ഹോം ക്വാറന്റൈന്‍ വ്യവസ്ഥകള്‍ ലംഘിച്ചു; ദോഹയില്‍ യുവാവ് അറസ്റ്റില്‍

ദോഹ: കൊറോണ വ്യാപനത്തിന്‍റെ പശ്ചാത്തലത്തില്‍ ക്വാറന്റൈന്‍ വ്യവസ്ഥകള്‍ ലംഘിച്ച യുവാവിനെ ദോഹ പോലീസ് അറസ്റ്റ് ചെയ്തു. കൊവിഡ് പ്രതിരോധത്തിന്‍റെ ഭാഗമായി ഖത്തര്‍ അരോഗ്യ വിഭാഗം മുന്നോട്ടുവച്ച ക്വാറന്റൈന്‍ നിര്‍ദ്ദേശങ്ങള്‍ ലംഘിച്ചതിനാണ് അറസ്‌റ്റെന്നും ആരോഗ്യ നിയമങ്ങള്‍ പാലിക്കാന്‍ എല്ലാവര്‍ക്കും ബാധ്യതയുണ്ടെന്നും പോലിസ് വ്യക്തമാക്കി. മുഹമ്മദ് അബ്ദുല്‍റഹ്മാന്‍ മഹ്മൂദ് സയൂദ എന്ന യുവാവാണ് അറസ്റ്റിലായതെന്നും പോലിസ് പറഞ്ഞു.

ഇയാല്‍ പ്രൊസിക്യൂഷന്‍ നടപടികള്‍ നേരിടുകയാണ്. സ്വന്തം സുരക്ഷയും മറ്റുള്ളവരുടെയും സുരക്ഷയും പരിഗണിച്ചാണ് ആരോഗ്യ മന്ത്രാലയം ക്വാറന്റൈന്‍ നിര്‍ദ്ദേശങ്ങള്‍ പുറപ്പെടുവിച്ചിരിക്കുന്നതെന്നും അവ പാലിക്കാന്‍ സ്വദേശികളും വിദേശികളും ജാഗ്രത പുലര്‍ത്തണമെന്നും പോലിസ് പറഞ്ഞു.
2004ലെ പീനല്‍ കോഡ് 253ാം വകുപ്പ്, 1990ലെ പകര്‍ച്ചവ്യാധി തടയല്‍ നിയമം, 2002ലെ സൊസൈറ്റി പ്രൊട്ടക്ഷന്‍ ആക്ട് എന്നിവ പ്രകാരമാണ് ക്വാറന്റൈന്‍ വ്യവസ്ഥകള്‍ ലംഘിക്കുന്നവര്‍ക്കെതിരേ നടപടി സ്വീകരിക്കുക. തടവും പിഴയും ഉള്‍പ്പെട്ടതായിരിക്കും ഇത്തരം കുറ്റകൃത്യങ്ങള്‍ക്കുള്ള ശിക്ഷ.

Also Read: അവയവദാനത്തിലൂടെ അഞ്ചു പേര്‍ക്ക് പുതുജീവന്‍; ഒരേസമയം ശസ്ത്രക്രിയകള്‍ നടത്തി കിംഗ് ഫൈസല്‍ ആശുപത്രി

കൊവിഡ് വ്യാപനം തടയുന്നതിനായി കര്‍ശനമായ വ്യവസ്ഥകളാണ് ഖത്തര്‍ ഭരണകൂടം സ്വീകരിച്ചുവരുന്നത്. ഇതിന്റെ ഭാഗമായി രോഗവ്യാപനം ഒരു പരിധി വരെ തടഞ്ഞു നിര്‍ത്താനും സാധിച്ചിട്ടുണ്ട്. ലോകത്ത് കൊവിഡ് വ്യാപനത്തോത് കുറഞ്ഞ രാജ്യങ്ങളിലൊന്നാണ് ഖത്തര്‍.
നവംബര്‍ എട്ടിന് 190 പുതിയ പോസിറ്റീവ് കേസുകളാണ് ഖത്തറില്‍ റിപ്പോര്‍ട്ട് ചെയ്തിരിക്കുന്നത്. ഇവരില്‍ 151 പേര്‍ക്ക് സമ്പര്‍ക്കത്തിലൂടെയാണ് രോഗബാധ. 39 പേര്‍ രാജ്യത്തിന് പുറത്തുനിന്ന് എത്തിയവരാണ്. അതോസമയം, 201 പേര്‍ പുതുതായി രോഗമുക്തി നേടിയതായും ആരോഗ്യമന്ത്രാലയം അറിയിച്ചു. കഴിഞ്ഞ 24 മണിക്കൂറിനുള്ളില്‍ കൊവിഡ് ബാധ കാരണം ആശുപത്രി തീവ്ര പരിചരണ വിഭാഗത്തില്‍ പ്രവേശിപ്പിച്ചത് ഒരാളെ മാത്രമാണ്.

നിലവില്‍ 39 പോസിറ്റീവ് രോഗികളാണ് ഐസിയുവില്‍ കഴിയുന്നത്. രോഗം തടയുന്നതിന്റെ ഭാഗമായി വ്യാപകമായ പരിശോധനയും ഖത്തര്‍ ആരോഗ്യമന്ത്രാലയം നടത്തിവരുന്നുണ്ട്. പൊതുസ്ഥലങ്ങളില്‍ മാസ്‌ക് ധാരണം, സാമൂഹിക അകലം പാലിക്കല്‍, കൈകള്‍ സാനിറ്റൈസ് ചെയ്യല്‍ തുടങ്ങിയ പെരുമാറ്റച്ചട്ടങ്ങള്‍ കര്‍ശനമായി പാലിക്കുന്നത് തുടരണമെന്നും ആരോഗ്യമന്ത്രാലയം വ്യക്തമാക്കി.