103 രാജ്യങ്ങളിൽ നിന്നും അതിഥികള്‍; സ്വീകരിക്കാന്‍ ഒമാൻ എയർ സർവീസുകൾ

ഒമാൻ: 103 രാജ്യങ്ങളിൽ നിന്നുള്ളവര്‍ക്ക് വിസയില്ലാതെ ഒമാനില്‍ പ്രവേശിക്കാന്‍ അനുമതി ലഭിച്ച സാഹചര്യത്തിലാണ് പുതിയ പ്രഖ്യാപനവുമായി ഒമാന്‍ എയര്‍ രംഗത്തെത്തിയിരിക്കുന്നത്.
103 രാജ്യങ്ങളിൽ നിന്നുള്ള അതിഥികളെ ഒമാനില്‍ എത്തിക്കാന്‍ സുൽത്താനേറ്റിന്റെ ദേശീയ വിമാനക്കമ്പനിയായ ഒമാൻ എയർ സര്‍വീസ് ആരംഭിക്കുന്നു. വിനോദസഞ്ചാരികളെ ആകര്‍ഷിക്കാനും ഒമാന്‍ സന്ദര്‍ശിക്കാനാഗ്രഹിക്കുന്നവര്‍ക്ക് നടപടിക്രമങ്ങള്‍ എളുപ്പമാക്കാനും ലക്ഷ്യമിട്ടാണ് പുതിയ തീരുമാനം ഒമാന്‍ സ്വീകരിച്ചത്.

വിസയില്ലാതെ 10 ദിവസം വരെ ഒമാനില്‍ തങ്ങാന്‍ സാധിക്കും. രാജ്യത്ത് എത്തുന്ന അതിഥികള്‍ക്ക് ആവശ്യമായ നിര്‍ദ്ദേശങ്ങള്‍ റോയൽ ഒമാൻ പോലീസ് പ്രഖ്യാപിച്ചു കഴി‍ഞ്ഞു. ഹോട്ടൽ റിസർവേഷൻ, ആരോഗ്യ ഇൻഷുറൻസ്. തിരിച്ചുള്ള വിമാന ടിക്കറ്റ് എന്നിവ കൈയ്യിലുള്ളവര്‍ക്ക് രാജ്യത്ത് 10 ദിവസം താമസിക്കാന്‍ സാധിക്കും. ജർമ്മനി, ഫ്രാൻസ്, അമേരിക്ക, സ്പെയിൻ, ഇറ്റലി, തുർക്കി, ജപ്പാൻ, ബ്രസീൽ, ഈജിപ്ത്, ജോർദാൻ, ഇന്ത്യ, കാനഡ, ബ്രിട്ടന്‍, ഫ്രാന്‍സ്, ദക്ഷിണ ആഫ്രിക്ക,ചൈന, റഷ്യ, ഇറാന്‍,ഭൂട്ടാന്‍, മാലിദ്വീപ്, ഇന്തോനേഷ്യ, മലേഷ്യ, സിംഗപ്പൂര്‍,തുടങ്ങിയ രാജ്യങ്ങള്‍ പട്ടികയിലുണ്ട്.

Also Read: ജിസിസി ഉച്ചകോടിക്ക് നാളെ റിയാദില്‍ തുടക്കം; ഒരുക്കങ്ങൾ പൂർത്തിയായി

മിഡിൽ ഈസ്റ്റിലേക്ക് ലോകത്തിലെ ഏറ്റവും മികച്ച സേവനവും ലോകത്തെ മികച്ച ഫസ്റ്റ് ക്ലാസ് അനുഭവവും നൽകിയതിന് 2020 ലോക യാത്രാ അവാർഡുകൾ ഒമാൻ എയർ സ്വന്തമാക്കിയിരുന്നു. യാത്രക്കാര്‍ നല്‍കിയ വിവരങ്ങളെ അടിസ്ഥാനമാക്കി വിമാനക്കമ്പനികളെ റേറ്റ് ചെയ്യുന്ന അന്താരാഷ്ട്ര അംഗീകാരമുള്ള സംഘടനയായ അപെക്‌സിൽ നല്‍കിയ വിവരത്തിന്‍റെ അടിസ്ഥാനത്തിലാണ് അവാര്‍‍ഡുകള്‍ ലഭിച്ചത്. ഇതിന് പിന്നാലെയാണ് പുതിയ പ്രഖ്യാപനവുമായി ഒമാന്‍ എയര്‍ രംഗത്തെത്തിയിരിക്കുന്നത്. മസ്‌കറ്റിലേക്ക് പോകാൻ ആഗ്രഹിക്കുന്നവര്‍ സിവിൽ ഏവിയേഷൻ അതോറിറ്റി വെബ്‌സൈറ്റായ caa.gov.om സന്ദർശിച്ച് ആവശ്യമായ വിവരങ്ങള്‍ നല്‍കണം.ഒമാനിൽ നിന്ന് പുറപ്പെടുന്നവര്‍ omanair.com എന്ന വെബ് സൈറ്റില്‍ നല്‍കിയിട്ടുള്ള നിര്‍ദേശങ്ങള്‍ പാലിക്കണം.