ഖത്തര്‍ എയര്‍വെയ്‌സിന്‍റെ പേരിലും തട്ടിപ്പ്; വ്യാജ തൊഴില്‍ ഓഫറുകള്‍ക്കെതിരെ ജാഗ്രത വേണം

ഖത്തര്‍ എയര്‍വെയ്‌സില്‍ നിന്നോ അതിന്റെ സബ്‌സിഡിയറി സ്ഥാപനങ്ങളില്‍ നിന്നോ എന്ന വ്യാജേനയാണ് തൊഴിലന്വേഷകര്‍ക്ക് ഇ-മെയിലായും മറ്റും അറിയിപ്പുകള്‍ ലഭിക്കുന്നത്. ഈ രീതിയിലുള്ള പരസ്യങ്ങളും സാമൂഹ്യമാധ്യമങ്ങളില്‍ ഉള്‍പ്പെടെ പ്രത്യക്ഷപ്പെട്ടിട്ടുണ്ട്. ഇത്തരം വ്യാജ റിക്രൂട്ട്‌മെന്റ് ഏജന്‍സികള്‍ ഖത്തര്‍ എയര്‍വെയ്‌സിന്റേതെന്ന് തോന്നിപ്പിക്കുന്ന വ്യാജ ഡൊമെയിനുകളില്‍ നിന്നാണ് സന്ദേശങ്ങള്‍ അയക്കുന്നത്. സ്വകാര്യ വിവരങ്ങളും ചില കേസുകളില്‍ പണവും ആവശ്യപ്പെട്ടുകൊണ്ട് ഇത്തരം സന്ദേശങ്ങള്‍ പലര്‍ക്കും ലഭിച്ചതായി ഖത്തര്‍ എയര്‍വെയ്‌സ് അറിയിച്ചു.

മറ്റു പല സ്ഥാപനങ്ങളുടെ പേരിലും ഇത്തരം തട്ടിപ്പുകള്‍ നടക്കുന്നതായി റിപ്പോര്‍ട്ടുകളുണ്ടെന്നും പണം കൈക്കലാക്കാനുള്ള ഇത്തരം തന്ത്രങ്ങളില്‍ വഞ്ചിതരാവരുതെന്നും ഖത്തര്‍ എയര്‍വെയ്‌സ് മുന്നറിയിപ്പ് നല്‍കി. തൊഴില്‍ വാഗ്ദാനങ്ങളുമായി വരുന്ന ഇ മെയിലുകളുടെ ആധികാരികത പരിശോധിച്ച ശേഷം മാത്രമേ തുടര്‍നടപടികളിലേക്ക് കടക്കാവൂ. ഖത്തര്‍ എയര്‍വെയ്‌സ് തൊഴിലാളികളെ റിക്രൂട്ട് ചെയ്യുമ്പോള്‍ അവരില്‍ നിന്ന് പണം ആവശ്യപ്പെടാറില്ലെന്നും അധികൃതര്‍ വ്യക്തമാക്കി.

@qatarairways.com.qa, @qatarairways.com എന്നീ ഡൊമെയ്‌നുകളില്‍ നിന്ന് മാത്രമേ ഖത്തര്‍ എയര്‍വെയ്‌സ് ഇമെയില്‍ സന്ദേശങ്ങള്‍ അയക്കുകയുള്ളൂ. കമ്പനിയുടെ ഔദ്യോഗിക വെബ്‌സൈറ്റിലും സോഷ്യല്‍ മീഡിയ ചാനലുകളിലും തൊഴിലവസരങ്ങള്‍ പ്രസിദ്ധീകരിക്കുമെന്നും അധികൃതര്‍ അറിയിച്ചു. ഖത്തര്‍ എയര്‍വെയ്‌സിന്റെ പേരില്‍ ഇത്തരം തട്ടിപ്പുകള്‍ നടക്കുന്നതായി ശ്രദ്ധയില്‍പ്പെട്ടാല്‍ ഉടന്‍ തന്നെ reportfraud@qatarairways.com.qaലേക്ക് അറിയിക്കണമെന്നും അധികൃതര്‍ നിര്‍ദ്ദേശിച്ചു. ഖത്തര്‍ എയര്‍വെയ്‌സിലെ ഒഴിവുകള്‍ https://careers.qatarairways.comല്‍ ലഭിക്കും.