സൗദിയില് ഓണ്ലൈന് ക്ലാസ്സിനിടെ വിദ്യാര്ഥിയുടെ വെബ് ക്യാമറയില് കുടുങ്ങിയത് കള്ളന്
ഓണ്ലൈന് ക്ലാസ്സിനിടെ വിദ്യാര്ഥിനിയുടെ പിറകിലൂടെ കള്ളന് വീട്ടില് കയറാന് ശ്രമിക്കുന്നതിന്റെ വീഡിയോ ദൃശ്യങ്ങള് സോഷ്യല് മീഡിയയില് വൈറലാവുകയും ചെയ്തു.
Lipi 8 Mar 2021, 8:59 am
ഹൈലൈറ്റ്:
- വീഡിയോയുടെ സത്യാവസ്ഥയെ കുറിച്ച് പോലിസ് അന്വേഷിച്ചുവരികയാണ്
- ക്ലാസ് നടക്കുന്നസമയത്ത് വീട്ടില് മറ്റാരുമുണ്ടായിരുന്നില്ല
റിയാദ്: ഓണ്ലൈന് ക്ലാസ്സിനിടെ സഹപാഠിയുടെ വെബ് ക്യാമറയിലൂടെ സുഹൃത്തുക്കള് കണ്ടത് ജനലിലൂടെ വീട്ടിനകത്തേക്ക് കയറാന് ശ്രമിക്കുന്ന മോഷ്ടാവിനെ. സഹപാഠികളുടെ സമയോചിതമായ ഇടപടല് കള്ളന്റെ മോഷണ ശ്രമം തകര്ത്തുവെന്നു മാത്രമല്ല, വിദ്യാര്ഥിനിയെ വലിയ അപകടത്തില് നിന്ന് രക്ഷപ്പെടുത്തുകയും ചെയ്തു. ഓണ്ലൈന് ക്ലാസ്സിനിടെ വിദ്യാര്ഥിനിയുടെ പിറകിലൂടെ കള്ളന് വീട്ടില് കയറാന് ശ്രമിക്കുന്നതിന്റെ വീഡിയോ ദൃശ്യങ്ങള് സോഷ്യല് മീഡിയയില് വൈറലാവുകയും ചെയ്തു. സൗദി അറേബ്യയിലാണ് സംഭ്രമജനകമായ സംഭവം റിപ്പോര്ട്ട് ചെയ്യപ്പെട്ടത്.
Also Read: വാക്സിനെടുത്താല് റമദാന് വ്രതം മുറിയില്ല; ഫത്വയുമായി ഇസ്ലാമിക പണ്ഡിതന്
ഉടന് തന്നെ ടീച്ചറും കുട്ടികളും മൈക്ക് അണ്മ്യൂട്ട് ചെയ്യുകയും മറ്റു രക്ഷിതാക്കളുടെ ശ്രദ്ധ സംഭവത്തിലേക്ക് ആകര്ഷിക്കുന്നതിനായി ഇതേ കുറിച്ച് ഓണ്ലൈന് ക്ലാസ്സിനിടയില് തന്നെ വിളിച്ചു പറയുകയും ചെയ്യുകയായിരുന്നു. ഇത് കേള്ക്കാനിടയായ മറ്റൊരു കുട്ടിയുടെ മാതാവ് തന്നെ കുട്ടിയുടെ പെണ്കുട്ടിയുടെ വീട്ടിലെത്തുകയും മോഷ്ടാവില് നിന്ന് കുട്ടിയെ രക്ഷിക്കുകയുമായിരുന്നു. കുട്ടിയോട് രക്ഷിതാവ് താന് വീടിന് പുറത്തുണ്ടെന്ന് പറയുന്നതും കള്ളനെ തെറിവിളിക്കുന്നതും പോലിസിനെ വിവരം അറിയിക്കുന്നതുമെല്ലാം വീഡിയോയില് കേള്ക്കാനാവും. വീഡിയോയുടെ സത്യാവസ്ഥയെ കുറിച്ച് പോലിസ് അന്വേഷിച്ചുവരികയാണെന്ന് ഹെയില് റീജ്യണല് പോലിസിന്റെ മീഡിയ വക്താവ് കാപ്റ്റന് താരീഖ് അല് നാസര് അറിയിച്ചു.