സുഖകരമായ സന്തോഷം ഉല്പാദിപ്പിക്കുന്നത്. അതുകൊണ്ടു തന്നെ ഇതിനെ 'ഫീൽ ഗുഡ് ഹോർമോൺ' എന്നും വിളിക്കാറുണ്ട്. മാത്രമല്ല നമ്മുടെ ബ്രെയിനിലെ റിവാർഡ് സിസ്റ്റത്തിൽ ഒരു നിർണായക പങ്ക് വഹിക്കുന്ന ഒരു ന്യൂറോ ട്രാൻസ്മിറ്റർ കൂടിയാണ് ഈ ഹോർമോൺ. അതുകൊണ്ട് ഡോപാമിനെ 'റിവാർഡ് കെമിക്കൽ' എന്നും വിശേഷിപ്പിക്കാറുണ്ട്. അതായത് ഒരു നല്ല ജോലി ചെയ്തതിന് പ്രശംസ ലഭിക്കുമ്പോഴോ മറ്റെന്തെങ്കിലും നല്ല പ്രവർത്തികൾ ചെയ്യുമ്പോഴോ ശരീരത്തിലെ ഡോപാമിൻ അളവ് ഗണ്യമായി വർദ്ധിക്കും.
സെറോട്ടോണിൻ
പലപ്പോഴും നിങ്ങൾക്ക് മൂഡ് സ്വിങ്സ് ഉണ്ടാകുന്നുണ്ടോ, നിങ്ങൾ സ്ട്രെസ്സിലാണോ എന്നാൽ സൂക്ഷിച്ചോളൂ, വില്ലൻ സെറോട്ടോണിൻ എന്ന ഹോർമോൺ തന്നെ. ശരീരത്തിൽ സെറോട്ടോണിൻ ശരിയായ അളവിൽ ഉല്പാദിപ്പിക്കപ്പെടുന്നുണ്ടെങ്കിൽ മൂഡ് മെച്ചപ്പെടുക മാത്രമല്ല ദഹനം, വിശപ്പ്, ഉറക്കം, പഠനം, ഓർമ്മശക്തി എന്നിവയെല്ലാം മെച്ചപ്പെടും. ഇതിൽനിന്നു തന്നെ ഈ ഹോർമോണിന്റെ പ്രാധാന്യം മനസിലാകുമല്ലോ. സെറോട്ടോണിന്റെ കുറവ് വലിയ വിഷാദത്തിനും കാരണമാകാമെന്ന് പഠനങ്ങൾ പറയുന്നു.
ചില സമയങ്ങളിൽ നമ്മൾക്കുണ്ടാക്കുന്ന സമ്മർദ്ദം, അസ്വസ്ഥത ഇതെത്തുടർന്ന് ശരീരത്തിനുണ്ടാകുന്ന വേദനയെ ലഘൂകരിക്കാൻ ശരീരം തന്നെ സ്വാഭാവികമായി പുറപ്പെടുവിക്കുന്ന ഹോർമോണുകളാണ് എൻഡോർഫിനുകൾ. ഭക്ഷണം കഴിക്കുക, വ്യായാമം ചെയ്യുക, ലൈംഗികബന്ധത്തിൽ ഏർപ്പെടുക, ധ്യാനം, ചിരി തുടങ്ങിയവയൊക്കെ ശരീരത്തിലെ എൻഡോർഫിൻ നില മെച്ചപ്പെടുത്തുന്നവയാണ്. നമ്മുടെ ശരീരത്തിലെ എൻഡോർഫിനുകളുടെ കുറവ് മൂലമാണ് ഫൈബ്രോമയാൾജിയ പോലുള്ള പ്രശ്നങ്ങൾ ഉണ്ടാകുന്നതെന്ന് ഡോക്ടർ അരുൺ ഉമ്മൻ വിശദീകരിക്കുന്നുണ്ട്.
