കിരീടാവകാശി വാക്‌സിനെടുത്തു; സൗദിയില്‍ രജിസ്‌ട്രേഷന്‍ പതിന്മടങ്ങ് വര്‍ധിച്ചു

ജിദ്ദ: സൗദി കിരീടാവകാശി മുഹമ്മദ് ബിന്‍ സല്‍മാന്‍ കൊവിഡ് പ്രതിരോധ വാക്‌സിന്‍ കുത്തിവച്ചതോടെ സൗദിയിലെ സ്വദേശികള്‍ക്കും വിദേശികള്‍ക്കും വാക്‌സിനോടുള്ള ആഭിമുഖ്യം പതിന്‍മടങ്ങ് വര്‍ധിച്ചതായി റിപ്പോര്‍ട്ട്. കിരീടാവകാശി കുത്തിവയ്‌പ്പെടുക്കുന്ന വീഡിയോയും ചിത്രങ്ങളും സോഷ്യല്‍ മീഡിയയില്‍ ഉള്‍പ്പെടെ പ്രചരിച്ചതോടെ ആരോഗ്യ വകുപ്പിന്റെ സിഹത്തീ ആപ്പില്‍ വാക്‌സിനു വേണ്ടി രജിസ്റ്റര്‍ ചെയ്തവരുടെ എണ്ണത്തില്‍ വന്‍ വര്‍ധനവാണുണ്ടായത്.

കഴിഞ്ഞ വെള്ളിയാഴ്ചയാണ് കിരീടാവകാശി വാക്‌സിന്‍ കുത്തിവയ്‌പ്പെടുത്തത്. ഇതിന്റെ തൊട്ടുശേഷമുള്ള മണിക്കൂറുകളില്‍ മാത്രം ആപ്പില്‍ അഞ്ചിരട്ടിയിലേറെ ആളുകള്‍ രജിസ്റ്റര്‍ ചെയ്തതായി സൗദി ആരോഗ്യമന്ത്രി ഡോ. തൗഫീഖ് അല്‍ റബീഅ അറിയിച്ചു. വ്യാഴാഴ്ച വരെ അഞ്ചു ലക്ഷം പേരായിരുന്നു ആപ്പില്‍ വാക്‌സിനു വേണ്ടി രജിസ്റ്റര്‍ ചെയ്തത്.

Also Read: ദുബായിലെ ന്യൂ ഇയര്‍: നിയമം ലംഘിച്ചാല്‍ സംഘാടകര്‍ക്കും സന്ദര്‍ശകര്‍ക്കും കനത്ത പിഴ

കിരീടാവകാശിക്കു പിന്നാലെ സാംസ്‌ക്കാരിക മന്ത്രി പ്രിന്‍സ് ബദര്‍ ബിന്‍ ഫര്‍ഹാന്‍, ആഭ്യന്തര മന്ത്രി പ്രിന്‍സ് അബ്ദുല്‍ അസീസ് സൗദ് ബിന്‍ നായിഫ് തുടങ്ങിയ പ്രമുഖരും കുത്തിവയ്‌പ്പെടുത്തു. ഡിസംബര്‍ 17നാണ് സൗദിയില്‍ ഫൈസര്‍ വാക്‌സിന്‍ വിതരണം ആരംഭിച്ചത്. ആദ്യത്തെ ഡോസ് സ്വീകരിച്ചത് ആരോഗ്യമന്ത്രി തന്നെയായിരുന്നു. സ്വദേശികള്‍ക്കും പ്രവാസികള്‍ക്കും സൗജന്യമായാണ് സൗദി വാക്‌സിന്‍ വിതരണം ചെയ്യുന്നത്.