ഹലാല്‍ ഭക്ഷണം തയ്യാറാക്കുന്നതില്‍ പരിശീലനം നല്‍കി സൗദി ഹലാല്‍ സെന്റര്‍

റിയാദ്: രാജ്യത്തേക്ക് കയറ്റുമതി ചെയ്യുന്ന ഭക്ഷ്യസാധനങ്ങള്‍ സൗദിയിലെ ഹലാല്‍ ഫുഡ് നിയമങ്ങള്‍ പാലിക്കുന്നതാണെന്ന് ഉറപ്പുവരുത്തുന്നതിന്റെ ഭാഗമായി ഈ മേഖലയില്‍ പ്രവര്‍ത്തിക്കുന്നവര്‍ക്ക് പരിശീലന പരിപാടിയുമായി സൗദി അധികൃതര്‍. സൗദി ഫുഡ് ആന്റ് ഡ്രഗ് അതോറിറ്റിക്കു കീഴിലുള്ള ഹലാല്‍ സെന്ററാണ് 25 രാജ്യങ്ങളില്‍ നിന്നുള്ള 200ലേറെ പേര്‍ക്ക് ഓണ്‍ലൈനായി രണ്ടു ദിവസത്തെ പരിശീലനം നല്‍കിയത്. ഹലാല്‍ ഭക്ഷണത്തിന്റെ പൊതു ആവശ്യകതകള്‍ എന്നതായിരുന്നു പരിശീലന വിഷയം.
സെഹ്തി ആപ്പിലൂടെ കൊവിഡ് -19 വാക്സിൻ രജിസ്ട്രേഷൻ നടത്താം; പ്രഖ്യാപനവുമായി സൗദി അറേബ്യ
ഹലാല്‍ ഭക്ഷണം തയ്യാറാക്കുന്നതില്‍ ഭക്ഷ്യസ്ഥാപനങ്ങളിലെ ജീവനക്കാര്‍ക്ക് അറിവ് നല്‍കുകയും ലോകത്തിന്റെ വിവിധ ഭാഗങ്ങളില്‍ ഹലാല്‍ സര്‍ട്ടിഫിക്കേഷന്‍ സ്ഥാപനങ്ങള്‍ വ്യാപിപ്പിക്കുകയും ചെയ്യുകയാണ് പരിശീലനത്തിലൂടെ ലക്ഷ്യമിടുന്നതെന്ന് ഹലാല്‍ സെന്റര്‍ അറിയിച്ചു.

ഇസ്ലാമിക ചിട്ടകള്‍ പാലിച്ച് എങ്ങനെയാണ് അറവ് ശാലകള്‍ പ്രവര്‍ത്തിക്കേണ്ടതെന്നും ഇക്കാര്യത്തില്‍ സ്‌പെഷ്യലിസ്റ്റ് ജീവനക്കാരെ നിയമിക്കേണ്ടതിനെ കുറിച്ചും പരിപാടിയില്‍ വിശദീകരിച്ചു. ഹലാല്‍ സര്‍ട്ടിഫിക്കറ്റുമായി ബന്ധപ്പെട്ട കാര്യങ്ങള്‍, ഹലാല്‍ ഭക്ഷ്യവ്യവസായം നേരിടുന്ന വെല്ലുവിളികള്‍, ഹലാല്‍ ഭക്ഷ്യ ഉല്‍പ്പാദനത്തില്‍ ഓണ്‍ലൈന്‍ കോഴ്‌സുകളുടെ ആവശ്യകത തുടങ്ങിയ കാര്യങ്ങളും ചര്‍ച്ച ചെയ്തു. ലോകത്തിന്റെ വിവിധ ഭാഗങ്ങളുലുള്ളവര്‍ക്കായി വിവിധ ഭാഷകളില്‍ ഹലാല്‍ ഫുഡിനെ കുറിച്ച് പ്രത്യേക കോഴ്‌സുകള്‍ സംഘടിപ്പിക്കുമെന്നും ഹലാല്‍ സെന്റര്‍ അറിയിച്ചു.