അടുത്ത വര്‍ഷം ജൂണ്‍ ഒന്ന് മുതല്‍ നിലവില്‍ വരും
മനുഷ്യവിഭാവ സാമൂഹിക വികസന മന്ത്രാലയമാണ് വിവിധ തൊഴില്‍ മേഖലകളിലെ വ്യാപാര സ്ഥാപനങ്ങളില്‍ ജോലി ചെയ്യുന്നവര്‍ക്ക് പ്രൊഫഷനല്‍ ലൈസന്‍സ് നല്‍കുക. അടുത്ത വര്‍ഷം ജൂണ്‍ ഒന്നു മുതല്‍ ലൈസന്‍സ് നിര്‍ബന്ധമാക്കും. അതിനു ശേഷം ലൈസന്‍സ് ഇല്ലാത്തവര്‍ ഈ മേഖലകളില്‍ ജോലി ചെയ്യുന്നത് നിയമ ലംഘനമായി പരിഗണിക്കപ്പെടും. ലൈസന്‍സ് ഇല്ലാത്ത ജീവനക്കാരെ ജോലിക്കു വയ്ക്കുന്ന സ്ഥാപനത്തിനെതിരേയും നടപടി വരും.
ലൈസന്‍സ് ഇഷ്യൂ ചെയ്യുന്നത് ബലദി പ്ലാറ്റ്‌ഫോമിലൂടെ
തങ്ങളുടെ സ്ഥാപനങ്ങളില്‍ ജോലി ചെയ്യുന്ന വിദഗ്ധ തൊഴിലാളികള്‍ക്ക് പ്രൊഫഷനല്‍ ലൈസന്‍സ് ലഭ്യമാക്കുകയെന്നത് സ്ഥാപന ഉടമകളുടെ ഉത്തരവാദിത്തമാണ്. ബലദി പ്ലാറ്റ്‌ഫോം വഴിയാണ് ഈ ലൈസന്‍സ് ലഭിക്കുക. ഇവ പുതുക്കുന്നതിനുള്ള അപേക്ഷയും ബലദി പ്ലാറ്റ്‌ഫോമില്‍ തന്നെയാണ് നല്‍കേണ്ടതെന്നും മന്ത്രാലയം അറിയിച്ചു. വ്യാപാര സ്ഥാപനത്തിന്റെ കൊമേഴ്‌സ്യല്‍ ലൈസന്‍സ് പുതുക്കി ലഭിക്കണമെങ്കില്‍ സ്ഥാപനത്തിലെ വിദഗ്ധ തൊഴിലാളികള്‍ക്ക് പ്രൊഫഷനല്‍ ലൈസന്‍സ് ഉണ്ടായിരിക്കണമെന്ന നിബന്ധനയും അധികൃതര്‍ മുന്നോട്ടുവച്ചിട്ടുണ്ട്. ഇതു പ്രകാരം ജീവനക്കാര്‍ക്ക് ലൈസന്‍സ് ഇല്ലെങ്കില്‍ അത്തരം സ്ഥാപനങ്ങള്‍ക്ക് കൊമേഴ്‌സ്യല്‍ ലൈസന്‍സ് പുതുക്കി നല്‍കില്ല.
ലൈസന്‍സ് നല്‍കുക സര്‍ട്ടിഫിക്കറ്റുകള്‍ പരിശോധിച്ച്‌
നിലവില്‍ ജോലി ചെയ്യുന്നവരും പുതുതായി നിയമിക്കപ്പെടുന്നവരുമായ മുഴുവന്‍ തൊഴിലാളികള്‍ക്കും പ്രൊഫഷനല്‍ ലൈസന്‍സ് നിര്‍ബന്ധമാക്കിയിട്ടുണ്ട്. തൊഴില്‍ മേഖലയ്ക്ക് അനുസൃതമായ വിദ്യാഭ്യാസ യോഗ്യത പരിശോധിക്കുകയും അല്ലാത്ത പക്ഷം തൊഴില്‍ മേഖലയിലെ അവരുടെ നൈപുണ്യം പരിശോധനയ്ക്കു വിധേയമാക്കിയും മാത്രമേ ലൈസന്‍സ് നല്‍കുകയുള്ളൂ എന്നും അധികൃതര്‍ വ്യക്തമാക്കി.
അപേക്ഷ നല്‍കേണ്ട വിധം
തങ്ങളുടെ സ്ഥാപനത്തിലെ ജീവനക്കാര്‍ക്ക് പ്രൊഫഷനല്‍ ലൈസന്‍സ് ലഭ്യമാക്കുന്നതിന് https://balady.gov.sa//Services?id=327 എന്ന ലിങ്കിലൂടെ പ്രവേശിച്ച് അതില്‍ പറയുന്ന രേഖകള്‍ അപ്ലോഡ് ചെയ്താല്‍ മതിയാവും. ആവശ്യമായ വിദ്യാഭ്യാസ യോഗ്യത, തൊഴില്‍ പരിശീലനം, അക്രഡിറ്റേഷന്‍ തുടങ്ങിയവ തെളിയിക്കുന്ന രേഖകളാണ് പ്ലാറ്റ്‌ഫോം വഴി നല്‍കേണ്ടത്. ശരിയായ രീതിയില്‍ അപേക്ഷ നല്‍കുന്നവര്‍ക്ക് ആവശ്യമായ സാങ്കേതിക പരിശോധനകള്‍ക്കും ശേഷം ക്രാഫ്റ്റ് ലൈസന്‍സ് നല്‍കും. മനുഷ്യവിഭവ സാമൂഹിക വികസന മന്ത്രാലയത്തിനു കീഴിലെ പ്രൊഫഷനല്‍ വെരിഫിക്കേഷന്‍ പ്രോഗ്രാമുമായി സഹകരിച്ചാണ് മുനിസിപ്പാലിറ്റി ഗ്രാമ കാര്യ മന്ത്രാലയം ലൈസന്‍സ് പദ്ധതി നടപ്പിലാക്കുന്നത്.