ലോകത്തിലെ സുരക്ഷിത രാജ്യം
Photo Credit:pixabay
2020ലെ നമ്പിയോ ക്രൈം ഇന്‍ഡക്‌സ് പ്രകാരം ലോകത്തിലെ ഏറ്റവും സുരക്ഷിതമായ രാജ്യമാണ് ഖത്തര്‍. 133 രാജ്യങ്ങളിലെ ജീവിത സുരക്ഷയെ കുറിച്ച് നടത്തിയ സര്‍വേയാണ് ഖത്തര്‍ മുന്നിലെത്തിയത്.
ശക്തമായ സാമ്പത്തിക രംഗം
Photo Credit:pixabay
ഖത്തറിന്റെ സാമ്പത്തിക സ്ഥിതി തികച്ചും ഭദ്രമാണ്. ലോകത്തെ ഏറ്റവും പ്രധാനപ്പെട്ട എണ്ണ, പ്രകൃതിവാതക ഉല്‍പ്പാദക രാജ്യങ്ങളിലൊന്നാണ് ഖത്തര്‍. ഇവയുടെ വന്‍ കരുതല്‍ ശേഖരമുള്ള ഖത്തര്‍ പ്രതിശീര്‍ഷ വരുമാനത്തിന്റെ കാര്യത്തില്‍ ലോകത്തിലെ മുന്‍നിര രാജ്യങ്ങളിലൊന്നാണ്.
ലോകോത്തര എയര്‍ലൈന്‍
Photo Credit: pixabay
ലോകത്തിലെ ഏറ്റവും മികച്ച എയര്‍ലൈനുകളിലൊന്നാണ് ഖത്തറിന്റെ ഔദ്യോഗിക വിമാനക്കമ്പനിയായ ഖത്തര്‍ എയര്‍വെയ്‌സ്. ലോകത്തെ ഏറ്റവും മികച്ച എയര്‍ലൈനിലുള്ള സ്‌കൈട്രാക്‌സ് എയര്‍ലൈന്‍ അവാര്‍ഡിന് അഞ്ചാം തവണയാണ് ഖത്തര്‍ അര്‍ഹയാകുന്നത്. 2019ലെ പ്രസിദ്ധമായ പാരിസ് എയര്‍ഷോയിലും ഖത്തര്‍ എയര്‍വെയ്‌സ് തന്നെയായിരുന്നു മുന്നില്‍. ആറ് ഭൂഖണ്ഡങ്ങളിലേക്കും ഖത്തര്‍ എയര്‍വെയ്‌സ് സര്‍വീസ് നടത്തുന്നുണ്ട്.
മിഡിലീസ്റ്റിലെ മികച്ച എയര്‍പോര്‍ട്ട്
Photo Credit: Qatar News Agency
ദോഹയിലെ ഹമദ് ഇന്റര്‍നാഷനല്‍ എയര്‍പോര്‍ട്ട് മിഡിലീസ്റ്റിലെ ഏറ്റവും മികച്ച വിമാനത്താവളമായാണ് പരിഗണിക്കപ്പെടുന്നത്. ആര്‍ക്കിട്ടെക്ചറല്‍ ഡിസൈനിന്റെ കാര്യത്തിലും ആഢംബരപൂര്‍ണമായ സൗകര്യത്തിന്റെ കാര്യത്തിലും ഇതിനെ വെല്ലാന്‍ മിഡിലീസ്റ്റില്‍ മറ്റൊരു എയര്‍പോര്‍ട്ടുമില്ല. 2020ലെ സ്‌കൈട്രാക്‌സ് വേള്‍ഡ് എയര്‍പോര്‍ട്ട് അവാര്‍ഡിന് തുടര്‍ച്ചയായ ആറാം തവണയാണ് ഹമദ് അന്താരാഷ്ട്ര വിമാനത്താവളം അര്‍ഹമാകുന്നത്. ഇതിനു പുറമെ മികച്ച സേവനത്തിന്റെ കാര്യത്തിലുള്ള സ്‌കൈട്രാക്‌സ് അവാര്‍ഡും ഈ എയര്‍പോര്‍ട്ടിന് സ്വന്തം. ലോകത്തെ 550 വിമാനത്താവളങ്ങളില്‍ നിന്ന് ഏറ്റവും മികച്ച മൂന്നാമത്തെ എയര്‍പോര്‍ട്ടായി 2020ല്‍ തെരഞ്ഞെടുക്കപ്പെട്ടതും ഇതുതന്നെ.
