സര്‍വീസുകള്‍ റദ്ദാക്കി, സീറ്റുകള്‍ കുറച്ചു
കൊവിഡ് വ്യാപനം തടയുകയെന്ന ലക്ഷ്യത്തോടെ, നാട്ടിലെത്തുന്നവരുടെ പരിശോധനകളും മറ്റും കാര്യക്ഷമമാക്കുന്നതിനായി പ്രതിദിനം 1000 യാത്രക്കാരെ മാത്രം അനുവദിച്ചാല്‍ മതിയെന്ന് വ്യോമയാന വകുപ്പ് കഴിഞ്ഞ ദിവസം തീരുമാനമെടുത്തിരുന്നു. എന്നു മാത്രമല്ല, ഒരു വിമാനത്തില്‍ പരമാവധി 35 യാത്രക്കാര്‍ മാത്രമേ പാടുള്ളൂ എന്നും നിബന്ധന വച്ചു. ഇതോടെ വിമാനക്കമ്പനികള്‍ നേരത്തേ ഷെഡ്യൂള്‍ ചെയ്ത നിരവധി സര്‍വീസുകള്‍ റദ്ദാക്കേണ്ടിവന്നു. സര്‍വീസ് നടത്തിയ ഫ്‌ളൈറ്റുകളിലെ യാത്രക്കാരുടെ എണ്ണം കുറക്കാനും അവര്‍ നിര്‍ബന്ധിതരായി. ഇതനുസരിച്ച് വിമാനക്കമ്പനികള്‍ നേരത്തേ ടിക്കറ്റ് ബുക്ക് ചെയ്ത യാത്രക്കാരെ ടിക്കറ്റ് റദ്ദാക്കിയതായി അറിയിക്കുകയായിരുന്നു.
ദുബായില്‍ കുടുങ്ങിയത് നിരവധി പേര്‍
കുവൈത്തിലേക്ക് പോവാന്‍ ദുബായിലും മറ്റും എത്തിയവരാണ് ഏറ്റവും കൂടുതല്‍ ദുരിതത്തിലായത്. പൊടുന്നനെ യാത്ര മുടങ്ങിയതിനെ തുടര്‍ന്ന് ഇവര്‍ അക്ഷരാര്‍ഥത്തില്‍ പെരുവഴിയിലാവുകയായിരുന്നു. ദുബായില്‍ ഏജന്‍സികള്‍ ഒരുക്കിയ ഒന്നോ രണ്ടോ ദിവസത്തെ താമസസൗകര്യം അവസാനിച്ചതോടെ എന്തു ചെയ്യണമെന്നറിയാത്ത അവസ്ഥയിലാണ് മലയാളികള്‍ ഉള്‍പ്പെടെയുള്ള പ്രവാസികള്‍. ഫെബ്രുവരി ആറുവരെ കുവൈത്തിലേക്കുള്ള യാത്രക്കാര്‍ക്ക് നിയന്ത്രണം ഏര്‍പ്പെടുത്തിയിരിക്കുന്നത്. അതുവരെ എവിടെ തങ്ങുമെന്നറിയാത്ത സ്ഥിതിയിലാണ് പ്രവാസികളിലേറെയും.
കൊവിഡ് സര്‍ട്ടിഫിക്കറ്റും വിഫലമായി
കൊവിഡ് നെഗറ്റീവ് സര്‍ട്ടിഫിക്കറ്റുമായി അടുത്ത ദിവസത്തെ വിമാനത്തില്‍ പോകാന്‍ തയാറായി നില്‍ക്കുന്നവര്‍ക്കാണ് വിമാനം റദ്ദാക്കിയതായി സന്ദേശം വന്നത്. അടുത്ത ദിവസങ്ങളില്‍ ടിക്കറ്റ് കിട്ടാന്‍ സാധ്യതയില്ലാത്തതിനാല്‍ ഇവരുടെ കൊവിഡ് നെഗറ്റീവ് സര്‍ട്ടിഫിക്കറ്റുകളുടെ കാലാവധി അതിനിടയില്‍ കഴിയും. ഇനി യാത്ര ചെയ്യണമെങ്കില്‍ വീണ്ടും ടെസ്റ്റ് നടത്തണമെന്ന പ്രശ്‌നവും ഇവര്‍ അഭിമുഖീകരിക്കുന്നുണ്ട്. കുവൈത്തിലെത്താനുള്ള പണം മാത്രം കൈയില്‍ കരുതി യാത്ര പുറപ്പെട്ടവരാണ് ഇവരില്‍ പലരും. ഈ പ്രതിസന്ധി ഘട്ടത്തില്‍ തങ്ങളുടെ ട്രാവല്‍ ഏജന്റുമാരെ ബന്ധപ്പെടാന്‍ കഴിയുന്നില്ലെന്ന പരാതിയും ഇവര്‍ക്കുണ്ട്. യൂറോപ്യന്‍ രാജ്യങ്ങളില്‍ പുതിയ ഇനം കൊവിഡ് വൈറസുകള്‍ കണ്ടെത്തിയതിനെ തുടര്‍ന്ന് ഗള്‍ഫ് രാജ്യങ്ങള്‍ വിമാന സര്‍വീസുകള്‍ താല്‍ക്കാലികമായി റദ്ദാക്കിയപ്പോഴും പ്രവാസികള്‍ ഇതേ പ്രതിസന്ധി നേരിടേണ്ടി വന്നിരുന്നു. ദുബായ് അടക്കമുള്ള പ്രദേശങ്ങളിലെ സന്നദ്ധ സംഘടനകളായിരുന്നു അന്ന് പ്രവാസി യാത്രക്കാരുടെ സഹായത്തിനെത്തിയത്.