പരിസ്ഥിതി വകുപ്പിന്റെ ശാക്തീകരണ പദ്ധതിയുമായി കേരളം

ലോകത്താകമാനം ഭീഷണിയാകുന്ന പ്രശ്നമാണ് കാലാവസ്ഥാ വ്യതിയാനം. അത് ദേശീയ സമ്പദ് വ്യവസ്ഥയെ തടസപ്പെടുത്തുകയും ജീവിതത്തെ ഹാധിക്കുകയും ചെയ്യുന്നു. കാലാവസ്ഥാ പാറ്റേണുകൾ മാറിക്കൊണ്ടിരിക്കുന്നു, സമുദ്രനിരപ്പ് ഉയരുന്നു, കാലാവസ്ഥാ സംഭവങ്ങൾ കൂടുതൽ തീവ്രമായി മാറുന്നു, ഹരിതഗൃഹ വാതക ഉദ്വമനം ഇപ്പോൾ ചരിത്രത്തിലെ ഏറ്റവും ഉയർന്ന നിലയിലാണ്.

കാലാവസ്ഥാ വ്യതിയാനം നമ്മുടെ സംസ്ഥാനത്തിന്റെ പരിസ്ഥിതിക്ക് ഗുരുതരമായ ഭീഷണിയാണ് ഉയർത്തുന്നത്. അതിനെതിരെയുള്ള നടപടികളും സ്വീകരിച്ച് വരികയാണ്. സമീപ വർഷങ്ങളിൽ വികസന ആസൂത്രണത്തിനുള്ള ഒരു അജണ്ടയായി മാറിയിരിക്കുന്നു. സംസ്ഥാനത്തെ കാലാവസ്ഥാ വ്യതിയാനവുമായി ബന്ധപ്പെട്ട പ്രവർത്തനങ്ങൾ ഏകോപിപ്പിക്കുന്നതിനുള്ള നോഡൽ ഏജൻസിയായി പരിസ്ഥിതി വകുപ്പിനെ നാമനിർദ്ദേശം ചെയ്തിട്ടുണ്ട്. 2009 ഓഗസ്റ്റ് 18-ന് നടന്ന സംസ്ഥാന പരിസ്ഥിതി മന്ത്രിമാരുടെ സമ്മേളനത്തിൽ പ്രധാനമന്ത്രി നടത്തിയ പ്രഖ്യാപനങ്ങളെത്തുടർന്ന്, പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം കാലാവസ്ഥാ വ്യതിയാനത്തെക്കുറിച്ചുള്ള സംസ്ഥാന ആക്ഷൻ പ്ലാൻ തയ്യാറാക്കുന്നതിനുള്ള ഒരു പ്രക്രിയ ആരംഭിച്ചു.

സംസ്ഥാന തലത്തിൽ നടപ്പിലാക്കുന്ന നിലവിലുള്ള പരിപാടികളും പദ്ധതികളും കാലാവസ്ഥാ വ്യതിയാനത്തെക്കുറിച്ചുള്ള ദേശീയ കർമ്മ പദ്ധതിയും കണക്കിലെടുത്താണ് സംസ്ഥാന സർക്കാരിന്റെ നിലവിലുള്ള നയങ്ങളെ അടിസ്ഥാനമാക്കി ഇത് നിർമ്മിച്ചിരിക്കുന്നത്.

സംയോജിത ജലവിഭവ മാനേജ്മെന്റ്, ജലവിതരണം, ശുചിത്വം, നഗരവികസനം, റോഡുകളും പാലങ്ങളും, ഗതാഗതം, വനം, കൃഷി, മൃഗക്ഷേമവും ക്ഷീരവികസനവും, മൽസ്യ മേഖല, ഉപജീവനോപാധികൾ, ഭൂമി എന്നീ മേഖലകൾക്കും വിവിധ മേഖലകളിലായി വ്യാപിച്ചു കിടക്കുന്ന പരിസ്ഥിതി, കാലാവസ്ഥാ വ്യതിയാനം, ദുരന്ത സാധ്യതാ ലഘൂകരണം, ഓപ്പൺ ഡാറ്റ, പൊതുമേഖലാ ശാക്തീകരണം എന്നിവയ്ക്കും ഊന്നൽ നൽകിയുള്ള പദ്ധതികളാണ് നടപ്പിലാക്കുന്നത്.

ഭാവിയിൽ ഉണ്ടായേക്കാവുന്ന പ്രകൃതി ദുരന്തങ്ങളുടെ ആഘാതം കുറയ്ക്കുന്നതിനും അതിജീവനക്ഷമത ഉയർത്തുന്നതിനുമുള്ള പ്രവർത്തനങ്ങളാണ് ആസൂത്രണം ചെയ്ത് നടപ്പിലാക്കുന്നത്.

പൊതുമരാമത്ത് വകുപ്പ് സെമി എലിവേറ്റഡ് രീതിയിൽ റോഡ് നിർമാണം, വെള്ളമൊഴുകുന്ന വീതിയേറിയ ചാലുകൾ, തിരക്ക് കുറയ്ക്കത്തക തരത്തിൽ ജംഗ്ഷനുകൾ രൂപകൽപന, മഴവെള്ളം ഊർന്നിറങ്ങത്തക്ക രീതിയിലുള്ള നടപ്പാത നിർമാണം, ചെരിവുകൾക്ക് ഉറപ്പുനൽകുന്നതിന് സോയി നയിലിങ് സാങ്കേതിക വിദ്യയുടെ ഉപയോഗം, ആധുനിക യന്ത്രങ്ങൾ ഉപയോഗിച്ചുള്ള റോഡ് നിർമാണ രീതി എന്നിവയെല്ലാം പദ്ധതിയുടെ ഉദാഹരണങ്ങളാണ്.