ഒറിജിനല്‍ കൈവശം വയ്‌ക്കേണ്ട ആവശ്യമില്ല
വാഹനം ഓടിക്കുന്നവര്‍ ഡ്രൈവിംഗ് ലൈസന്‍സിന്റെ ഒറിജിനല്‍ തന്നെ കൈവശം വയ്ക്കണമെന്നും അതിന്റെ ഫോട്ടോയോ സ്‌കാന്‍ ചെയ്ത കോപ്പിയോ മൈ ഐഡന്റിറ്റി ആപ്പിലെ ഡിജിറ്റല്‍ ഡ്രൈവിംഗ് ലൈസന്‍സോ മതിയാവില്ലെന്ന് ട്രാഫിക് വിഭാഗം ഡെപ്യൂട്ടി ഡയരക്ടര്‍ ജനറല്‍ ബ്രിഗേഡിയര്‍ ജനറല്‍ ഷെയ്ഖ് ഫവാസ് അല്‍ ഖാലിദ് അറിയിച്ചിരുന്നു. ഒറിജിനല്‍ ലൈസന്‍സ് കൈവശമില്ലാതെ വാഹനമോടിക്കുന്നത് കുറ്റകരമാണ്. ഇത് ലൈസന്‍സ് റദ്ദ് ചെയ്യപ്പെടാന്‍ പോലും കാരണമാവുന്ന കുറ്റമാണ്. 15 ദിനാര്‍ പിഴയാണ് ഇതിന് ഈടാക്കുകയെന്നും അദ്ദേഹം അറിയിച്ചിരുന്നു. ഈ തീരുമാനമാണ് ആഭ്യന്തര മന്ത്രാലയം ഇപ്പോള്‍ മാറ്റിയിരിക്കുന്നത്.
ഡിജിറ്റല്‍ ഡ്രൈവിംഗ് ലൈസന്‍സ് മതിയാവും
വാഹന പരിശോധനാ വേളയില്‍ മൈ എഡന്റിറ്റി ആപ്പിലെ ഡിജിറ്റല്‍ ഡ്രൈവിംഗ് ലൈസന്‍സ് കാണിച്ചാല്‍ മതിയോ എന്ന കാര്യത്തില്‍ ജനങ്ങള്‍ക്കിടയില്‍ ആശയക്കുഴപ്പം ഉണ്ടായ പശ്ചാത്തലത്തിലാണ് പുതിയ പ്രസ്താവനയുമായി മന്ത്രാലയം രംഗത്തെത്തിയിരിക്കുന്നത്. ഒരാഴ്ച മുമ്പാണ് ഡ്രൈവിംഗ് ലൈസന്‍സ്, ജനന സര്‍ട്ടിഫിക്കറ്റ്, കോവിഡ് വാക്സിന്റെ മൂന്നാമത്തെ ഡോസ് എന്നിവ സംബന്ധിച്ച വിവരങ്ങള്‍ കൂടി ഉള്‍പ്പെടുത്തി മൈ ഐഡന്റിറ്റി മൊബൈല്‍ ആപ്ലിക്കേഷന്‍ അധികൃതര്‍ പരിഷ്‌കരിച്ചത്. സര്‍ക്കാര്‍ സേവനങ്ങള്‍ കൂടുതല്‍ ഡിജിറ്റല്‍ വല്‍ക്കരിക്കുന്നതിന്റെ ഭാഗമായാണ് നടപടി. ഡിജിറ്റല്‍ മൊബൈല്‍ ഐഡിയുടെ വരവോടെ സിവില്‍ ഐഡി കാര്‍ഡ് കൊണ്ടുനടക്കേണ്ട ആവശ്യമുണ്ടായിരുന്നില്ല. എന്നാല്‍ മൈ ഐഡി ആപ്പില്‍ ഡ്രൈവിംഗ് ലൈസന്‍സും ലഭ്യമാണെങ്കിലും വാഹനമോടിക്കുമ്പോള്‍ ഒറിജിനല്‍ ലൈസന്‍സ് തന്നെ കൈവശം വയ്ക്കണമെന്ന ട്രാഫിക് വിഭാഗം ഉദ്യോഗസ്ഥന്റെ പ്രസ്താവനയാണ് ആശയക്കുഴപ്പത്തിന് ഇടയാക്കിയത്.
ലൈസന്‍സ് പരിശോധന കര്‍ശനമാക്കും
എന്നാല്‍ ഇക്കാര്യത്തില്‍ പുതിയ പ്രസ്താവനയോടെ വ്യക്തത കൈവന്ന സ്ഥിതിക്ക് രാജ്യത്തെ വാഹന ഉപയോക്താക്കള്‍ക്ക് തീരുമാനം വലിയ ആശ്വാസമാകും. വാഹന രജിസ്ട്രേഷന്‍ സര്‍ട്ടിഫിക്കറ്റും അധികം വൈകാതെ കുവൈത്ത് മൊബൈല്‍ ഐഡിയില്‍ ഉള്‍പ്പെടുത്തുമെന്ന് വാര്‍ത്താവിനിമയ മന്ത്രി ഡോ. റന അല്‍ ഫാരിസ് വ്യക്തമാക്കിയിരുന്നു. രാജ്യത്ത് വാഹനാപകടങ്ങള്‍ വര്‍ധിച്ചുവരികയും അനധികൃത ഡ്രൈവിംഗ് ലൈസന്‍സ് ഉപയോഗിക്കുന്നവരുടെ എണ്ണം വലിയ തോതില്‍ വര്‍ധിക്കുകയും ചെയ്ത സാഹചര്യത്തിലാണ് ശക്തമായ പരിശോധനകളും നിയന്ത്രണങ്ങളുമായി അധികൃതര്‍ രംഗത്തെത്തിയിരിക്കുന്നത്. കുവൈറ്റില്‍ ഒരു ലക്ഷത്തിലേറെ പേരുടെ ഡ്രൈവിംഗ് ലൈസന്‍സ് അനധികൃതമാണെന്നാണ് അധികൃതരുടെ കണ്ടെത്തല്‍. അവ കണ്ടെത്തി റദ്ദാക്കുന്നതിന് ആവശ്യമായ നടപടികളുമായി മുന്നോട്ടുപോവുകയാണ് ട്രാഫിക് വിഭാഗം. ഇതിന്റെ ഭാഗമായി വിസ പുതുക്കുമ്പോള്‍ ഡ്രൈവിംഗ് ലൈസന്‍സ് ഉള്ളവര്‍ അത് ഹാജരാക്കണമെന്ന് കഴിഞ്ഞ ദിവസം മന്ത്രാലയം നിര്‍ദ്ദേശം നല്‍കിയിരുന്നു.