രണ്ടാം തരംഗം ഭീകരമായിരിക്കും
രാജ്യത്ത് അടുത്ത ദിവസങ്ങളിലായി കൊവിഡ് വ്യാപനം ശക്തമായി വരുന്നതിന് പിന്നില്‍ ആളുകള്‍ ഒരുമിച്ചുകൂടിയുള്ള വിവിധ ചടങ്ങുകളാണെന്ന് അന്വേഷണത്തില്‍ ബോധ്യമായതായി മന്ത്രി പറഞ്ഞു. ജനങ്ങളുടെ ഭാഗത്ത് നിന്ന് ഇത്തരം അനാസ്ഥ തുടരുകയാണെങ്കില്‍ കൊവിഡിന്റെ രണ്ടാം തരംഗം രാജ്യത്തുണ്ടാകുമെന്നും അദ്ദേഹം വീഡിയോ സന്ദേശത്തിലൂടെ മുന്നറിയിപ്പ് നല്‍കി. അങ്ങനെ സംഭവിക്കുകയാണെങ്കില്‍ അത് ഒന്നാം തരംഗത്തെക്കാള്‍ ഭീകരമായിരിക്കും. അതിന്റെ വരവിനെ പ്രതിരോധിച്ചു നിര്‍ത്താന്‍ നമുക്ക് സാധിച്ചുകൊള്ളണമെന്നില്ലെന്നും മന്ത്രി പറഞ്ഞു.
നിയന്ത്രണങ്ങള്‍ കടുപ്പിക്കേണ്ടിവരും
കൊവിഡ് വ്യാപനം തടയുന്ന കാര്യത്തില്‍ എല്ലാ വിഭാഗം ആളുകളില്‍ നിന്നും ആത്മാര്‍ഥമായ പരിശ്രമങ്ങളുണ്ടാവണം. ഇക്കാര്യത്തില്‍ ജനങ്ങളുടെ ഭാഗത്ത് നിന്ന് നല്ല രീതിയിലുള്ള സഹകരണമുണ്ടാവുന്നില്ലെങ്കില്‍ നിയന്ത്രണങ്ങള്‍ കടുപ്പിക്കുകയല്ലാതെ മറ്റു വഴികളില്ല. രോഗവ്യാപനത്തിന്റെ കാര്യത്തില്‍ ഇപ്പോഴുണ്ടായിരിക്കുന്ന വര്‍ധനവ് ഗൗരവത്തോടെ കാണാന്‍ ജനങ്ങള്‍ തയ്യാറാവണം. മാസ്‌ക് ധാരണം, സാമൂഹ്യ അകലം പാലിക്കല്‍, കൈകള്‍ അണുവിമുക്തമാക്കല്‍ തുടങ്ങിയ കാര്യങ്ങള്‍ ശക്തമായി പാലിക്കാന്‍ എല്ലാവരും തയ്യാറാവണമെന്നും മന്ത്രി പറഞ്ഞു.
കൊവിഡ് ബാധിതരുടെ എണ്ണം കൂടുന്നു
ജനുവരി മൂന്നിന് പ്രതിദിന കൊവിഡ് ബാധിതരുടെ എണ്ണം 82 ആയി കുറഞ്ഞിരുന്നുവെങ്കിലും പിന്നീട് അത് കൂടിവരുന്നതാണ് കണ്ടത്. ഏറ്റവുമൊടുവില്‍ ഞായറാഴ്ച 261 പേരാണ് കൊവിഡ് പോസിറ്റീവായത്. മൂന്നു പേര്‍ കൊവിഡ് ബാധിച്ച് മരണപ്പെടുകയും ചെയ്തു. കൊവിഡ് പ്രതിരോധം ശക്തിപ്പെടുത്തുന്നതിന്റെ ഭാഗമായി സൗദിയില്‍ വാക്‌സിനേഷന്‍ പുരോഗമിക്കുന്നുണ്ടെങ്കിലും വാക്‌സിന്റെ ദൗര്‍ലഭ്യം കാരണം താല്‍ക്കാലികമായി നിര്‍ത്തിവച്ചിരിക്കുകയാണ്. അതുകൊണ്ടുതന്നെ മാര്‍ച്ച് 31 വരെ പ്രഖ്യാപിച്ച യാത്രാവിലക്ക് മെയ് 17ലേക്ക് കഴിഞ്ഞ ദിവസം നീട്ടിയിരുന്നു