പുതുതായി അനുവദിച്ച ലൈസന്‍സുകള്‍ കുറഞ്ഞു
പ്രവാസികള്‍ക്ക് ഡ്രൈവിംഗ് ലൈസന്‍സ് നല്‍കുന്നതിനുള്ള നിയന്ത്രണങ്ങള്‍ ശക്തമാക്കിയ പശ്ചാത്തലത്തില്‍ പുതുതായി അവര്‍ക്ക് അനുവദിച്ച ലൈസന്‍സുകളുടെ എണ്ണത്തിലും വലിയ കുറവ് ഉണ്ടായിട്ടുണ്ട്. മുന്‍വര്‍ഷത്തെ അപേക്ഷിച്ച് പുതുതായി ഡ്രൈവിംഗ് ലൈസന്‍സ് അനുവദിക്കപ്പെട്ട പ്രവാസികളുടെ എണ്ണത്തില്‍ 43 ശതമാനത്തിന്റെ കുറവാണ് ഉണ്ടായതെന്നും കണക്കുകള്‍ വ്യക്തമാക്കുന്നു. 2020ല്‍ 72,000 പ്രവാസികള്‍ക്ക് ലൈസന്‍സ് അനുവദിച്ചപ്പോള്‍ ഈ വര്‍ഷം ആദ്യ 10 മാസങ്ങളില്‍ ഇത് 41,000 മാത്രമാണ്.
2400 സ്വദേശികള്‍ക്കും ലൈസന്‍സ് നഷ്ടമായി
അതിനിടെ, 2,400 കുവൈറ്റ് പൗരന്മാരുടെ ലൈസന്‍സുകളും റദ്ദാക്കിയതായി അധികൃതര്‍ അറിയിച്ചു. മാനസിക അസ്വാസ്ഥ്യങ്ങള്‍, കാഴ്ചാപരിമിതി തുടങ്ങിയ കാരണങ്ങളാലാണ് നേരത്തേ അനുവദിച്ചിരുന്ന ലൈസന്‍സുകള്‍ കാന്‍സല്‍ ചെയ്തത്. രാജ്യത്തെ ഡ്രൈവിംഗ് ലൈസന്‍സ് വിതരണം കാര്യക്ഷമമാക്കുന്നതിനായി താമസകാര്യവകുപ്പ്, മാന്‍പവര്‍ അതോറിറ്റി, ഭിന്നശേഷി ക്ഷേമ വകുപ്പ് എന്നിവയുമായുള്ള ഏകോപനത്തോടെ സൂക്ഷ്മ പരിശോധനകള്‍ക്ക് ശേഷമാണ് പുതിയ ലൈസന്‍സ് അപേക്ഷകളില്‍ തീര്‍പ്പ് കല്‍പ്പിക്കുന്നതെന്നും ജനറല്‍ ട്രാഫിക് വിഭാഗം വ്യക്തമാക്കി.
റദ്ദാക്കിയത് അനധികൃത ലൈസന്‍സുകള്‍
പ്രവാസികള്‍ നിയമവിരുദ്ധമായി ഉപയോഗിച്ചു കൊണ്ടിരിക്കുന്ന ഡ്രൈവിംഗ് ലൈസന്‍സുകളാണ് ട്രാഫിക് വിഭാഗം കണ്ടെത്തി റദ്ദാക്കിയിരിക്കുന്നത്. റദ്ദാക്കപ്പെട്ടവയില്‍ ഭൂരിപക്ഷവും തൊഴില്‍ വിസ മാറിയത് കാരണം അയോഗ്യരായവരാണ്. ചെയ്യുന്ന ജോലിയുടെ തസ്തികയിലുണ്ടായ മാറ്റത്തിനനുസരിച്ച് മുന്‍ വിസയില്‍ നല്‍കിയ ഡ്രൈവിംഗ് ലൈസന്‍സ് പിന്‍വലിക്കാന്‍ ട്രാഫിക് വിഭാഗം നേരത്തേ തീരുമാനിച്ചിരുന്നു. ഇതാണ് പലര്‍ക്കും വിനയായത്. പ്രവാസി തൊഴിലാളികള്‍ വിസ പുതുക്കുകയോ പുതിയ വിസയിലേക്ക് മാറുകയോ ചെയ്യുമ്പോള്‍ നേരത്തേയുള്ള വിസയില്‍ നല്‍കപ്പെട്ടിട്ടുള്ള ഡ്രൈവിംഗ് ലൈസന്‍സ് അധികൃതര്‍ക്ക് മുമ്പില്‍ ഹാജരാക്കണമെന്നാണ് പുതിയ നിയമം. പുതിയ വിസയിലെ ജോലി തസ്തിക വിസ ലഭിക്കാന്‍ അര്‍ഹതയുള്ളതല്ലെങ്കില്‍ നിലവിലെ ഡ്രൈവിംഗ് ലൈസന്‍സ് റദ്ദാക്കാനാണ് അധികൃതരുടെ തീരുമാനം. രാജ്യത്ത് ഗതാഗതത്തിരക്ക് ഒഴിവാക്കുന്നതിന്റെ ഭാഗമായി പ്രവാസികള്‍ അനധികൃതമായി ഉപയോഗിക്കുന്ന ഡ്രൈവിംഗ് ലൈസന്‍സുകള്‍ കണ്ടുകെട്ടുന്നതിന്റെ ഭാഗമായാണ് വിസ പുതുക്കുമ്പോള്‍ ഡ്രൈവിംഗ് ലൈസന്‍സ് സമര്‍പ്പിക്കണമെന്ന പുതിയ തീരുമാനം.
ഒരു ലക്ഷത്തിലേറെ ലൈസന്‍സുകള്‍ അനധികൃതം
പ്രവാസികളില്‍ പലരും കാലാവധി കഴിഞ്ഞതോ, തുടര്‍ന്ന് ഉപയോഗിക്കാന്‍ നിയമപരമായി അനുവാദമില്ലാത്തതോ ആയ ഡ്രൈവിംഗ് ലൈസന്‍സുകള്‍ ഉപയോഗിക്കുന്നതായാണ് ട്രാഫിക് വിഭാഗത്തിന്റെ കണ്ടെത്തല്‍. നിയമത്തിന്റെ പഴുതുകള്‍ ഉപയോഗിച്ചാണ് പലരും ഇവ ഉപയോഗിക്കുന്നത്. ഇങ്ങനെ ഒരു ലക്ഷത്തോളം പേര്‍ രാജ്യത്ത് അനധികൃതമായി കൈവശം വയ്ക്കുന്നതായാണ് കണക്കുകള്‍. ജോലിയുടെ അടിസ്ഥാനത്തില്‍ ലഭിക്കുന്ന ലൈസന്‍സ് ജോലി മാറിയിട്ടും ഉപയോഗിക്കുന്നത് ലൈസന്‍സ് ഇല്ലാതെ വാഹനമോടിക്കുന്നതിന് തുല്യമായി പരിഗണിക്കും. വിദേശ വിദ്യാര്‍ഥികള്‍ക്ക് താല്‍ക്കാലികമായി നല്‍കുന്ന ഡ്രൈവിംഗ് ലൈസന്‍സിന്റെ സ്ഥിതിയും ഇതുതന്നെ. പഠനം പൂര്‍ത്തിയായ ശേഷം ഉപയോഗിച്ചാലും നടപടിവരും.
