കേസ് ഫ്‌ളോറിഡ കോടതിയില്‍
Photo Credit: twitter
വാഷിംഗ്ടണ്‍ കേന്ദ്രമായി പ്രവര്‍ത്തിക്കുന്ന ദി ഹില്‍ വാര്‍ത്താ വെബ്‌സൈറ്റാണ് ഇക്കാര്യം പുറത്തുവിട്ടത്. ഫ്‌ളോറിഡ കോടതിയിലാണ് ഗദ കേസ് നല്‍കിയിരിക്കുന്നത്. സൗദി, യുഎഇ, അമേരിക്ക എന്നിവിടങ്ങളിലെ ചില ഗ്രൂപ്പുകളെ ഉപയോഗപ്പെടുത്തിയാണ് തനിക്കെതിരേ രണ്ട് കിരീടാവകാശികളും ചേര്‍ന്ന് വ്യാജപ്രചാരണങ്ങള്‍ നടത്തുന്നതെന്നും അവര്‍ കുറ്റപ്പെടുത്തി. ഫ്‌ളോറിഡയിലെ ഷാരോണ്‍ കൊളിന്‍സ്, ഹുസ്സാം അല്‍ ജുന്തി എന്നിവരാണ് കിരീടാവകാശികള്‍ക്കു വേണ്ടി തനിക്കെതിരേ പ്രചാരണത്തിന് നേതൃത്വം നല്‍കുന്നതെന്നും ഗദ വ്യക്തമാക്കി.
കിരീടാവകാശികളെ വിമര്‍ശിച്ചതിന് പ്രതികാരം
Photo Credit: twitter
തന്റെ ഫോണില്‍ നിന്ന് ചോര്‍ത്തിയ വിവരങ്ങളെന്ന വ്യാജേന തനിക്കെതിരേ ഇല്ലാത്ത പ്രചാരണങ്ങള്‍ അഴിച്ചുവിടുകയാണെന്നും തനിക്കെതിരായ ഗൂഢാലോചനയുടെ ഭാഗമായാണിതെന്നും അവര്‍ കുറ്റപ്പെടുത്തി. സൗദി, യുഎഇ സര്‍ക്കാരുകളെ വിമര്‍ശിച്ചുകൊണ്ടുള്ള ഗദയുടെ വാര്‍ത്താ പരിപാടികള്‍ക്കെതിരായ പകപോക്കല്‍ നടപടിയുടെ ഭാഗമായാണ് അവരെ സ്വഭാവഹത്യ നടത്താനും മാധ്യമപ്രവര്‍ത്തന രംഗത്ത് നിന്ന് നിഷ്‌ക്കാസനം ചെയ്യാനുമുള്ള നടപടികളെന്ന് കേസ് വാദിക്കുന്ന ഡാന്‍ റാഷ്‌ബോം കോടതിയില്‍ സമര്‍പ്പിച്ച പരാതിയില്‍ വ്യക്തമാക്കി. 2018ല്‍ സൗദിയിലെ മുതിര്‍ന്ന മാധ്യമപ്രവര്‍ത്തകന്‍ ജമാല്‍ ഖഷോഗി കൊലചെയ്യപ്പെട്ടതുമായി ബന്ധപ്പെട്ട് അല്‍ജസീറ ടിവിയില്‍ ഗദ നല്‍കിയ റിപ്പോര്‍ട്ടുകളാണ് ഇരു കിരീടാവകാശികളെയും തന്റെ കക്ഷിക്കെതിരേ തിരിച്ചത്. ഇവര്‍ എന്തൊക്കെയാണ് ചെയ്തുകൂട്ടന്നതെന്ന് ലോകത്തെ അറിയിക്കുക കൂടിയാണ് ഈ നിയമനടപടിയിലൂടെ ലക്ഷ്യമിടുന്നതെന്നും അഭിഭാഷകന്‍ പറഞ്ഞു.
ഫോട്ടോ ചോര്‍ത്തി മോര്‍ഫ് ചെയ്തു
Photo Credit: twitter
താന്‍ നീന്തല്‍ വസ്ത്രത്തില്‍ നില്‍ക്കുന്ന പടം തന്റെ ഫോണ്‍ ഹാക്ക് ചെയ്ത് കൈക്കലാക്കിയ ഏജന്‍സികള്‍ അവ മോര്‍ഫ് ചെയ്ത് തന്റെ നഗ്ന ഫോട്ടോ എന്ന രീതിയില്‍ പ്രചരിപ്പിച്ചതായും ഗദ കുറ്റപ്പെടുത്തി. തന്റെ നഗ്ന ഫോട്ടോ എന്ന രീതിയില്‍ ട്വിറ്ററില്‍ പ്രത്യക്ഷപ്പെട്ട ഫോട്ടോ മണിക്കൂറുകള്‍ക്കുള്ളില്‍ അരലക്ഷത്തോളം പേരാണ് റീട്വീറ്റ് ചെയ്തത്. ഈ ട്വിറ്റര്‍ അക്കൗണ്ടുകളിലേറെയും സൗദി, യുഎഇ കിരീടാവകാശികളെ പിന്തുണയ്ക്കുന്നവയായിരുന്നുവെന്നും അവര്‍ പറഞ്ഞു.
മാധ്യമ പ്രവര്‍ത്തകര്‍ക്കുള്ള മുന്നറിയിപ്പ്
Photo Credit: twitter
തനിക്കെതിരേ ഉണ്ടായിക്കൊണ്ടിരിക്കുന്ന അപവാദ പ്രചാരണങ്ങള്‍, സൗദിയെയും യുഎഇയെയും വിമര്‍ശിക്കുന്ന മാധ്യമപ്രവര്‍ത്തകര്‍ക്കുള്ള കിരീടാവകാശികളുടെ മുന്നറിയിപ്പാണെന്നും ഗദ കുറ്റപ്പെടുത്തി. അതേസമയം, ഇത്തരം മാന്യതയില്ലാത്ത പ്രവര്‍ത്തികളെ ലോകത്തിനു മുന്നില്‍ തുറന്നുകാട്ടുമെന്നും അവയ്‌ക്കെതിരേ നിയമപരമായ പോരാട്ടം തുടരുമെന്നും അവര്‍ പറഞ്ഞു. അല്‍ ജസീറയിലെ മുതിര്‍ന്ന മാധ്യമപ്രവര്‍ത്തകയായ ഗദ ഉവൈസിന് പിന്തുണയുമായി നിരവധി മാധ്യമ-മനുഷ്യാവകാശ പ്രവര്‍ത്തകര്‍ രംഗത്തെത്തിയിട്ടുണ്ട്.