കെയ്റോ, അലക്സാണ്ട്രിയ സര്വീസുകള്
ഈജിപ്ത് എയര് ഖത്തറിലേക്ക് പ്രതിദിന സര്വീസുകള് നടത്തും. കെയ്റോയില് നിന്നും ദിവസേനയും അലക്സാണ്ട്രിയയില് നിന്നും ആഴ്ചയില് നാലു തവണയും സര്വീസ് നടത്തുമെന്ന് എയര്ലൈന് തലവന് റുഷ്ദി സക്കരിയ്യ അറിയിച്ചു. യാത്രക്കാര് കൂടുന്നതിനനുസരിച്ച് സര്വീസുകളുടെ എണ്ണം വര്ധിപ്പിക്കും. ഇരു രാജ്യങ്ങളിലെയും വ്യോമയാന മന്ത്രാലയങ്ങളില് നിന്ന് ആവശ്യമായ അനുമതികള് ലഭിച്ചു കഴിഞ്ഞാലുടന് സര്വീസുകളുടെ ഷെഡ്യൂള് തീരുമാനിക്കുമെന്നും അദ്ദേഹം കൂട്ടിച്ചര്ത്തു.
ഖത്തറില് നിന്നുള്ള യാത്രാവിമാനം 25 മുതല്
ഖത്തറില് നിന്ന് യാത്രക്കാരെയും വഹിച്ചുള്ള ആദ്യ വിമാനം ജനുവരി 25ന് സര്വീസ് നടത്തുമെന്ന് ഖത്തര് എയര്വെയ്സ് അറിയിച്ചു. കെയ്റോയിലേക്കുള്ള ആദ്യ വിമാനത്തിനുള്ള ടിക്കറ്റ് ബുക്കിംഗ് ഇതിനകം ആരംഭിച്ചുകഴിഞ്ഞു. ദോഹയിലെ ഹമദ് അന്താരാഷ്ട്ര വിമാനത്താവളത്തില് നിന്ന് വൈകിട്ട് 3.30ന് പുറപ്പെടുന്ന വിമാനം 5.55ഓടെ കെയ്റോ അന്താരാഷ്ട്ര വിമാനത്തിലെത്തിച്ചേരും. ഇരുരാജ്യങ്ങള്ക്കുമിടയിലെ ചരക്ക് ഗതാഗതവും താമസിയാതെ ആരംഭിക്കുമെന്നും ഖത്തര് എയര്വെയ്സ് അറിയിച്ചു.
ഖത്തര് ഹാന്ഡ്ബോള് ടീം ഇന്നെത്തും
അതിനിടെ, ഉപരോധം പിന്വലിച്ചതിനു ശേഷം ഖത്തറില് നിന്ന് ഈജിപ്തിലേക്കുള്ള ആദ്യ വിമാനം ഇന്ന് (വ്യാഴാഴ്ച) യാത്ര തിരിക്കുമെന്നും റിപ്പോര്ട്ടുണ്ട്. ഈജിപ്തില് നടക്കുന്ന ഹാന്ഡ്ബോള് ടൂര്ണമെന്റില് പങ്കുടുക്കുന്നതിനുള്ള ഖത്തര് ടീമിനെയും വഹിച്ചുള്ള വിവാനമാണ് ഇവിടെ ആദ്യം ഇറങ്ങുക. ഖത്തര് എയര്വെയ്സ് ഓഫീസ് പ്രവര്ത്തിക്കുന്ന കെയ്റോ എയര്പോര്ട്ടിലായിരിക്കും വിമാനമിറങ്ങുകയെന്നാണ് ഈജിപ്ത് മാധ്യമങ്ങള് റിപ്പോര്ട്ട് ചെയ്തത്.
മൂന്നര വര്ഷത്തെ ഉപരോധത്തിനു ശേഷം
ഇക്കഴിഞ്ഞ ചൊവ്വാഴ്ചയാണ് ഈജിപ്ത് ഖത്തറിനു മേലുള്ള വ്യോമവിലക്ക് നീക്കിയത്. സൗദി അറേബ്യയില് നടന്ന ഗള്ഫ് സഹകരണ കൗണ്സില് ഉച്ചകോടിയില് ഒപ്പുവച്ച അല് ഉല കരാറിന്റെ അടിസ്ഥാനത്തില് ഖത്തറിനെതിരേ 2017ല് പ്രഖ്യാപിച്ച ഉപരോധം അവസാനിപ്പിക്കുകുയം ഉപരോധ രാജ്യങ്ങള്ക്കും ഖത്തറിനുമിടയിലെ വ്യോമഗതാഗതം പുനസ്ഥാപിക്കാന് തീരുമാനിക്കുകയുമായിരുന്നു. സൗദി അറേബ്യുയും യുഎഇയും ബഹ്റൈനും ഇതിനകം ഖത്തറിന് വ്യോമാതിര്ത്തികള് തുറന്നുനല്കിയിരുന്നു.