മദ്രസ അധ്യാപകർക്കുള്ള ക്ഷേമ പെൻഷൻ പദ്ധതി; പ്രവർത്തനങ്ങൾ പരിശോധിക്കാം

2008ൽ വി എസ് അച്യുതാനന്ദൻ സർക്കാരിന്റെ കാലത്ത് ജസ്റ്റിസ് രജീന്ദർ സച്ചാർ കമ്മിറ്റി റിപ്പോർട്ടിന്റേയും പാലോളി മുഹമ്മദ് കുട്ടി കമ്മിറ്റി റിപ്പോർട്ടിന്റേയും അടിസ്ഥാനത്തിൽ പൊതുഭരണ വകുപ്പിന്റെ കീഴിൽ കേരള സർക്കാർ സെക്രട്ടേറിയറ്റിനു കീഴിൽ ഒരു ന്യൂനപക്ഷ സെൽ രൂപീകരിച്ചു. ഇതിന്റെ ഭാഗമായാണ് സംസ്ഥാനത്ത് ന്യൂനപക്ഷ ക്ഷേമ വകുപ്പ് രൂപീകരിച്ചത്. ഇതിന്റെ ഭാഗമായി രൂപീകരിച്ച ഒരു പദ്ധതിയാണ് മദ്രസ അധ്യാപകർക്കുള്ള ക്ഷേമ പെൻഷൻ പദ്ധതി.

കേരള മദ്രസ അധ്യാപക ക്ഷേമ പദ്ധതി

കേരളത്തിന് മദ്രസ അധ്യാപകർക്കുള്ള ക്ഷേമ പദ്ധതി പെൻഷൻ ആവശ്യങ്ങൾക്കായുള്ള ഓഫീസ് 2009 ഫെബ്രുവരി മാസത്തിൽ കോഴിക്കോട് ജില്ലയിൽ പ്രവർത്തനം ആരംഭിച്ചു. ഈ പദ്ധതിയിലേക്കുള്ള അംഗത്വ വിതരണം 2010 ജൂലൈയിൽ ആരംഭിക്കുകയും ചെയ്തു.

പദ്ധതിയിൽ ആർക്കെല്ലാം ചേരാം

ഇരുപത് വയസ്സുള്ള ഒരു മദ്രസ അധ്യാപകന് ഈ പദ്ധതിയിൽ ചേരാം. അയാൾക്ക് 65 വർഷം വരെ തുടരാൻ സാധിക്കും. സർക്കാർ ക്ഷേമ പെൻഷനുകൾ വാങ്ങുന്നവർക്ക് നിലവിൽ ഇതിന് അർഹതയില്ല.

ശമ്പളം നൽകുന്നില്ല

അതേസമയം, മദ്രസ അധ്യാപർക്ക് സർക്കാർ ശമ്പളം നൽകുന്നില്ലെന്ന് നേരത്തെ മന്ത്രി വ്യക്തമാക്കിയിരുന്നു. മദ്രസ അധ്യാപകർക്ക് സർക്കാർ ഒരു ക്ഷേമനിധി രൂപീകരിച്ചു നൽകിയിട്ടുണ്ട്. ശമ്പളയിനത്തിൽ സർക്കാർ ധന സഹായം നൽകുന്നില്ല. ഇതിൽ മദ്രസ മാനേജ്മെന്റും മദ്രസയിലെ അധ്യാപരും അംഗങ്ങളാണ്. ഇരു കൂട്ടരും ഇതിൽ പണം നിക്ഷേപിക്കേണ്ടതുണ്ട്. ഈ പണം സൂക്ഷിക്കുന്നത് സർക്കാർ ട്രഷറിയിലാണ്.

പെൻഷൻ തുക

പ്രതിമാസ വരിത്തുകയായി അധ്യാപകർ 50 രൂപയും. 50 രൂപ മദ്രസ കമ്മിറ്റിയും പങ്കിടണം. വിരമിക്കൽ പ്രായത്തിനു ശേഷമുള്ള പെൻഷൻ 500 രൂപ മുതൽ 5200 രൂപ വരെയാണ്. അത് അവരുടെ അംഗത്വ കാലയളവ് അനുസരിച്ചായിരിക്കും. ഈ പദ്ധതിക്കായി കോർപ്പസ് ഫണ്ടായി കോഴിക്കോട് ജില്ലാ സഹകരണ ബാങ്കിൽ പത്ത് കോടി നിക്ഷേപിച്ചിട്ടുണ്ട്.

ന്യൂനപക്ഷ ക്ഷേമ വകുപ്പിന്റെ മറ്റ് പ്രവർത്തനങ്ങൾ

കേരളത്തിലെ എല്ലാ ജില്ലാ കളക്ടറേറ്റുകളിലുമുള്ള ന്യൂനപക്ഷ സെല്ലുകളുടെ പ്രവർത്തനങ്ങളുടെ നിരീക്ഷണവും വിലയിരുത്തലും. ഓരോ ജില്ലയിലും ന്യൂനപക്ഷ ക്ഷേമ പ്രവർത്തനങ്ങൾ ഏകോപിപ്പിക്കുന്നതിന് വേണ്ടിയാണ് ഈ സെല്ലുകൾ രൂപീകരിച്ചിരിക്കുന്നത്.

മുസ്ലീം പെൺകുട്ടികൾക്കുള്ള സ്കോളർഷിപ്പും ഹോസ്റ്റൽ സ്റ്റൈപ്പൻഡിൻ്റേയും നിരീക്ഷണവും വിലയിരുത്തലും.

കേരള സ്റ്റേറ്റ് മദ്രസ അധ്യാപകരുടെ ക്ഷേമനിധിയുടെ നിരീക്ഷണവും വിലയിരുത്തലും

യൂണിയൻ പബ്ലിക് സർവീസ് കമ്മീഷൻ, കേരള പബ്ലിക് സർവീസ് കമ്മീഷൻ, ബാങ്കിംഗ് സർവീസ് റിക്രൂട്ട്‌മെന്റ് ബോർഡുകൾ, റെയിൽവേ റിക്രൂട്ട്‌മെന്റ് ബോർഡ്, മറ്റ് ഏജൻസികൾ എന്നിവ നടത്തുന്ന മത്സര പരീക്ഷകൾക്ക് ന്യൂനപക്ഷ യുവാക്കൾക്ക് സൗജന്യ കോച്ചിംഗിനായി സംസ്ഥാനത്ത് കോച്ചിംഗ് സെന്ററുകളുടെ നിരീക്ഷണം.