പ്രായമേറുന്നതിനെ തടയുന്ന ഹാപ്പി ഹോർമോണുകൾ
ജീവിതത്തിലെ 'യഥാർത്ഥ സന്തോഷം' (true happiness) എന്താണെന്നോ അതെങ്ങനെ ഉണ്ടാകുന്നു എന്നോ ചോദിച്ചാൽ നമുക്ക് പെട്ടെന്നൊരുത്തരം ഉണ്ടാകില്ല. എന്നാൽ ഇത് സംബന്ധിച്ച് കാലങ്ങളായി ഗവേഷണങ്ങൾ നടക്കുന്നു എന്നതാണ് യാഥാർത്ഥ്യം. കേംബ്രിഡ്ജിലെ പ്രശസ്തമായ ഹാർവാർഡ് യൂണിവേഴ്സിറ്റി 'യഥാർത്ഥ സന്തോഷം' എന്ന വിഷയത്തിൽ നടത്തിയ ഗവേഷണഫലങ്ങൾ ചൂണ്ടിക്കാട്ടുന്നത് നമ്മൾ ഇടപെടുന്ന ആളുകളും സമൂഹത്തിൽ നമ്മുക്കുള്ള സ്വീകാര്യതയും നമ്മുടെ ശാരീരികവും മാനസികവുമായ ആരോഗ്യത്തിൽ ചെറുതല്ലാത്ത സ്വാധീനം ചെലുത്തുന്നുണ്ടെന്നാണ്. മാത്രമല്ല ഇത് കൂടുതൽക്കാലം ആരോഗ്യത്തോടെ ജീവിക്കാൻ നമ്മെ സഹായിക്കുകയും ചെയ്യുമെന്ന് ഈ ഗവേഷണ ഫലങ്ങൾ പറയുന്നു. അതായത് പോസീറ്റീവായ മനുഷ്യരോടുള്ള ഇടപെടലുകളും നമ്മൾ പോസീറ്റിവായിരിക്കുന്നതും നമ്മുടെ മാനസികാരോഗ്യത്തിൽ മാത്രമല്ല ശാരീരിക ആരോഗ്യത്തിലും കാര്യമായ മാറ്റം വരുത്തുമെന്നാണ്.
എന്താണ് സന്തോഷകരമായ ജീവിതത്തെ നിർണ്ണയിക്കുന്നത് എന്ന വിഷയത്തിൽ അമേരിക്കൻ സൈക്യാട്രിസ്റ്റും സൈക്കോ അനലിസ്റ്റുമായ റോബർട്ട് ജെ വാൽഡിങ്ങറിന്റെ നേതൃത്വത്തിൽ ഹാർവാർഡ് യൂണിവേഴ്സിറ്റിയിൽ നടന്ന ഗവേഷണം ദീർഘകാലമെടുത്താണ് അദ്ദേഹം പൂർത്തിയാക്കിയത്. വളരെ ദൈർഘ്യമേറിയ ഗവേഷണം എന്നു തന്നെ പറയാം. 724 സന്നദ്ധപ്രവർത്തകരുടെയും അവരുടെ പങ്കാളികളുടെയും മറ്റ് കുടുംബാംഗങ്ങളുടെയും ജീവിതം പരിശോധിച്ചു ഡാറ്റ വിശകലനം ചെയ്തതിൽ നിന്ന് അദ്ദേഹം കണ്ടെത്തിയത് ശക്തമായ വ്യക്തിബന്ധങ്ങൾ, നല്ല ആരോഗ്യം, സന്തോഷം എന്നിവ തമ്മിൽ പരസ്പരബന്ധം ഉണ്ടെന്നാണ്. മാത്രമല്ല പോസീറ്റിവായ ബന്ധങ്ങൾ സൂക്ഷിക്കുന്നതും പിന്തുടരുന്നതും പ്രായമേറുന്ന പ്രക്രിയയെ മന്ദഗതിയിലാക്കുമെന്നും അതുവഴി കൂടുതൽക്കാലം ജീവിക്കാൻ ആളുകളെ പ്രാപ്തരാക്കുമെന്നുമാണ്. ഇതിൽ നിന്നു തന്നെ ഹാപ്പി ഹോർമോണുകളുടെ പ്രാധാന്യം എത്രയാണെന്ന് മനസിലാകുമല്ലോ.
