ദമാം: സൗദി അറേബ്യയിലെ ചെങ്കടലില് യാംബു തുറമുഖത്തിനു നേരെ ആക്രമണം നടത്താനുള്ള പദ്ധതി തകര്ത്തതായി സഖ്യസേനാ വക്താവ് ബ്രിഗേഡിയര് ജനറല് തുര്ക്കി അല് മാലികി അറിയിച്ചു. തുറമുഖത്തിനു സമീപം സ്ഫോടക വസ്തുക്കള് നിറച്ച ബോട്ട് നാവിക സേന കണ്ടെത്തുകയും ആക്രമണത്തിന് മുമ്പു തന്നെ നശിപ്പിക്കുകയായിരുന്നു.
റിമോട്ട് നിയന്ത്രിത സ്ഫോടകവസ്തു നിറച്ച ബോട്ട് ഉപയോഗിച്ചായിരുന്നു ആക്രമണം നടത്താന് പദ്ധതിയിട്ടത്. എന്നാല് തുറമുഖത്തിന് അടുത്തെത്തുന്നതിന് മുമ്പു തന്നെ സൗദി നാവികസേന ബോട്ട് തടഞ്ഞുവെച്ച് ആയുധങ്ങള് ഉള്പ്പെടെ കടലില് വച്ചു തന്നെ തകര്ക്കുകയായിരുന്നു. ചൊവ്വാഴ്ച്ച രാവിലെ 6.40നാണ് തുറമുഖത്തിന് നേരെയുള്ള ആക്രമണ ശ്രമം നാവിക സേന തകര്ത്തതെന്ന് അദ്ദേഹം പറഞ്ഞു. എന്നാല് ഈ ആക്രമണ ശ്രനത്തിന് പിന്നില് ആരാണെന്നു വ്യക്തമായിട്ടില്ല. പിന്നില് പ്രവര്ത്തിച്ചവരെ കണ്ടെത്തുന്നതിനുള്ള അന്വേഷണം പുരോഗമിക്കുകയാണ്. രാജ്യത്തിന്റെ സുപ്രധാന കേന്ദ്രങ്ങളെയും സാമ്പത്തിക അഭിവൃദ്ധിയെയും തകര്ക്കാന് ലക്ഷ്യമിടുന്ന ശത്രുതാപരമായ ശ്രമങ്ങള്ക്കെതിരെ കര്ശന നടപടി സ്വീകരിക്കുമെന്നും അല് മാലിക്കി പറഞ്ഞു.
അതിനിടെ, സൗദി എണ്ണക്കമ്പനിയായ ബഹരിയുടെ ഉടമസ്ഥതയിലുള്ള എന്സിസി ദമാം എന്ന എണ്ണ ടാങ്കര് യാംബു തുറമുഖത്തിന് സമീപം ആക്രമിക്കപ്പെട്ടതായി സുരക്ഷാ സ്ഥാപനമായ ദരിയാദ് ഗ്ലോബല് റിപ്പോര്ട്ട് ചെയ്തു. എന്നാല് കമ്പനിയുടെ കപ്പലുകളൊന്നും ആക്രമിക്കപ്പെട്ടിട്ടില്ലെന്ന് സിഇഒ അബ്ദുല്ല അല്ദുബൈഖി അറിയിച്ചു.