റിയാദ്: സൗദിയിലേക്ക് നിയമവിരുദ്ധമായ മാര്ഗത്തിലൂടെ ആളെ കടത്താന് ഏതെങ്കിലും രീതിയില് കൂട്ടുനില്ക്കുന്നവരെ കാത്തിരിക്കുന്നത് കടുത്ത ശിക്ഷ. 15 വര്ഷം വരെ തടവും 10 ലക്ഷം റിയാല് വരെ പിഴയും ഈടാക്കാവുന്ന കുറ്റമാണിതെന്ന് സൗദി പബ്ലിക് പ്രൊസിക്യൂഷന് മുന്നറിയിപ്പ് നല്കി.
അനധികൃത പ്രവേശനത്തിന് നേരിട്ട് സഹായങ്ങള് ചെയ്യുകയോ അവരുടെ യാത്രയ്ക്കോ താമസത്തിനോ മറ്റോ സൗകര്യങ്ങള് ഒരുക്കിക്കൊടുക്കുകയോ ചെയ്യുന്നതും ഈ നിയമത്തിന്റെ പരിധിയില് വരും. കുറ്റകൃത്യത്തിന്റെ ഗൗരവമനുസരിച്ച് അഞ്ച് വര്ഷം മുതല് 15 വര്ഷം വരെയായിരിക്കും തടവ്.
അനധികൃത മനുഷ്യക്കടത്തിന് ഉപയോഗിച്ച വാഹനവും ഇത്തം ആളുകളെ താമസിപ്പിക്കാന് ഉപയോഗിച്ച കെട്ടിടവും അധികൃതര് പിടിച്ചെടുക്കുകയും ചെയ്യും. വാഹനവും കെട്ടിടവും മറ്റൊരാളുടെ ഉമസ്ഥതയിലുള്ളതാണെങ്കില് 10 ലക്ഷം വരെ പിഴ ഈടാക്കുകയാണ് ചെയ്യുക.
നല്ല ഉദ്ദേശ്യത്തോടെയും കാര്യത്തിന്റെ ഗൗരവം അറിയാതെയുമാണ് ഇത്തരക്കാര്ക്ക് സഹായങ്ങള് ചെയ്തു കൊടുത്തതെങ്കില് പരമാവധി അഞ്ചു ലക്ഷം വരെ ഫൈന് ലഭിക്കും. പ്രതികള് ഉടന് തന്നെ അറസ്റ്റ് ചെയ്യപ്പെടുകയും ജയിലിലടയ്ക്കപ്പെടുകയും ചെയ്യും. കുറ്റം തെളിയിക്കപ്പെട്ടാല് ഇക്കാര്യം പ്രതിയുടെ ചെലവില് മാധ്യമങ്ങളിലൂടെ പരസ്യം ചെയ്യണമെന്നും നിയമം വ്യവസ്ഥ ചെയ്യുന്നുണ്ട്.