എങ്ങനെ ഹാപ്പി ഹോർമോണുകളെ ഉത്തേജിപ്പിക്കാം
ഹാപ്പി ഹോർമോണുകളുടെ പ്രാധാന്യം മനസ്സിലായ സ്ഥിതിക്ക് ഇവയെ എങ്ങനെ ഉത്തേജിപ്പിക്കാം എന്നത് അറിഞ്ഞിരിക്കേണ്ടത് അത്യാവശ്യമാണ്. ഭക്ഷണത്തിലൂടെയും ജീവിതശൈലിയിൽ ചെറിയ മാറ്റങ്ങൾ വരുത്തിയും ഹാപ്പി ഹോർമോണുകളുടെ നില മെച്ചപ്പെടുത്താവുന്നതാണ്. അത് ഭക്ഷണത്തിലൂടെയാകാം, വ്യായാമത്തിലൂടെയാകാം, മെഡിറ്റേഷൻ വഴിയാകാം. പ്രധാനമായും ഇനിപ്പറയുന്ന കുറച്ച് കാര്യങ്ങൾ ശ്രദ്ധിച്ചാൽ നിങ്ങൾക്കും ഹാപ്പി ഹോർമോണുകളുടെ നില മെച്ചപ്പെടുത്തി ദിവസത്തിലുടനീളം പോസിറ്റിവിറ്റി നിറയ്ക്കാം.
വ്യായാമം നമ്മുടെ ശരീരത്തെ ഫിറ്റായിരിക്കാനും ആരോഗ്യത്തോടെയിരിക്കാനും സഹായിക്കുക മാത്രമല്ല രോഗങ്ങളിൽ നിന്നും മറ്റനേകം ആരോഗ്യപ്രശ്നങ്ങളിൽ നിന്നും സംരക്ഷണം നൽകുകയും ചെയ്യുന്നുണ്ട്. കൂടാതെ വളർച്ചാ ഹോർമോണുകൾ, ശരീരത്തെ പുനരുജ്ജീവിപ്പിക്കുകയും പേശികളുടെ വളർച്ചയെ സഹായിക്കുകയും ചെയ്യുന്ന ടെസ്റ്റോസ്റ്റിറോൺ, രക്തത്തിലെ പഞ്ചസാരയുടെ അളവിനെ നിയന്ത്രിക്കുകയും ശരിയായ മെറ്റബോളിസം നിലനിർത്താൻ സഹായിക്കുകയും ചെയ്യുന്ന ഇൻസുലിൻ, തൈറോയിഡ് ഹോർമോണുകൾ എന്നിവയുടെ ഉല്പാദനത്തെ ത്വരിതപ്പെടുത്താനും വ്യായാമം വഴി കഴിയും. അതുപോലെ തന്നെ വ്യായാമം ഹാപ്പി ഹോർമോണുകളായ ഡോപാമിൻ, സെറോടോണിൻ എൻഡോർഫിൻ എന്നിവയെയും ഉത്തേജിപ്പിക്കും. വ്യായാമം ചെയ്യുന്നതിലൂടെ ശരീരത്തിൽ എൻഡോർഫിൻ ഉല്പാദിപ്പിക്കപ്പെടുന്നു എന്നത് കൂടുതൽ പേർക്കും അറിയാവുന്ന കാര്യമാണ്. ചിലയാളുകൾ വ്യായാമത്തിന് അടിമകളാകാൻ തന്നെ ഒരു കാരണമിതാകാം. എൻഡോർഫിനുകൾ സന്തോഷവുമായി നേരിട്ട് ബന്ധപ്പെടുന്ന ഹോർമോണുകൾ ആണ്. എന്തെങ്കിലും പരിക്കുകൾ കാരണമമോ മറ്റോ മസിലുകൾക്ക് ഉണ്ടാകുന്ന വേദന കുറയ്ക്കാൻ സഹായിക്കുന്നവയാണ് ഈ ഹോർമോണുകൾ. ശരീരം സ്വയം ഉല്പാദിപ്പിക്കുന്ന വേദനാസംഹാരിയാണിത്.
