ആപ്പ്ജില്ല

കൊവിഡ് വ്യാപനം; ഖത്തറിലെ സ്വകാര്യ ക്ലിനിക്കുകളില്‍ നാളെ മുതല്‍ എമര്‍ജന്‍സി സേവനങ്ങള്‍ മാത്രം

ഖത്തര്‍ നാഷനല്‍ കണ്‍വെന്‍ഷന്‍ സെന്ററില്‍ നിന്ന് കൊവിഡ് വാക്‌സിന്‍ എടുക്കാന്‍ മുന്‍കൂര്‍ അനുമതി വേണമെന്ന് പൊതുജനാരോഗ്യ മന്ത്രാലയം അറിയിച്ചു.

Samayam Malayalam 1 Apr 2021, 9:07 am
ദോഹ: ഖത്തറിലെ സ്വകാര്യ ക്ലിനിക്കുകളില്‍ ഏപ്രില്‍ രണ്ട് വെള്ളിയാഴ്ച മുതല്‍ അടിയന്തര സേവനങ്ങള്‍ ഒഴികെയുള്ള മുഴുവന്‍ സര്‍വീസുകളും നിര്‍ത്തിവയ്ക്കാന്‍ തീരുമാനം. പ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഖാലിദ് ബിന്‍ അബ്ദുല്‍ അസീസ് അല്‍താനിയുടെ അധ്യക്ഷതയില്‍ ചേര്‍ന്ന മന്ത്രിസഭാ യോഗമാണ് ഇതുമായി ബന്ഘപ്പെട്ട തീരുമാനം കൈക്കൊണ്ടത്. രാജ്യത്ത് നിലനില്‍ക്കുന്ന കൊവിഡ് സാഹചര്യം വിലയിരുത്തിയ ശേഷം പ്രതിരോധ നടപടികള്‍ ശക്തിപ്പെടുത്തുന്നതിന്റെ ഭാഗമായാണ് തീരുമാനം. അടിയന്തര സേവനങ്ങള്‍ക്കു പുറമേയുള്ള ചില സേവനങ്ങള്‍ ഓണ്‍ലൈന്‍ വഴി നല്‍കാനും മന്ത്രിസഭ അനുമതി നല്‍കി. ആളുകള്‍ കൂടുതലായി ക്ലിനിക്കുകളില്‍ എത്തിച്ചേരുന്നത് കൊവിഡ് വ്യാപനം രൂക്ഷമാക്കാന്‍ ഇടവരുത്തുന്നതായുള്ള വിലയിരുത്തലിന്റെ അടിസ്ഥാനത്തിലാണിത്. കൊവിഡ് വ്യാപനം രൂക്ഷമായ സാഹചര്യത്തില്‍ രാജ്യത്ത് കൈക്കൊണ്ടിട്ടുള്ള പ്രതിരോധ നടപടികളെ കുറിച്ച് ആരോഗ്യ മന്ത്രി കാബനറ്റ് യോഗത്തില്‍ വിശദീകരിച്ചു.
Samayam Malayalam emergency services only from tomorrow at private clinics in qatar
കൊവിഡ് വ്യാപനം; ഖത്തറിലെ സ്വകാര്യ ക്ലിനിക്കുകളില്‍ നാളെ മുതല്‍ എമര്‍ജന്‍സി സേവനങ്ങള്‍ മാത്രം



​പുതുതായി 780 പേര്‍ക്ക് കൂടി കൊവിഡ് ബാധ


അതിനിടെ, ഖത്തറില്‍ 780 പേര്‍ക്കു കൂടി കൊവിഡ് ബാധ സ്ഥിരീകരിച്ചു. 662 പേര്‍ക്ക് സമ്പര്‍ക്കത്തിലൂടെയാണ് രോഗബാധയുണ്ടായത്. യാത്രക്കാര്‍ 118 പേര്‍. ഇതോടെ നിലവില്‍ രാജ്യത്ത് രോഗബാധയെ തുടര്‍ന്ന് ചികില്‍സയില്‍ കഴിയുന്നവരുടെ എണ്ണം 15,552 ആയി. ബുധനാഴ്ച 239 പേരെയാണ് ആശുപത്രിയില്‍ പ്രവേശിപ്പിച്ചത്. ഇതോടെ കൊവിഡ് ബാധിച്ച് വിവിധ ആശുപത്രികളില്‍ കഴിയുന്നവരുടെ എണ്ണം 1668 ആയി ഉയര്‍ന്നു. ഇന്നലെ രണ്ടുപേര്‍ കൂടി കോവിഡ് ബാധിച്ചു മരിച്ചതോടെ രാജ്യത്ത് ആകെ മരണം 291 ആയി. ഖത്തറില്‍ ഇതുവരെ 179,964 പേര്‍ക്കാണ് കോവിഡ് സ്ഥിരീകരിച്ചത്. ഇതില്‍ 164,121 പേര്‍ രോഗമുക്തി നേടി.

​ക്യുഎന്‍സിസിയില്‍ വാക്ക്-ഇന്‍ വാക്‌സിനേഷന്‍ ഇല്ല


ഖത്തര്‍ നാഷനല്‍ കണ്‍വെന്‍ഷന്‍ സെന്ററില്‍ നിന്ന് കൊവിഡ് വാക്‌സിന്‍ എടുക്കാന്‍ മുന്‍കൂര്‍ അനുമതി വേണമെന്ന് പൊതുജനാരോഗ്യ മന്ത്രാലയം അറിയിച്ചു. അധികൃതരില്‍ നിന്ന് അപ്പോയിന്‍മെന്റ് എടുക്കാതെ നേരിട്ട് വന്ന് വാക്‌സിനെടുക്കുന്നത് അനുവദിക്കില്ല. ഇങ്ങനെ ഒരു പാട് ആളുകള്‍ ഒന്നിച്ചെത്തുന്നത് തിരക്ക് കൂടാന്‍ കൊവിഡ് വ്യാപനത്തിനും ഇടവരുത്തുമെന്ന ആശങ്ക ഉയര്‍ന്ന പശ്ചാത്തലത്തിലാണ് തീരുമാനം. ഇനി മുതല്‍ വാക്‌സിനെടുക്കുന്നതിനുള്ള ദിവസവും സമയവും ലഭിക്കുന്നവര്‍ മാത്രമേ കണ്‍വെന്‍ഷന്‍ സെന്ററില്‍ വരാവൂ എന്നും ആരോഗ്യമന്ത്രാലയം ട്വീറ്റ് ചെയ്തു.

ആര്‍ട്ടിക്കിള്‍ ഷോ