റോഡ് മുറിച്ചു കടക്കുന്നതിനിടെ രണ്ടിടങ്ങളിലായി അപകടം; ഒമാനിൽ രണ്ടു മലയാളികൾ മരിച്ചു

ഒമാൻ: ഒമാനിൽ രണ്ടിടങ്ങളിൽ സംഭവിച്ച വാഹനങ്ങളിൽ രണ്ട് മലയാളികൾ മരിച്ചു. കാസർകോട് സ്വദേശികളാണ് മരിച്ച രണ്ട് പേരും. മസ്‌കത്തിലുണ്ടായ അപകടത്തിൽ കുമ്പള, ബത്തേരി റയില്‍വേ സ്റ്റേഷന് സമീപം താമസിക്കുന്ന മൊയ്തീന്‍ കുഞ്ഞി ആണ് മരിച്ചത്. 57 വയസ്സായിരുന്നു. കഴിഞ്ഞ തിങ്കളാഴ്ച രാത്രിയിലായിരുന്നു അപകടം സംഭവിച്ചത്. മൃതദേഹം മോര്‍ച്ചറിയില്‍ സൂക്ഷിച്ചിരിക്കുകയാണ്. അപകടം നടന്ന ശേഷം സഹപ്രവര്‍ത്തകര്‍ എത്തിയാണ് ആളെ തിരിച്ചറിഞ്ഞത്.

ഒരുപാട് കാലമായി ഒമാനില്‍ പ്രവാസിയായിരുന്നു. പരേതനായ പട്ടാമ്പി കുഞ്ഞഹമ്മദിന്റെ മകനാണ്. ഭാര്യ: റംല. മക്കള്‍: റാശിഥ്, റൈനാസ്. ഉദയ അബ്ദുര്‍റഹ്മാന്‍, ബീവി എന്നിവര്‍ സഹോദരങ്ങളാണ്.

Also Read: മുപ്പത്തഞ്ച് വർഷത്തെ പ്രവാസ ജീവിതം അവസാനിപ്പിച്ച് നാട്ടിലേക്ക് പോകാൻ മടങ്ങാൻ ടിക്കറ്റ് എടുത്തു, മലയാളി പ്രവാസി അബുദാബിയിൽ മരണപ്പെട്ടു

അതേസമയം, തിങ്കളാഴ്ച വൈകിട്ട് ബര്‍കയിലുണ്ടായ അപകടത്തില്‍ മരിച്ചതും മലയാളി ആയിരുന്നു. മഞ്ചേശ്വരം മജിബയിലെ നയിമുളി വീട്ടില്‍ മുഹമ്മദ് ഇസ്മയിൽ ആണ് മരണപ്പെട്ടത് .65 വയസായിരുന്നു. ഇദ്ദേഹം റോഡ് മുറിച്ചു കടക്കുന്നതിന് ഇടയിൽ വാഹനം വന്നു ഇടിക്കുകയായിരുന്നു.

പിതാവ്: മുഹമ്മദ് അബൂബക്കര്‍. മാതാവ്: ബീഫാത്തുമ്മ. ഭാര്യ: താഹിറ ബാനു. ഇസ്മയിലിന്റെ മൃതദേഹം റുസ്താഖ് ആശുപത്രിയില്‍ സൂക്ഷിച്ചിരിക്കുകയാണ്. മരിച്ച രണ്ട് മലയാളികളുടേയും മ‍ൃതദേഹം നാട്ടിലേക്ക് കൊണ്ടുവരാനുള്ള തയ്യാറെടുപ്പിലാണ്. നടപടിക്രമങ്ങൾ പൂർത്തിയാക്കിയ ശേഷം മ‍ൃതദേഹം നാട്ടിലേക്ക് കൊണ്ടുവരും.

Also Read: സന്ദര്‍ശക വിസയില്‍ എത്തുന്നവര്‍ നിബന്ധനകള്‍ പാലിക്കണം; മലയാളികള്‍ ഉള്‍പ്പെടെ നിരവധിപ്പേരെ വിമാനത്താവളത്തില്‍ നിന്നും തിരിച്ചയച്ചു

Read Latest Gulf News and Malayalam News