ഭക്ഷണം
ഹോർമോണുകളുടെ ശരിയായ പ്രവർത്തനത്തിൽ ഡയറ്റ് ഒരു പ്രധാന പങ്ക് വഹിക്കുന്നുണ്ട്. ശരിയായ, മിതമായ ആരോഗ്യകരമായ ഭക്ഷണക്രമം ശീലിക്കുന്നതിലൂടെ ഹാപ്പി ഹോർമോണുകളുടെ നില മെച്ചപ്പെടുത്താവുന്നതാണ്. ശരീരത്തിന് സ്വന്തമായി ഉല്പാദിപ്പിക്കാൻ കഴിയാത്ത എന്നാൽ അത്യാവശ്യം വേണ്ട അമിനോ ആസിഡായ ട്രിപ്റ്റേോഫാൻ അടങ്ങിയ ഭക്ഷണങ്ങൾ ഡയറ്റിൽ ഉൾപ്പെടുത്താൻ ശ്രദ്ധിക്കണം. പാൽ, ബട്ടർ, മുട്ടയുടെ മഞ്ഞ, മാംസം, മത്സ്യം, കപ്പലണ്ടി, ബദാം, ഈന്തപ്പഴം, വാഴപ്പഴം, ചീസ്, ചീര തുടങ്ങി ഉയർന്ന അളവിൽ പ്രോട്ടീൻ അടങ്ങിയ എല്ലാ ഭക്ഷണത്തിലും ട്രിപ്റ്റോഫാൻ ഉണ്ട്. ട്രിപ്റ്റോഫാൻ ശരീരത്തിലെ സെറോട്ടോണിന്റെ നില മെച്ചപ്പെടുത്തുകയും അതു വഴി സന്തോഷത്തോടെയിരിക്കാൻ സഹായിക്കുകയും ചെയ്യുന്നു. മാത്രമല്ല ഫോളിക്കാസിഡ്, അയൺ എന്നിവയ്ക്കൊപ്പം ശരീരത്തിൽ ചുവന്ന രക്താണുക്കളുടെ ഉല്പാദനത്തിനും ട്രിപ്റ്റോഫാൻ സഹായിക്കുന്നു.
ഡാർക്ക് ചോക്ളേറ്റ്
പഠനങ്ങൾ പറയുന്നത് മിതമായ അളവിൽ ഏകദേശം 50 മുതൽ 100 ഗ്രാം വരെ ഡാർക്ക് ചേക്ളേറ്റ് കഴിക്കുന്നതും ഹാപ്പി ഹോർമോണുകളെ ഉത്തേജിപ്പിക്കും എന്നാണ്. ആഴ്ചയിൽ ഒന്നോ രണ്ടോ തവണ ഇത്തരത്തിൽ ചോക്ളേറ്റ് കഴിക്കുന്നത് ഹൃദയാരോഗ്യവും മെച്ചപ്പെടുത്തും. ഡാർക്ക് ചോക്ലേറ്റിൽ അടങ്ങിയിരിക്കുന്ന രാസവസ്തുക്കൾ കൊറോണറി ധമനികളിലേക്കുള്ള രക്തചംക്രമണത്തെ മെച്ചപ്പെടുത്തുകയും ധമനികളെ ശക്തിപ്പെടുത്തുകയും ചെയ്യുമെന്നാണ് പഠനങ്ങൾ ചൂണ്ടിക്കാട്ടുന്നത്. പക്ഷേ ചോക്ളേറ്റ് തെരഞ്ഞെടുക്കുമ്പോൾ 70-85% യഥാർത്ഥ കൊക്കോയിൽ നിന്ന് നിർമ്മിച്ച ഡാർക്ക് ചോക്ലേറ്റ് തന്നെ തെരഞ്ഞെടുക്കാൻ ശ്രദ്ധിക്കണം.
