മാസ്‌ക്ക് ഒഴിവാക്കാന്‍ പാടില്ലാത്തവര്‍ ആരൊക്കെ?
എന്നാല്‍ ആശുപത്രികള്‍ ഉള്‍പ്പെടെയുള്ള ആരോഗ്യ സംവിധാനങ്ങള്‍ക്ക് അകത്തും പൊതുഗതാഗത സംവിധാനങ്ങളിലും മാസ്‌ക് ധരിക്കണമെന്ന് നിബന്ധന തുടരുമെന്ന് മന്ത്രി സഭാ യോഗം അറിയിച്ചു. ആരോഗ്യ സ്ഥാപനങ്ങളിലെ സന്ദര്‍ശകര്‍ക്കും ജീവനക്കാര്‍ക്കും ഇത് ബാധകമാണ്. അതേപോലെ, അടച്ചിട്ട സ്ഥലങ്ങളില്‍ ഉപഭോക്താക്കളുമായി മുഖാമുഖം ഇടപെടേണ്ടി വരുന്ന വ്യാപാര സ്ഥാപനങ്ങളിലെ ജീവനക്കാരും തൊഴിലാളികളും അവരുടെ ജോലി സമയത്ത് മാസ്‌ക് ധരിക്കണമെന്നും കാബിനറ്റ് വ്യക്തമാക്കി.
കോവിഡ് നിരക്കുകള്‍ കുറഞ്ഞു
ഖത്തറില്‍ ഇത് രണ്ടാം തവണയാണ് മാസ്‌ക്ക് ധരിക്കണമെന്ന നിബന്ധന ഒഴിവാക്കുന്നത്. രാജ്യത്ത് കോവിഡ് സ്ഥിതിഗതികള്‍ മെച്ചപ്പെടുകയും നിയന്ത്രണങ്ങള്‍ ക്രമേണ നീക്കുകയും ചെയ്യുന്നതിന്റെ ഭാഗമായി മെയ് 18 ന് മാസ്‌ക്ക് ഒഴിവാക്കാന്‍ മന്ത്രിസഭ അനുമതി നല്‍കിയിരുന്നു. എന്നാല്‍ കൊവിഡ് കേസുകള്‍ വീണ്ടും വര്‍ദ്ധിച്ച സാഹചര്യത്തില്‍ ജൂലൈ ആദ്യത്തോടെ വീണ്ടും മാസ്‌ക് നിര്‍ബന്ധമാക്കുകയായിരുന്നു. ക്രമേണ കൊവിഡ് നിരക്ക് കുറഞ്ഞതിനെ തുടര്‍ന്ന് തുറസ്സായ സ്ഥലങ്ങളില്‍ മാസ്‌ക്ക് ഒഴിവാക്കുകയും അടച്ചിട്ട ഇടങ്ങളില്‍ നിബന്ധന തുടരുകയുമായിരുന്നു. നിലവില്‍ കഴിഞ്ഞ ഒരാഴ്ചയായി പുതിയ കോവിഡ് കേസുകള്‍ വലിയ തോതില്‍ കുറഞ്ഞുവരികയാണ്.
ഇളവ് സ്‌കൂളുകള്‍ക്കും ബാധകം
പുതിയ മന്ത്രിസഭാ തീരുമാനത്തിന്റെ പശ്ചാത്തലത്തില്‍ രാജ്യത്തെ സ്‌കൂളുകളിലും മാസ്‌ക്ക് ധരിക്കേണ്ടതില്ലെന്ന് വിദ്യാഭ്യാസ മന്ത്രാലയം അറിയിച്ചു. പൊതു വിദ്യാലയങ്ങള്‍ക്കെന്ന പോലും സ്വകാര്യ സ്‌കൂളുകള്‍ക്കും ഈ ഇളവ് അനുവദിക്കും. ഇന്നു മുതല്‍ ഇളവ് നിലവില്‍ വരും. കിന്റര്‍ഗാര്‍ട്ടന്‍ മുതലുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും ഇളവ് ബാധകമാണ്. ക്ലാസ്സിനകത്തും പുറത്തും വിദ്യാര്‍ഥികളും ജീവനക്കാരും ഉള്‍പ്പെടെ ആരും മാസ്‌ക്ക് ധരിക്കേണ്ടതില്ലെന്നും മന്ത്രാലയം അറിയിച്ചു.