ഹൂതി ആക്രമണങ്ങളുടെ ഗൗരവം മനസ്സിലാക്കണം
ഹൂതി വിമതര്ക്ക് ഇറാന് നല്കുന്ന ബാലിസ്റ്റിക് മിസൈല് സാങ്കേതികവിദ്യകളും അത്യാധുനിക ഡ്രോണുകളും ഉപയോഗിച്ചാണ് അവര് രാജ്യത്തെ എണ്ണ ഉല്പ്പാദന, സംസ്ക്കരണ കേന്ദ്രങ്ങള്ക്കും എണ്ണ ഉല്പ്പന്നങ്ങളുടെ സംഭരണ, വിതരണ കേന്ദ്രങ്ങള്ക്കും നേരെ തുടര്ച്ചയായ ആക്രമണങ്ങള് നടന്നുകൊണ്ടിരിക്കുന്നത് എന്നതിന്റെ ഗൗരവം അന്താരാഷ്ട്ര സമൂഹം ഉള്ക്കൊള്ളണം. ഹൂതി ആക്രമണങ്ങള് രാജ്യത്തിന്റെ എണ്ണ ഉല്പ്പാദനം, സംസ്കരണം, വിതരണം എന്നീ മേഖലകളില് ഗുരുതരമായ പ്രത്യാഘാതങ്ങളാണ് ഉണ്ടാക്കുന്നത്. ഇത് രാജ്യത്തിന്റെ എണ്ണ ഉല്പ്പാദന ശേഷിയെയും എണ്ണ വിതരണത്തിലുള്ള അതിന്റെ ബാധ്യതകള് നിറവേറ്റാനുള്ള കഴിവിനെയും ബാധിക്കുമെന്നും പ്രസ്താവന വ്യക്തമാക്കി.
ആഗോള ഊര്ജ സുരക്ഷയെ അപകടത്തിലാക്കും
ഹൂതി ആക്രമണങ്ങള് അന്താരാഷ്ട്ര തലത്തില് ഊര്ജ വിതരണത്തിന്റെ സുരക്ഷയെയും സുസ്ഥിരതയെയും ബാധിക്കുമെന്ന കാര്യത്തില് സംശയമില്ല. ഊര്ജ വിതരണം സംരക്ഷിക്കേണ്ടതിന്റെ ഉത്തരവാദിത്വം അന്താരാഷ്ട്ര സമൂഹത്തിനുണ്ടെന്നും സൗദി ചൂണ്ടിക്കാട്ടി. ഊര്ജ വിതരണ രംഗത്തെ സുരക്ഷ ഉറപ്പുവരുത്തുന്നതിനായി ഇറാന് പിന്തുണയോടെ പ്രവര്ത്തിക്കുന്ന ഹൂത്തി ഭീകരര്ക്കെതിരേ ശക്തമായ നിലപാട് സ്വീകരിക്കാനും സൗദിക്കെതിരായ ആക്രമണങ്ങളില് നിന്ന് അവരെ പിന്തിരിപ്പിക്കാനും അന്താരാഷ്ട്ര സമൂഹം മുന്നോട്ടുവരണമെന്നും സൗദി വിദേശകാര്യ മന്ത്രാലയം പ്രസ്താവനയില് ചൂണ്ടിക്കാട്ടി.
ആഗോള വിപണിയില് എണ്ണ വില വീണ്ടും കൂടിയേക്കും
ഹൂതി ആക്രമണത്തെ തുടര്ന്ന് എണ്ണ ഉല്പ്പാദനം കുറയ്ക്കേണ്ടിവന്നാല്, യുക്രൈന് യുദ്ധത്തിന്റെ പശ്ചാത്തലത്തില് അത് അന്താരാഷ്ട്ര ഊര്ജ വിപണിയില് വലിയ വിലക്കയറ്റത്തിന് കാരണമാവുമെന്നാണ് വിലയിരുത്തപ്പെടുന്നത്. ഉക്രൈയിന് യുദ്ധത്തെ തുടര്ന്നുണ്ടായ പ്രതിസന്ധി പരിഹരിക്കാന് സൗദി ഉള്പ്പെടെയുള്ള രാജ്യങ്ങള് എണ്ണ ഉല്പ്പാദനം ശക്തിപ്പെടുത്തണമെന്ന ആവശ്യം നിലനില്ക്കുമ്പോഴാണ് അത് കുറയ്ക്കേണ്ടിവരുമെന്ന മുന്നറിയിപ്പുമായി സൗദി രംഗത്തെത്തിയിരിക്കുന്നത്. യുക്രൈന് പ്രസിന്ധിയെ തുടര്ന്ന് ബാരലിന് 140 ഡോളര് വരെ എത്തിയ ക്രൂഡോയില് വില തിങ്കളാഴ്ച ബാരലിന് 112 ഡോളറാണ് രേഖപ്പെടുത്തിയത്. പുതിയ സാഹചര്യത്തില് ഇത് വീണ്ടും വര്ധിക്കുമെന്ന ഭീതിയിലാണ് എണ്ണ വിപണി.