പ്രിയപ്പെട്ടവർക്കൊപ്പം സമയം ചെലവിടുന്നത് നിങ്ങളുടെ സ്ട്രെസ് ലെവൽ കുറയ്ക്കുന്ന ഒന്നാണ്. അതുപോലെ പുതിയ സ്ഥലങ്ങൾ സന്ദർശിക്കുക, നിങ്ങൾക്ക് സന്തോഷം തരുന്ന പ്രവൃത്തികൾ ചെയ്യുക എന്നിവയെല്ലാം ഡോപോമിൻ വർദ്ധിപ്പിക്കും. ദയാപ്രവൃത്തികൾ ചെയ്യുമ്പോൾ ശരീരത്തിലെ ഡോപാമിൻ അളവ് വർദ്ധിക്കുന്നതായി കാണാം. കൂടാതെ, പ്രയാസകരമായ സാഹചര്യങ്ങളെ അഭിമുഖീകരിക്കുമ്പോൾ നിങ്ങളുടെ മുഖത്ത് ഒരു പുഞ്ചിരി നിലനിർത്തുന്നത് ശരീരത്തിൽ സെറോടോണിൻ, എൻഡോർഫിനുകൾ എന്നിവയുടെ ഉൽപാദനത്തെ സഹായിക്കും, ഇവരണ്ടും സന്തോഷവുമായി നേരിട്ട് ബന്ധപ്പെട്ടിരിക്കുന്ന ഹോർമോണുകളാണ്. അതുപോലെത്തന്നെ നിങ്ങളുടെ പ്രിയപ്പെട്ട വളർത്തുമൃഗങ്ങൾക്കൊപ്പം സമയം ചെലവിടുന്നതും കളിക്കുന്നതും ശരീരത്തിൽ ഹാപ്പി ഹോർമോണുകളായ സെറോടോണിന്റെയും ഓക്സ്സിടോസിന്റെയും നില മെച്ചപ്പെടുത്തും.
സൂര്യപ്രകാശം ഏൽക്കുന്നത്
വിവിധതരം മത്സ്യങ്ങളിൽ നിന്നും മുട്ടയുടെ മഞ്ഞയിൽ നിന്നുമൊക്കെ ശരീരത്തിന് വിറ്റാമിൻ ഡി ലഭിക്കുമെങ്കിലും നേരിട്ട് സൂര്യപ്രകാശം ഏൽക്കുന്നത് വിറ്റാമിൻ ഡിയുടെ ഉല്പാദനം വേഗത്തിലാക്കും. അതിരാവിലെയോ വൈകിട്ട് മൂന്നു മണിക്കു ശേഷമോ ഉള്ള വെയിലേൽക്കുന്നതാണ് നല്ലത്. എല്ലുകളുടെയും ശരീരത്തിലെ രോഗപ്രതിരോധ സംവിധാനത്തിന്റെയും നില മെച്ചപ്പെടുത്തുക മാത്രമല്ല സെറോടോണിൻ ഉല്പാദനം ഉത്തേജിപ്പിക്കാനും വിറ്റാമിൻ ഡി സഹായിക്കും. വിഷാദം (ഡിപ്രഷൻ) കുറയ്ക്കുന്ന കാര്യത്തിൽ സെറോടോണിൻ മുന്നിലാണെന്ന് പറയേണ്ടതില്ലല്ലോ.