80 രാജ്യങ്ങള്‍ക്ക് വിസ വേണ്ട
Photo Credit: pixabay
80 രാജ്യങ്ങളില്‍ നിന്നുള്ള പൗരന്‍മാര്‍ക്ക് വിസയില്ലാതെ ഖത്തറിലേക്ക് വരാമെന്നുള്ളതാണ് ഈ രാജ്യത്തിന്റെ മറ്റൊരു സവിശേഷത. ഈ രാജ്യങ്ങളില്‍ നിന്നുള്ളവര്‍ക്ക് ഓണ്‍ അറൈവല്‍ വിസ സംവിധാനം ഖത്തര്‍ ഏര്‍പ്പെടുത്തിയിട്ടുണ്ട്. അതേസമയം കൊറോണ വ്യാപനത്തിന്റെ പശ്ചാത്തലത്തില്‍ ചില രാജ്യങ്ങളില്‍ നിന്നുള്ളവര്‍ക്ക് താല്‍ക്കാലികമായി ഈ സേവനം നിര്‍ത്തലാക്കിയിട്ടുണ്ട്.
2022ലെ ഫിഫ ലോകകപ്പ്
Photo Credit: pixabay
2022ലെ ഫിഫ ലോകകപ്പിന് ആതിഥ്യം നല്‍കുന്നത് ഖത്തറാണ്. അതിനുള്ള തകൃതിയായ ഒരുക്കങ്ങളിലാണ് ഏതാനും വര്‍ഷങ്ങളായി ഖത്തര്‍. 60,000 പേര്‍ക്ക് ഇരിപ്പിട സൗകര്യമുള്ള അല്‍ ബൈത്ത് സ്റ്റേഡിയം ലോകത്തിന്റെ നാനാഭാഗങ്ങളില്‍ നിന്നുള്ള ഫുട്‌ബോള്‍ പ്രേമികളെ വരവേല്‍ക്കാന്‍ പൂര്‍ണസജ്ജമായിക്കഴിഞ്ഞു. 2022 നവംബര്‍ 21നാണ് ആദ്യമല്‍സരം.
ആകര്‍ഷകമായ കാലാവസ്ഥ
Photo Credit: pixabay
മരുഭൂമി കാലാവസ്ഥയാണ് ഖത്തറിലേതെങ്കിലും തണുപ്പുകാലത്ത് ഖത്തറിലെ ജീവിതം ആനന്ദകരമാണ്. വേനല്‍ക്കാലത്ത് മാത്രമേ പുറത്തിറങ്ങി നടക്കുമ്പോള്‍ ശ്രദ്ധിക്കേണ്ടതുള്ളൂ. വര്‍ഷം മുഴുവന്‍ നല്ല രീതിയില്‍ സൂര്യപ്രകാശം ലഭിക്കുമെന്നതാണ് ഖത്തറിന്റെ കാലാവസ്ഥയുടെ സവിശേഷത
ഉയര്‍ന്ന പ്രദേശം
Photo Credit: pixabay
ഖത്തറിലെ ഏറ്റവും ഉയരത്തിലുള്ള പ്രദേശം ഖുറൈന്‍ അബൂ അല്‍ ബവല്‍ ആണ്. സമുദ്ര നിരപ്പില്‍ നിന്ന് 338 അടി ഉയരത്തിലാണ് ഈ പ്രദേശം. വടക്ക് സിക്‌റീത്ത് മുതല്‍ തെക്ക് ഉംബാബ് വരെ നീണ്ടു കിടക്കുന്ന ചുണ്ണാമ്പുകല്ലുകള്‍ നിറഞ്ഞ പ്രദേശമാണിത്.
മജ്ബൂസ് തീന്‍മേശയിലെ റാണി
Photo Credit: pixabay
പരമ്പരാഗത ഖത്തരി വിഭവങ്ങളുടെ സവിശേഷത അതിന്റെ ഇന്ത്യ-ഇറാന്‍ സ്വാധീനമാണ്. കബ്‌സ എന്നറിയപ്പെടുന്ന മജ്ബൂസാണ് ഇവിടത്തെ ദേശീയ വിഭവം. കുങ്കുമം, ഏലക്കായ തുടങ്ങിയ ചേര്‍ത്ത് അരി, മാംസം, പച്ചക്കറി എന്നി ഉപയോഗിച്ചാണ് ഇത് പാകം ചെയ്യുന്നത്. ഖത്തറിന്റെ സംസ്‌ക്കാരത്തിന്റെ ബാക്കിപ്പത്രമാണ് ഇവിടത്തെ പരമ്പരാഗത വിഭവങ്ങള്‍.
