സൗദി സന്ദര്‍ശിക്കണം, ഫോട്ടോ ഉപയോഗിക്കും
വിനോദ സഞ്ചാര മേഖലയ്ക്ക് കൂടുതല്‍ ഊന്നല്‍ നല്‍കുന്നതിന്റെ ഭാഗമായാണ് സൗദി ഇത്തരമൊരു പദ്ധതിയുമായി റൊണാള്‍ഡോയെ സമീപിച്ചത്. വന്‍തുക ഓഫറിന് പകരമായി സൗദി അറേബ്യ ആവശ്യപ്പെട്ടത് പ്രധാനമായും രണ്ട് കാര്യങ്ങളാണ്. താരം സൗദിയില്‍ സന്ദര്‍ശനങ്ങള്‍ നടത്തണമെന്നതാണ് അതിലൊന്ന്. ഇതുവഴി ലോകശ്രദ്ധ സൗദിയിലേക്ക് തിരിയുമെന്നും ടൂറിസം മേഖലയില്‍ വന്‍ കുതിപ്പിന് വഴിയൊരുങ്ങുമെന്നും സൗദി കരുതുന്നു. അതോടൊപ്പം ടൂറിസവുമായി ബന്ധപ്പെട്ട എല്ലാ പ്രൊമോഷനുകളിലും താരത്തിന്റെ പടവും വീഡിയോയും ഉപയോഗിക്കുമെന്നതാണ് മറ്റൊരു നിബന്ധന.
മെസ്സിക്കും ഓഫര്‍ നല്‍കി
റൊണാള്‍ഡോയ്ക്കു പുറമെ, അര്‍ജന്റീന താരം ലയണല്‍ മെസ്സിയെയും ടൂറിസം അംബാസഡറാവാന്‍ സൗദി ക്ഷണിച്ചതായും റിപ്പോര്‍ട്ടില്‍ പറയുന്നു. എന്നാല്‍, മെസ്സിയുടെ പ്രതികരണം അനുകൂലമായിരുന്നോ അല്ലയോ എന്ന് വ്യക്തമല്ല. ഇതുമായി ബന്ധപ്പെട്ട ചോദ്യങ്ങളോട് പ്രതികരിക്കാന്‍ ഇരുതാരങ്ങളുടെയും മാനേജര്‍മാര്‍ തയ്യാറായിട്ടില്ലെന്നും ദി ടെലഗ്രാഫ് റിപ്പോര്‍ട്ട് ചെയ്തു. മനുഷ്യാവകാശ ലംഘനങ്ങള്‍ക്ക് അന്താരാഷ്ട്ര തലത്തില്‍ ഏറെ പഴി കേള്‍ക്കുന്ന സൗദിയുമായുള്ള കരാര്‍ താരങ്ങള്‍ക്കെതിരേ വിമര്‍ശനം ക്ഷണിച്ചുവരുത്തുമെന്നതാവാം ഓഫര്‍ നിരസിക്കാനുള്ള കാരണമെന്നും പത്രം അഭിപ്രായപ്പെട്ടു.
വിസിറ്റ് സൗദി കാംപയിന്‍
പരമ്പരാഗത എണ്ണ സാമ്പത്തിക വ്യവസ്ഥയില്‍ നിന്ന് മാറി ടൂറിസം, ഇന്‍ഫര്‍മേഷന്‍ ടെക്നോളജി തുടങ്ങിയ മേഖലകളില്‍ ശ്രദ്ധ കേന്ദ്രീകരിക്കാനാണ് സൗദി കിരീടാവകാശി മുഹമ്മദ് ബിന്‍ സല്‍മാന്റെ നേതൃത്വത്തില്‍ സൗദി അറേബ്യ ശ്രമിച്ചുകൊണ്ടിരിക്കുന്നത്. അതിന്റെ ഭാഗമായി നിരവധി ടൂറിസം വികസന പ്രവര്‍ത്തനങ്ങള്‍ സൗദിയില്‍ നടന്നുവരുന്നുണ്ട്. രാജ്യത്തെ ടൂറിസം പ്രമോഷന്റെ ഭാഗമായി വിസിറ്റ് സൗദി എന്ന പേരില്‍ പുതിയ കാംപയിന്‍ ആസൂത്രണം ചെയ്തിരിക്കുകയാണ് അധികൃതര്‍. ഇതിനോടനുബന്ധിച്ചാണ് ലോകപ്രശസ്ത ഫുട്ബോള്‍ താരത്തെ അംബാസഡറാക്കാനുള്ള ശ്രമം സൗദി ടൂറിസം അതോറിറ്റി നടത്തുന്നത്.