മനുഷ്യർക്കിടയിൽ സ്നേഹം, പ്രണയം, ദയ, കാമം തുടങ്ങിയ വികാരങ്ങളൊക്കെ പ്രകടിപ്പിക്കാനുള്ള എളുപ്പവഴിയാണല്ലോ അത്രമേൽ ചേർത്തു പിടിക്കലും ചുംബിക്കലുമെല്ലാം. പക്ഷേ ഇതത്ര നിസ്സാര കാര്യമല്ല. ഇഷ്ടപ്പെട്ട ഒരാളോടൊപ്പം ഇത്തരത്തിൽ സ്നേഹം പങ്കിടുന്നത് ഹാപ്പി ഹോർമോണുകളായ എൻഡോർഫിൻ, ഡോപാമിൻ, ഓക്സിടോസിൻ എന്നിവയുടെ നില മെച്ചപ്പെടുത്തും. സമ്മർദ്ദം കുറച്ച് നിങ്ങളെ സന്തോഷത്തിലാക്കാൻ ഈ ഹോർമോണുകൾക്ക് കഴിയും.
ധ്യാനം, യോഗ
വൈകാരികമായ ഒട്ടേറെ പ്രശ്നങ്ങൾക്ക് ആത്മീയമായ ആശ്വാസം നൽകുന്ന ഒന്നാണ് മെഡിറ്റേഷൻ അഥവാ ധ്യാനം. വളരെ സാവധാനത്തിലും ആഴത്തിലും ശ്വാസം ഉള്ളിലേക്ക് എടുക്കുകയും പുറത്തേക്ക് വിടുകയും ചെയ്യുന്നത് മനസ്സിനെ ശാന്തമാക്കാൻ സഹായിക്കും. വിഷാദവും സമ്മർദ്ദവുമൊക്കെയായി സൈക്യാട്രിസ്റ്റുകളുടെയോ സൈക്കോളജിസ്റ്റുകളുടെയോ മുന്നിലെത്തുന്നവർക്ക് സമ്മർദ്ദമകറ്റാൻ അവർ പറഞ്ഞു കൊടുക്കുന്ന ആദ്യപാഠവും ഇതുതന്നെയാണ്. കുറച്ച് നേരത്തേക്കെങ്കിലും ഒറ്റക്കിരുന്ന് നിങ്ങളുടെ പ്രശ്നങ്ങളെ മനസ്സിലാക്കുന്നത് ജീവിതത്തെക്കുറിച്ച് കൂടുതൽ പോസീറ്റീവായ കാഴ്ചപ്പാട് ഉണ്ടാകാൻ സഹായിക്കും. 30 മിനിട്ട് നേരമെങ്കിലും ഇത്തരത്തിൽ മെഡിറ്റേഷൻ ചെയ്യുന്നത് സമ്മർദ്ദകരമായ സമയങ്ങളിൽ ഉത്പാദിപ്പിക്കപ്പെടുന്ന കോർട്ടിസോൾ എന്ന ഹോർമോണിന്റെ ഉത്പാദനം കുറയ്ക്കും. ആ സ്ഥാനത്ത് ഹാപ്പി ഹോർമോണായ എൻഡോർഫിനുകൾ ഉല്പാദിപ്പിക്കപ്പെടുകയും ചെയ്യും. ഇഷ്ടപ്പെട്ട പാട്ട് കേൾക്കുക, തമാശ നിറഞ്ഞ സന്ദർഭങ്ങൾ ആസ്വദിക്കുക, പൊട്ടിച്ചിരിക്കുക, ശരീരത്തിന് മുഴുവനായി ഒരു മസ്സാജ് നൽകുക എന്നിവയൊക്കെയും ഹാപ്പി ഹോർമോണുകളെ ഉത്തേജിപ്പിക്കുന്ന പ്രവൃത്തികളാണ്.