അറബിക്കാപ്പി അഥവാ ഖഹ്വ
Photo Credit:pixabay
ഖത്തറിന്റെ ആതിഥ്യമര്യാദകളുടെ അവിഭാജ്യ ഘടകമാണ് ഖഹ്വ എന്ന അറബി കാപ്പി. ദല്ല എന്നറിയപ്പെടുന്ന പിടിയില്ലാത്ത പരമ്പരാഗത കാപ്പിപ്പാത്രത്തില്‍ വിളമ്പുന്ന ഈ കാപ്പില്‍ നിറയെ ഖത്തറിന്റെ സ്‌നേഹമാണ്. ആഘോഷ നാളുകളിലെ വിരുന്നുകളിലുള്‍പ്പെടെ പ്രധാന താരമാണ് ഖഹ്വ.
കരാക്
Photo Credit: pixabay
ചായ ഇലകള്‍ക്കൊപ്പം ഇഞ്ചിയോ ഏലക്കായയോ ചേര്‍ത്ത് തിളപ്പിച്ച ശേഷം തളപ്പിച്ച പാല്‍ ചേര്‍ത്ത് തയ്യാറാക്കുന്ന കരാക് ഏത് സമയത്തും ഖത്തരികളുടെ ആവേശമാണ്. ഖത്തര്‍ പാരമ്പര്യത്തിന്റെ ഭാഗം കൂടിയാണ് കടുപ്പം കൂടിയ ഈ ചായ. കുടുംബ സമേതമുള്ള ഔട്ടിംഗുകള്‍ക്കിടയില്‍ കരാക് ഉണ്ടാക്കിക്കുടിക്കുന്നത് ഖത്തറിലെ ഒരു ശീലമാണ്.
സുഗന്ധമായി ബഖൂര്‍
ഖത്തറിന്റെ വൈകുന്നേരങ്ങളെ സുഗന്ധ പൂരിതമാക്കാന്‍ ഇവിടെ ബഖൂര്‍ ഉണ്ട്. ഊദും, ചന്ദനവും പോലുള്ള പ്രകൃതിദത്തമായ മരക്കഷ്ണങ്ങള്‍ മബ്ഖറയെന്ന ബര്‍ണറില്‍ പുകച്ചെടുക്കുന്നതാണ് ബഖൂര്‍. ബഖൂര്‍ പുകയ്ക്കാത്ത വീടുകളും കെട്ടിടങ്ങളും ഖത്തറില്‍ അപൂര്‍വമായിരിക്കും.
മൈലാഞ്ചി മൊഞ്ച്
Photo Credit:pixabay
ഖത്തരി ആഘോഷങ്ങളിലെ പ്രധാന ഇനമാണ് ഹെന്ന. പെരുന്നാളുകള്‍, വിവാഹങ്ങള്‍ തുടങ്ങിയ ആഘോഷ വേളകളില്‍ ഖത്തരി സ്ത്രീകളുടെ കൈകളും കാല്‍പാദങ്ങളിലും മൈലാഞ്ചിയിലൂടെ കവിതകള്‍ വിരിയും. നൂറ്റാണ്ടുകളോളം പഴക്കമുണ്ട് ഖത്തരികളുടെ മൈലാഞ്ചി മൊഞ്ചിന്.
ഒട്ടകങ്ങളുടെ ഓട്ടപ്പന്തയം
Photo Credit: pixabay
ഖത്തരി ശെയ്ഖുമാരുടെയും പ്രമാണിമാരുടെയും പ്രധാന വിനോദങ്ങളിലൊന്നാണ് പരമ്പരാഗത ഒട്ടകപ്പന്തയം. വടക്കന്‍ ദോഹയില്‍ അല്‍ ശഹാനിയ്യയിലെ പ്രൊഫഷനല്‍ റേസ് ട്രാക്കില്‍ വച്ച് നടക്കാറുള്ള ഒട്ടകയോട്ട മല്‍സരം ഖത്തറിന്റെ ആവേശങ്ങളിലൊന്നാണ്. സാധാരണ നവംബറിനും ഫെബ്രുവരിക്കുമിടയിലാണ് നിരവധി ദേശീയ- അന്തര്‍ദേശീയ മല്‍സരങ്ങള്‍ ഇവിടെ നടക്കാറ്.
മനം മയക്കുന്ന കടല്‍ത്തീരങ്ങല്‍
Photo Credit:pixabay
വിശാലമായി നീണ്ടുകിടക്കുന്ന ബീച്ചുകളാണ് ഖത്തറിന്റെ പ്രധാന സവിശേഷതകളിലൊന്ന്. 563 കിലോമീറ്റര്‍ നീണ്ടുകിടക്കുന്നതാണ് ഖത്തറിന്റെ കടല്‍ത്തീരം. ആളുകള്‍ക്ക് ഒത്തുകൂടാന്‍ ഇതിനേക്കാള്‍ നല്ല സ്ഥലങ്ങള്‍ വേറെയുണ്ടാവില്ല.