ഖത്തര്‍ ലോക കപ്പിന്റെ ഭാഗ്യ ചിഹ്നം; പ്രകാശനം ഫെബ്രുവരിയില്‍

ദോഹ: അറബ് ലോകത്ത് ആദ്യമായി വിരുന്നെത്തുന്ന ഫിഫ ലോകകപ്പിന്റെ ഭാഗ്യ ചിഹ്നം അണിയറയില്‍ തയ്യാറായതായി ഖത്തര്‍ അധികൃതര്‍. 2022ല്‍ ഖത്തറില്‍ നടക്കുന്ന ലോക കപ്പ് ഭാഗ്യ ചിഹ്നം 2021 ഫെബ്രുവരിയിലാണ് പ്രകാശനം ചെയ്യുക. ഖത്തര്‍ നാഷണല്‍ ടൂറിസം കൗണ്‍സിലിന്റെ ഖത്തര്‍ കലണ്ടര്‍ 2021ലാണ് ലോക കപ്പ് ഭാഗ്യ ചിഹ്നം ഫെബ്രുവരിയില്‍ പ്രകാശനം ചെയ്യുമെന്ന് അറിയിച്ചിരിക്കുന്നത്.

സ്റ്റേഡിയം നിര്‍മാണത്തിലും മറ്റും അറബ് ലോകത്തിന്റെയും ഖത്തറിന്റെയും പാരമ്പര്യ സവിശേഷതകള്‍ ഉയര്‍ത്തിക്കാട്ടിയ ഖത്തര്‍ ഭാഗ്യചിഹ്നത്തില്‍ എന്തായിരിക്കും ഒളിപ്പിച്ച് വച്ചിട്ടുള്ളത് എന്ന കൗതുകത്തിലാണ് കായിക ലോകം.

Also Read: ബഹ്‌റൈനിലെ ന്യൂ ഇയര്‍ ആഘോഷം: നിര്‍ദ്ദേശങ്ങള്‍ ലംഘിച്ചാല്‍ പിഴ 20 ലക്ഷം രൂപ!


പൊതുവേ ടൂര്‍ണമെന്റ് നടക്കുന്ന രാജ്യത്തെ സവിശേഷതകള്‍ ഉള്‍ക്കൊള്ളുന്നതായിരിക്കും ഭാഗ്യ ചിഹ്നം. 2018ല്‍ റഷ്യന്‍ ലോക കപ്പിന്റെ ഭാഗ്യ ചിഹ്നം സബിവാക എന്ന ചെന്നായ ആയിരുന്നു. 2014ല്‍ ബ്രസീല്‍ ലോക കപ്പ് നടന്നപ്പോള്‍ ഭാഗ്യ ചിഹ്നമായത് ഫുലേകോ എന്ന ബ്രസീലിയന്‍ ഉറുമ്പു തീനിയും.

2022ലെ ലോകകപ്പിന്റെ ഒരു വര്‍ഷത്തെ കൗണ്ട്ഡൗണ്‍ നവംബറില്‍ നടക്കുമെന്നും ഖത്തര്‍ ടൂറിസം കൗണ്‍സില്‍ കലണ്ടറില്‍ പറയുന്നു. ലോകകപ്പിനുള്ള റാസ് അബു അബൂദ് സ്റ്റേഡിയം, അല്‍ തുമാമ സ്റ്റേഡിയം എന്നിവ 2021 മെയ് മാസത്തിലും ലുസൈല്‍ സ്റ്റേഡിയം 2021 ഡിസംബറിലും സജ്ജമാക്കുമെന്നും അധികൃതര്‍ വ്യക്തമാക്കി. ലോകകപ്പ് ഫൈനല്‍ മല്‍സരത്തിന് വേദിയാവുന്ന 80,000 പേരെ ഉള്‍ക്കൊള്ളുന്ന ലുസൈല്‍ സ്റ്റേഡിയം 2021 ഡിസംബറോടെ സജ്ജമാകും.