സൗദി അനാഥാലയത്തില്‍ യുവതിയെ വളഞ്ഞിട്ട് ആക്രമിക്കുന്ന വീഡിയോ; അന്വേഷണത്തിന് ഉത്തരവിട്ടു

റിയാദ്: സൗദിയിലെ ഒരു അനാഥാലയത്തില്‍ പത്തോളം പേര്‍ ചേര്‍ന്ന് യുവതിയെ വളഞ്ഞിട്ട് ആക്രമിക്കുന്ന ദൃശ്യങ്ങള്‍ ഉള്‍പ്പെട്ട വീഡിയോ വൈറലായി. സംഭവത്തില്‍ പ്രതിഷേധവുമായി നിരവധി പേര്‍ രംഗത്തെത്തി. പ്രതിഷേധം ശക്തമായ സാഹചര്യത്തില്‍ സംഭവത്തെ കുറിച്ച് അന്വേഷിക്കാന്‍ പ്രത്യേക സമിതിക്ക് രൂപം നല്‍കിയിരിക്കുകയാണ് അധികൃതര്‍.

Also Read: ചരിത്രത്തിലെ ഏറ്റവും വലിയ മയക്കുമരുന്നു വേട്ടയുമായി സൗദി; എട്ട് പ്രവാസികള്‍ പിടിയില്‍

സൗദിയുടെ തെക്കന്‍ പ്രദേശമായ അസീര്‍ റീജ്യനിലെ ഖമീസ് മുശൈത്തിലെ ഒരു ഓര്‍ഫനേജില്‍ നടന്ന സംഭവമാണെന്നാണ് പ്രാഥമിക നിഗമനം. പത്തോളം ആളുകള്‍ ചേര്‍ന്ന് സ്ത്രീയെ ഓടിച്ച് പിടിക്കുന്നതും അതിനു ശേഷം നിലത്തിട്ട് ലെതര്‍ ബെല്‍റ്റ് കൊണ്ട് ക്രൂരമായി മര്‍ദ്ദിക്കുന്നതുമാണ് വീഡിയോയില്‍. ഇതിന് പിന്നില്‍ സുരക്ഷാ ഉദ്യോഗസ്ഥരാണോ ഓര്‍ഫനേജിലെ ജീവനക്കാരാണോ എന്ന കാര്യത്തില്‍ വ്യക്തതയില്ല.
വീഡിയോ സാമൂഹ്യ മാധ്യമങ്ങളില്‍ പ്രചരിച്ചതോടെ സംഭവത്തിന് ഉത്തരവാദികളായവര്‍ക്കെതിരേ ശക്തമായ നടപടി സ്വീകരിക്കണമെന്നാവശ്യപ്പെട്ട് നിരവധി പേര്‍ രംഗത്തെത്തി.



Also Read: ഖത്തര്‍ വ്യോമയാന മേഖലയ്ക്ക് ചരിത്രനിമിഷം; മൂന്ന് അയല്‍ രാജ്യങ്ങളുമായി ദോഹ എഫ്‌ഐആര്‍ കരാര്‍ ഒപ്പിട്ടു

സംഭവം വിവാദമായതോടെ ഇതേക്കുറിച്ച് വിശദമായ അന്വേഷണം നടത്താന്‍ ഉത്തരവിട്ടിരിക്കുകയാണ് അസീര്‍ പ്രവിശ്യാ അമീര്‍ പ്രിന്‍സ് തുര്‍ക്കി ബന്‍ തലാല്‍. ഓണ്‍ലൈന്‍ വീഡിയോയിലെ ദൃശ്യങ്ങളെ കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ പ്രത്യേക കമ്മിറ്റിക്കും അദ്ദേഹം രൂപം നല്‍കി. സംഭവവുമായി ബന്ധപ്പെട്ട മുഴുവന്‍ പേരെയും അന്വേഷണത്തിന്റെ പരിധിയില്‍ കൊണ്ടുവരണമെന്നാണ് സമിതിക്ക് നല്‍കിയിരിക്കുന്ന നിര്‍ദ്ദേശം.

സംഭവത്തില്‍ സൗദി മനുഷ്യാവകാശ കമ്മീഷനും അന്വേഷണം പ്രഖ്യാപിച്ചിട്ടുണ്ട്. അതേസമയം, വീഡിയോയുടെ ആധികാരികത പരിശോധിക്കുമെന്നും ഓര്‍ഫനേജില്‍ നേരത്തേയുണ്ടായ സാമ്പത്തിക തട്ടിപ്പുമായി സംഭവത്തിന് ബന്ധമുണ്ടോ എന്ന കാര്യം അന്വേഷിക്കുമെന്നും പബ്ലിക് പ്രൊസിക്യൂഷന്‍ വ്യക്തമാക്കി.