പിഎം ​ഗതിശക്തി പദ്ധതി: ​ഗതാ​ഗത മേഖലയ്ക്ക് പുത്തൻ ഉണർവേകുന്ന കേന്ദ്ര പദ്ധതി

റോഡ്, റെയിൽവേ, വിമാനത്താവളം, തുടങ്ങി ഏഴ് ഗതാഗത മേഖലകളിൽ വികസനം ലക്ഷ്യമിട്ടുള്ള കേന്ദ്ര സർക്കാരിന്റെ ബൃഹദ് പദ്ധതിയാണ് പിഎം ഗതിശക്തി പദ്ധതി. കേന്ദ്രത്തിന് കീഴിലുള്ള 16 മന്ത്രാലയങ്ങളെ സംയോജിത ആസൂത്രണത്തിനും അടിസ്ഥാന സൗകര്യ കണക്റ്റിവിറ്റി പദ്ധതികളുടെ ഏകോപിത നടപ്പാക്കലിനും ഒരുമിച്ച് കൊണ്ടുവരുന്നതിനുള്ള ഡിജിറ്റൽ പ്ലാറ്റ്‌ഫോമാണിത്.

ഭാരത്മാല, സാഗർമാല, ഉൾനാടൻ ജലപാതകൾ, ഡ്രൈ/ലാൻഡ് പോർട്ടുകൾ, ഉഡാൻ തുടങ്ങി വിവിധ മന്ത്രാലയങ്ങളുടെയും സംസ്ഥാന സർക്കാരുകളുടെയും അടിസ്ഥാന സൗകര്യ വികസന പദ്ധതികൾ പ്രധാനമന്ത്രി ഗതി ശക്തിയിൽ ഉൾപ്പെടുത്തും. ടെക്സ്റ്റൈൽ ക്ലസ്റ്ററുകൾ, ഫാർമസ്യൂട്ടിക്കൽ ക്ലസ്റ്ററുകൾ, പ്രതിരോധ ഇടനാഴികൾ, ഇലക്ട്രോണിക് പാർക്കുകൾ, വ്യാവസായിക ഇടനാഴികൾ, മത്സ്യബന്ധന ക്ലസ്റ്ററുകൾ, അഗ്രി സോണുകൾ തുടങ്ങിയ സാമ്പത്തിക മേഖലകൾ കണക്റ്റിവിറ്റി മെച്ചപ്പെടുത്തുന്നതിനും ഇന്ത്യൻ ബിസിനസ്സുകളെ കൂടുതൽ മത്സരാധിഷ്ഠിതമാക്കുന്നതിനും പരിരക്ഷിക്കും.

നദീസംയോജന പദ്ധതികൾ, പോർട്ട്, ലോജിസ്റ്റിക്സ് മേഖലയുടെ വികസനം, തീരദേശ വികസനം തുടങ്ങിയ പദ്ധതികൾ എല്ലാം നാഷണൽ ഗതിശക്തി പദ്ധതിക്ക് കീഴിൽ വരുന്നു. ഇത്തരം ഗതാഗതമാർഗങ്ങൾ‍ സംയോജിപ്പിക്കുന്നതിലൂടെ രാജ്യത്തിന്റെ അടിസ്ഥാന സൗകര്യ വികസനമാണ് ലക്ഷ്യമിടുന്നത്. ആദ്യഘട്ടത്തിൽ പദ്ധതിക്കായി ഒരു ലക്ഷം കോടി രൂപയാണ് കേന്ദ്ര സർക്കാർ വകയിരുത്തിയത്.

പദ്ധതിയുടെ ഭാഗമായി ഈ സാമ്പത്തിക വർഷം 25,000 കിലോമീറ്റർ എക്സ്പ്രസ് വേകൾ നിർമിക്കുമെന്ന് ബജറ്റിൽ പ്രഖ്യാപിച്ചിരുന്നു. ഇതിന് പുറമേ, മറ്റ് നിരവധി പ്രഖ്യാപനങ്ങളും നടത്തിയിരുന്നു.

ഡിജിറ്റൽ പരിതസ്ഥിതികൾ പ്രോത്സാഹിപ്പിക്കുന്നതിന് വേണ്ടി പ്രത്യേക ദേശ് സ്റ്റാക്ക് ഇ-പോർട്ടൽ ആരംഭിക്കാനും തീരുമാനമായിട്ടുണ്ട്. 2023 സാമ്പത്തിക വർഷത്തിൽ നാല് മൾട്ടി-മോഡൽ ദേശീയ പാർക്കുകൾക്ക് കരാറുകൾ നൽകുമെന്നും പൊതു ബജറ്റിൽ വ്യക്തമാക്കിയിട്ടുണ്ട്.

രാജ്യത്തെ കാർഷികോത്പന്നങ്ങളുടെ ഉൾപ്പെടെ ചരക്കുനീക്കത്തിനെ റെയിൽവേ സംവിധാനം കാര്യക്ഷമമാക്കും. ഇതിനായി 400 പുതിയ വന്ദേ ഭാരത് ട്രെയിനുകൾ പ്രവർത്തനക്ഷമമാക്കും.

എക്സ്പ്രസ് വേകൾക്കായുള്ള മാസ്റ്റർപ്ലാൻ അടുത്ത സാമ്പത്തിക വർഷത്തിൽ രൂപീകരിക്കും. അടുത്ത മൂന്ന് വർഷത്തിനുള്ളിൽ 100 പിഎം ഗതി ശക്തി ടെർമിനലുകൾ സ്ഥാപിക്കും.