അബുദാബിയില്‍ 19 വാഹനങ്ങള്‍ കൂട്ടിയിടിച്ച് അപകടം; ഒരു പ്രവാസി മരിച്ചു, എട്ട് പേര്‍ക്ക് പരിക്ക്

അബുദാബി: അബുദാബിയില്‍ 19 വാഹനങ്ങള്‍ കൂട്ടിയിടിച്ചുണ്ടായ അപകടത്തില്‍ ഒരു പ്രവാസി മരിച്ചു. എട്ട് പേര്‍ക്ക് പരിക്കേല്‍ക്കുകയും ചെയ്തു. അബുദാബി അല്‍ മഫ്‌റഖില്‍ ചൊവ്വാഴ്ച രാവിലെയോടെ ആയിരുന്നു അപകടം. കനത്ത മൂടല്‍മഞ്ഞിനെ തുടര്‍ന്ന് ദൂരക്കാഴ്ച കുറഞ്ഞതിനെ തുടര്‍ന്നാണ് അപകടം ഉണ്ടായത്.

Also Read: അപ്രതീക്ഷിത ഫോണ്‍ കോള്‍ വഴിത്തിരിവായി; യുവതിയ്ക്ക് സമ്മാനമായി ലഭിച്ചത് 7.3 കോടി

അപകടത്തില്‍ പരിക്കേറ്റവരെ ആശുപത്രിയിലേക്ക് മാറ്റി. ട്രക്കുകളും കാറുകളും ഉള്‍പ്പെടെയുള്ള വാഹനങ്ങളാണ് അപകടത്തില്‍പ്പെട്ടത്. അപകടത്തില്‍പ്പെട്ട വാഹനത്തിന്റെ ഡ്രൈവറാണ് മരിച്ചത്. ഇദ്ധേഹം ഏഷ്യാക്കാരനാണെന്ന് പോലീസ് പറഞ്ഞു. മൃതദേഹം മോര്‍ച്ചറിയിലേക്ക് മാറ്റി.

വാഹനങ്ങള്‍ തമ്മില്‍ നിശ്ചിതദൂരം പാലിക്കാതെ സഞ്ചരിച്ചതാണ് അപകടകാരണമെന്ന് പോലീസ് വ്യക്തമാക്കി. കഴിഞ്ഞ കുറച്ച് ദിവസങ്ങളായി യുഎഇയില്‍ കനത്ത മൂടല്‍മഞ്ഞാണ് അനുഭവപ്പെടുന്നത്. ഈ കാലാവസ്ഥയില്‍ വാഹനമോടിക്കുമ്പോള്‍ അതീവ ജാഗ്രത പാലിക്കണമെന്ന് പോലീസ് നിര്‍ദേശിച്ചു.

ദൂരക്കാഴ്ച കുറഞ്ഞതിനെ തുടര്‍ന്ന് അബുദാബിയിലും ദുബായിലും റെഡ് അലേര്‍ട്ട് പ്രഖ്യാപിച്ചു. അബുദാബി എമിറേറ്റ് പ്രദേശങ്ങളെല്ലാം റെഡ് അലേര്‍ട്ടിലാണ്. രാവിലെ പത്ത് വരെ ദൂരക്കാഴ്ച ആയിരം മീറ്ററില്‍ താഴെ ആയിരിക്കുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. ഷാര്‍ജ, അജ്മാന്‍, ഉമ്മുല്‍ഖുവൈന്‍, റാസല്‍ഖൈമ എമിറേറ്റുകളില്‍ മഞ്ഞ അലേര്‍ട്ട് പ്രഖ്യാപിച്ചിട്ടുണ്ട്.

Also Read: മഞ്ഞില്‍ കുളിച്ച് യുഎഇ; അബുദാബിയിലും ദുബായിലും റെഡ് അലേര്‍ട്ട്

കടുത്ത മൂടല്‍മഞ്ഞിനെ തുടര്‍ന്ന്, വിവിധ സ്ഥലങ്ങളില്‍ 24 റോഡപകടങ്ങള്‍ റിപ്പോര്‍ട്ട് ചെയ്തിരുന്നു. 24 റോഡപകടങ്ങളില്‍ രണ്ടെണ്ണം വലിയ അപകങ്ങള്‍ ആയിരുന്നു.