ഓണ്‍ലൈന്‍ വിദ്യാഭ്യാസം കൂടുതല്‍ കാര്യക്ഷമമാക്കും
ആരോഗ്യ മന്ത്രാലയവുമായി നിലവിലെ കൊവിഡ് വ്യാപന സാഹചര്യം വിലയിരുത്തിയ ശേഷമാണ് നേരിട്ടുള്ള ക്ലാസ്സുകള്‍ വേണ്ടെന്ന നിലപാട് സ്വീകരിച്ചത്. അതോടൊപ്പം വിദ്യാഭ്യാസവുമായി ബന്ധപ്പെട്ട വിവിധ കമ്മിറ്റികളുമായും സ്ഥാപനങ്ങളുമായും നിലവിലെ ഓണ്‍ലൈന്‍ പഠന രീതി കൂടുതല്‍ ശക്തിപ്പെടുത്തുന്നതുമായി ബന്ധപ്പെട്ട് മന്ത്രാലയം ചര്‍ച്ചകള്‍ നടത്തി. നിലവില്‍ മദ്‌റസത്തീ പ്ലാറ്റ്‌ഫോം, ഐന്‍ വിദ്യാഭ്യാസ ചാനല്‍, യുട്യൂബ് ചാനലുകള്‍, നാഷനല്‍ എജുക്കേഷന്‍ പോര്‍ട്ടല്‍, വെര്‍ച്വല്‍ കിന്റര്‍ഗാര്‍ട്ടന്‍ പോര്‍ട്ടല്‍ തുടങ്ങിയ മാധ്യമങ്ങളിലൂടെയാണ് ഓണ്‍ലൈന്‍ വിദ്യാഭ്യാസം നല്‍കിവരുന്നത്. ഇവ കൂടുതല്‍ ആകര്‍ഷകമാക്കുന്നതിനുള്ള നടപടികള്‍ സ്വീകരിക്കുമെന്നും മന്ത്രാലയം വ്യക്തമാക്കി. ജൂലൈ അവസാനത്തോടെയാണ് സൗദിയിലെ അധ്യയന വര്‍ഷം സമാപിക്കുന്നത്.
വാക്‌സിനേഷന്‍ ശക്തിപ്പെടുത്താന്‍ നടപടി
അതേസമയം, രാജ്യത്തെ ഭൂരിപക്ഷം ആളുകള്‍ക്കും കൊവിഡ് പ്രതിരോധ വാക്സിന് വിതരണം ചെയ്യുന്നതിലൂടെ കൂട്ടായ പ്രതിരോധ ശേഷി ആര്‍ജ്ജിച്ചാല്‍ മാത്രമേ വിദ്യാഭ്യാസ സ്ഥാപനങ്ങള്‍ തുറന്നുപ്രവര്‍ത്തിക്കാനാവൂ എന്ന വിലയിരുത്തലിലാണ് അധികൃതര്‍. കുട്ടികളില്‍ രോഗബാധയുണ്ടാവുന്ന പരമാവധി തടയുകയാണ് ഇതിലൂടെ ലക്ഷ്യമിടുന്നത്. സിഹത്തീ ആപ്പ് വഴി കൊവിഡ് വാക്സിന് രജിസ്റ്റര്‍ ചെയ്ത സ്വദേശികള്‍ക്കും പ്രവാസികള്‍ക്കും വിതരണം വേഗത്തിലാക്കുന്നതിനായി കൂടുതല്‍ വാക്സിന് കേന്ദ്രങ്ങള്‍ ആരംഭിച്ചതായി ആരോഗ്യമന്ത്രാലയം അറയിച്ചു. നിലവില്‍ രാജ്യത്തിന്റെ എല്ലാ മേഖലകളിലും വിതരണ കേന്ദ്രങ്ങള്‍ തുടങ്ങിക്കഴിഞ്ഞു.