സാലറി കട്ട് ഘട്ടം ഘട്ടമായി
ഒറ്റയടിക്ക് 15 ദിവസത്തെ ശമ്പളം പിടിക്കില്ലെന്ന് അധികൃതര്‍ അറിയിച്ചു. ആരോഗ്യ മുന്‍കരുതല്‍ നടപടികള്‍ പാലിക്കാത്തവരെ ആദ്യം താക്കീത് നല്‍കി വിടും. അത് ആവര്‍ത്തിച്ചാല്‍ ഒരു ദിവസത്തെ ശമ്പളം പിടിക്കും. നിയമലംഘനം തുടരുകയാണെങ്കില്‍ 15 ദിവസം വരെയുള്ള ശമ്പളം കുറയ്ക്കുമെന്നും കമ്മീഷന്‍ വ്യക്തമാക്കി. ഇതുമായി ബന്ധപ്പെട്ട് കമ്മീഷന്‍ ഇറക്കിയ സര്‍ക്കുലര്‍ എല്ലാ സര്‍ക്കാര്‍ ഓഫീസുകള്‍ക്കും ബാധകമാണെന്നും അധികൃതര്‍ പറഞ്ഞു.
കൂടുതല്‍ നിയന്ത്രണങ്ങള്‍ നാളെ മുതല്‍
രോഗവ്യാപനം രൂക്ഷമായ സാഹചര്യത്തില്‍ ഞായറാഴ്ച മുതല്‍ രണ്ടാഴ്ചത്തേക്ക് വിദേശികള്‍ക്ക് പ്രവേശന വിലക്ക് ഏര്‍പ്പെടുത്തിയിരിക്കുകയാണ് കുവൈത്ത്. ഫെബ്രുവരി 21 മുതല്‍ രാജ്യത്തെത്തുന്നവര്‍ക്ക് ഒരാഴ്ചത്തെ നിര്‍ബന്ധിത സ്ഥാപനം ക്വാറന്റൈന്‍ അടക്കം രണ്ടാഴ്ചത്തെ ക്വാറന്റൈന്‍ നിര്‍ബന്ധമാക്കിയിട്ടുമുണ്ട്. അതിനു പുറമെ, ജിമ്മുകള്‍, സലൂണുകള്‍ തുടങ്ങിയവ നാളെ മുതല്‍ ഒരു മാസത്തേക്ക് അടച്ചിടാനും നിര്‍ദ്ദേശം നല്‍കിയിട്ടുണ്ട്. രാജ്യത്ത് 168,250 കൊവിഡ് കേസുകളാണ് ഇതിനകം റിപ്പോര്‍ട്ട് ചെയ്യപ്പെട്ടത്. ഇതുവരെ 962 പേര്‍ കൊവിഡ് ബാധിച്ച് മരണപ്പെടുകയും ചെയ്തു.
മൂന്ന് പ്രവാസി അധ്യാപകര്‍ക്ക് ജോലി പോയി
അനുവാദമില്ലാതെ സ്വകാര്യ ചടങ്ങില്‍ പങ്കെടുത്ത് പ്രതിഫലം വാങ്ങി സംഗീതപരിപാടി അവതരിപ്പിച്ച മൂന്ന് പ്രവാസി സംഗീതാധ്യാപകരെ കുവൈറ്റ് പിരിച്ചുവിട്ടു. അഹ്മദി എഡുക്കേഷന്‍ ഡിസ്ട്രിക്റ്റ് സ്‌കൂളില്‍ വര്‍ഷങ്ങളായി ജോലി ചെയ്യുന്ന അധ്യാപകര്‍ക്കാണ് ജോലി നഷ്ടമായത്. സ്വകാര്യ ചടങ്ങില്‍ അനുവാദമില്ലാതെ പരിപാടികള്‍ അവതരിപ്പിക്കുന്നതിനെതിരേ നേരത്തേ മുന്നറിയപ്പ് നല്‍കിയിരുന്നുവെങ്കിലും അത് ആവര്‍ത്തിച്ചതിനെ തുടര്‍ന്നാണ് വിദ്യാഭ്യാസ മന്ത്രാലയത്തിന്റെ നടപടി. മൂന്നു പേരും കുറ്റം നിഷേധിച്ചെങ്കിലും പരിപാടിയുടെ വീഡിയോ ഉള്‍പ്പെടെയുള്ള തെളിവുകള്‍ ഇവര്‍ക്കെതിരാവുകയായിരുന്നു.