സൗദിയില്‍ കൊവിഡ് വ്യാപനം രൂക്ഷം: സ്ഥിതി ആശങ്കാജനകം

റിയാദ്: സൗദിയില്‍ കൊവിഡിന്റെ സ്ഥിതി ആശങ്കാജനകമാണെന്ന് ആരോഗ്യ മന്ത്രാലയം. ഉടന്‍ തന്നെ വാക്‌സിന്‍ സ്വീകരിക്കലാണ് ഈ അപകടാവസ്ഥ മറികടക്കുന്നതിനുള്ള മാര്‍ഗ്ഗമെന്ന് മന്ത്രാലയം അറിയിച്ചു. രാജ്യത്ത് ഇപ്പോഴും പ്രതിദിന കൊവിഡ് കേസുകള്‍ വര്‍ധിച്ച് വരുന്നതായി ആരോഗ്യ മന്ത്രാലയം വക്താവ് ഡോ. മുഹമ്മദ് അല്‍ അബ്ദുല്‍ ആലി വ്യക്തമാക്കി.

Also Read: അബുദാബി: വിദ്യാര്‍ഥികള്‍ക്കും അധ്യാപകര്‍ക്കും രണ്ടാഴ്ചയിലൊരിക്കല്‍ കൊവിഡ് ടെസ്റ്റ് നിര്‍ബന്ധം

ഒടുവില്‍ 315 പുതിയ കൊവിഡ് രോഗബാധയും 349 രോഗമുക്തിയുമാണ് റിപ്പോര്‍ട്ട് ചെയ്തത്. ഇപ്പോഴും പുതുതായി കൊവിഡ് കേസുകള്‍ സ്ഥിരീകരിക്കുന്നവരുടെ എണ്ണത്തില്‍ സ്ഥിരത കൈവരിക്കാനായിട്ടില്ല.

സൗദിയിലെ ചില ഭാഗങ്ങളില്‍ സ്ഥിതി ആശങ്കാജനകമായി തുടരുകയാണെന്നും ഇത് പ്രത്യേകിച്ച് നിരീക്ഷിച്ച് വരികയാണെന്നും അദ്ദേഹം കൂട്ടിച്ചേര്‍ത്തു. ഈ സാഹചര്യത്തില്‍ ആരോഗ്യ മുന്‍കരുതല്‍ നടപടികള്‍ പാലിക്കുന്ന കാര്യത്തില്‍ ജാഗ്രത പുലര്‍ത്തണമെന്നും വാക്‌സിന്‍ സ്വീകരിക്കലാണ് ഇതിനെ മറികടക്കാനുള്ള ഏറ്റവും നല്ല മാര്‍ഗ്ഗമെന്നും അദ്ദേഹം ഓര്‍മ്മിപ്പിച്ചു.

Also Read: മുടക്കിയത് ലക്ഷങ്ങള്‍, നാട്ടിലേക്ക് തിരിക്കാന്‍ പണമില്ല; യുഎഇയില്‍ കുടുങ്ങിയ പ്രവാസികള്‍ ദുരിതത്തില്‍

കഴിഞ്ഞ ഒരാഴ്ചയ്ക്കിടെ ആരോഗ്യ നിര്‍ദേശങ്ങള്‍ പാലിക്കുന്നതില്‍ വീഴ്ച വരുത്തിയ 44,000 ത്തിലധികം നിയമ ലംഘനങ്ങളാണ് ഒരാഴ്ചയ്ക്കിടെ കണ്ടെത്തിയത്. രോഗവ്യാപനം തടയുന്നതിന്റെ ഭാഗമായി പുറത്തിറക്കിയ തവല്‍ക്കനാ ആപ്ലിക്കേഷന്‍ 17 മില്യണിലധികം പേര്‍ ഉപയോഗിച്ചു വരുന്നുണ്ട്.