ഹൂതി ആക്രമണത്തില് അരാംകോ പ്ലാന്റില് തീപ്പിടിത്തം
ഇറാന്റെ പിന്തുണയോടെ പ്രവര്ത്തിക്കുന്ന ശിയാ വിമത വിഭാഗമായ ഹൂത്തികള് ഏതാനും വര്ഷങ്ങളായി തുടരുന്ന സൗദി എണ്ണ കേന്ദ്രങ്ങള്ക്കെതിരായ ആക്രമണം കഴിഞ്ഞ ദിവസങ്ങളില് രൂക്ഷമായിരുന്നു. കഴിഞ്ഞ ഞായറായാഴ്ചയുണ്ടായ ഹൂതി മിലൈല് ആക്രമണത്തില് ജിദ്ദയിലെ അരാംകോ എണ്ണ കേന്ദ്രത്തില് സ്ഫോടനവും തുടര്ന്ന് തീപ്പിടിത്തവും ഉണ്ടായിരുന്നു. തീ നിയന്ത്രണ വിധേയമാക്കാനായെങ്കിലും പ്ലാന്റുകള്ക്ക് നാശ നഷ്ടങ്ങളുണ്ടായതിനാല് ഇവിടെ നിന്നുള്ള എണ്ണ ഉല്പ്പാദനം കുറയ്ക്കേണ്ടിവന്നിരുന്നു. അരാംകോയുടെ പെട്രോളിയം ഉല്പ്പന്നങ്ങളുടെ വിതരണ കേന്ദ്രത്തിലാണ് ഹൂതി മിസൈല് ആക്രമണത്തില് തീപ്പിടത്തമുണ്ടായത്. അരാംകോയുടെ വിതരണ കേന്ദ്രത്തിലെ ടാങ്കിലായിരുന്നു തീപ്പിടത്തമുണ്ടായത്. കഴിഞ്ഞ ശനി, ഞായര് ദിവസങ്ങളില് സൗദിയുടെ ജനവാസ കേന്ദ്രങ്ങളില് ഉള്പ്പെടെ ഉണ്ടായ തുടര്ച്ചയായ ആക്രമണത്തിന് പിന്നാലെയാണ് ജിദ്ദയിലെ അരാംകോ എണ്ണ കേന്ദ്രം ആക്രമിക്കപ്പെട്ടത്. സൗദിക്കു നേരെയുണ്ടായ മിസൈല്, ഡ്രോണ് ആക്രമണങ്ങളിലേറെയും സൗദി സഖ്യ സേന പരാജയപ്പെടുത്തിയിരുന്നു.
ആക്രമണത്തെ അപലപിച്ച് കൂടുതല് രാജ്യങ്ങള്
അതിനിടെ, സൗദിയിലെ എണ്ണ കേന്ദ്രങ്ങള്ക്കും ജനവാസ കേന്ദ്രങ്ങള്ക്കും നേരെ ഹൂത്തികള് നടത്തുന്ന ആക്രമണത്തെ അപലപിച്ച് കൂടുതല് രാജ്യങ്ങള് രംഗത്തെത്തി. സൗദിയിലെ ഊര്ജ, സാമ്പത്തിക, സിവിലിയന് കേന്ദ്രങ്ങള്ക്കു നേരെ നടത്തുന്ന ആക്രമണങ്ങളെ ശക്തമായി അപലപിക്കുന്നതായി യൂറോപ്യന് യൂനിയന് പ്രസ്താവനയില് അറിയിച്ചു. ഇവ തികച്ചും അസ്വീകാര്യമാണെന്ന് വ്യക്തമാക്കിയ യൂറോപ്യന് യൂനിയന് അവ ഉടന് അവസാനിപ്പിക്കണമെന്നും ആവശ്യപ്പെട്ടു. നേരത്തേ യുഎഇ, ഈജിപ്ത്, കുവൈറ്റ്, ഖത്തര്, ജോര്ദാന്, പാകിസ്താന് എന്നീ രാജ്യങ്ങള് ആക്രമണത്തെ ശക്തമായി അപലപിച്ചിരുന്നു. ഓര്ഗനൈസേഷന് ഓഫ് ഇസ്ലാമിക് കോ-ഓപറേഷന്, അറബ് ലീഗ്, ഗള്ഫ് സഹകരണ കൗണ്സില് എന്നീ സംഘടനകളും അപലപിച്ച് രംഗത്തെത്തി.