ആപ്പ്ജില്ല

അബുദാബി സ്‌കൂളുകള്‍ മൂന്നിന് തുറക്കും; ക്ലാസ്സില്‍ 15 കുട്ടികള്‍ മാത്രം, മറ്റ് നിബന്ധനകള്‍ എന്തൊക്കെ?

അബുദാബിയിലെ സ്‌കൂളുകള്‍ ജനുവരി മൂന്നിന് തുറക്കുമ്പോള്‍ പാലിക്കേണ്ട നിര്‍ദ്ദേശങ്ങള്‍ ഇങ്ങനെയാണ്.

Samayam Malayalam 24 Dec 2020, 1:57 pm
കൊവിഡ് പശ്ചാത്തലത്തില്‍ താല്‍ക്കാലികമായി അടച്ച അബുദാബിയിലെ സ്‌കൂളുകളില്‍ ജനുവരി മൂന്നിന് അധ്യയനം പുനരാരംഭിക്കുമ്പോള്‍ പാലിക്കേണ്ട നിര്‍ദ്ദേശങ്ങള്‍ അധികൃതര്‍ പുറപ്പെടുവിച്ചു. സ്വകാര്യ സ്‌കൂളുകളെ നിയന്ത്രിക്കുന്ന അബുദാബി എഡ്യുക്കേഷന്‍ ആന്റ് നോളജ് വകുപ്പാണ് (അഡെക്) സുരക്ഷാ മുന്‍കരുതലുകള്‍ പ്രഖ്യാപിച്ചത്. ആഗസ്ത് 30 മുതല്‍ അബുദാബി സ്‌കൂളുകള്‍ ഭാഗികമായി തുറന്നു പ്രവര്‍ത്തിച്ചിരുന്നുവെങ്കിലും അടുത്ത മാസത്തോടെ അവയുടെ പ്രവര്‍ത്തനം പൂര്‍ണ തോതിലേക്ക് മാറുകയാണ്. ജനുവരി മൂന്നു മുതലാണ് സെക്കന്റ് സെമസ്റ്റര്‍ ആരംഭിക്കുന്നത്.
Samayam Malayalam abu dhabi prepares for students return to school for second term
അബുദാബി സ്‌കൂളുകള്‍ മൂന്നിന് തുറക്കും; ക്ലാസ്സില്‍ 15 കുട്ടികള്‍ മാത്രം, മറ്റ് നിബന്ധനകള്‍ എന്തൊക്കെ?


​ക്ലാസ്സില്‍ സാമൂഹ്യ അകലം പാലിക്കണം

Photo Credit: pixabay

പുതിയ നിര്‍ദ്ദേശപ്രകാരം ഓരോ ക്ലാസ്സിലും 15ല്‍ കൂടുതല്‍ കുട്ടികള്‍ ഉണ്ടാവാന്‍ പാടില്ല. വിദ്യാര്‍ഥികള്‍ക്കിടയില്‍ ചുരുങ്ങിയത് ഒന്നര മീറ്ററെങ്കിലും അകലം പാലിക്കുന്ന വിധത്തിലായിരിക്കണം ഇരിപ്പിട സൗകര്യങ്ങള്‍ ഒരുക്കേണ്ടത്. ഒന്നാം ക്ലാസ്സിനു മുകളിലുള്ള കൂട്ടികള്‍ക്കാണ് ഈ രീതി നടപ്പിലാക്കേണ്ടത്. മാസ്‌ക്ക് ധാരണം, സാമൂഹിക അകലം തുടങ്ങിയ കൊവിഡ് പെരുമാറ്റച്ചട്ടങ്ങള്‍ പാലിക്കപ്പെടുന്നുവെന്ന് ഓരോ സ്ഥാപനവും ഉറപ്പുവരുത്തണം.

കൊവിഡ് വ്യാപനം തടയുന്നതിനായി സ്‌കൂളിലെ വിദ്യാര്‍ഥികളെയും അധ്യാപകരെയും മൂന്നോ നാലോ ഗ്രൂപ്പുകളായി തിരിക്കണം. രണ്ട് ഗ്രൂപ്പുകളിലെ വിദ്യാര്‍ഥികളും അധ്യാപകരും തമ്മില്‍ ഇടകലരാന്‍ അവസരമുണ്ടാകരുത്. ഏതെങ്കിലും ഗ്രൂപ്പിലെ ഒരാള്‍ കൊവിഡ് പോസിറ്റീവായാല്‍ മറ്റു ഗ്രൂപ്പുകളെ അത് ബാധിക്കാതിരിക്കാന്‍ വേണ്ടിയാണിത്.

​കൊവിഡ് ബാധ കണ്ടാല്‍ എന്തു ചെയ്യണം?

Photo Credit: pixabay

സ്‌കൂളിലെ വിദ്യാര്‍ഥികളില്‍ നിന്നും ജീവനക്കാരില്‍ നിന്നും ആരെങ്കിലുമൊരാള്‍ കൊവിഡ് പോസിറ്റീവായാല്‍ അവരുമായി ബന്ധം പുലര്‍ത്തിയ മുഴുവന്‍ പേരും 14 ദിവസത്തെ ക്വാറന്റൈനിലേക്ക് പോവണം. അതേസമയം, രണ്ടോ അതിലധികമോ പേര്‍ക്ക് കൊവിഡ് ബാധിക്കുന്ന സാഹചര്യമുണ്ടായാല്‍ 14 ദിവസത്തേക്ക് സ്‌കൂള്‍ പൂര്‍ണമായും അടച്ചിടണമെന്നാണ് നിര്‍ദ്ദേശം.

​കൊവിഡ് നെഗറ്റീവ് സര്‍ട്ടിഫിക്കറ്റ് ഹാജരാക്കണം

Photo Credit: pixabay

സ്‌കൂളിലെത്തുന്ന വിദ്യാര്‍ഥികളും അധ്യാപകരും ജീവനക്കാരും കോവിഡ് നെഗറ്റീവ് സര്‍ട്ടിഫിക്കറ്റ് ഹാജരാക്കണമെന്നും നിര്‍ദേശമുണ്ട്. ഇവര്‍ക്ക് ഡിസംബര്‍ 31നു മുമ്പായി അബൂദാബി ഹെല്‍ത്ത് സര്‍വീസസ് സ്ഥാപനമായ സിഹയുടെ സെന്ററുകളില്‍ ചെന്ന് സൗജന്യമായി ടെസ്റ്റ് നടത്താം. ഓരോ സ്‌കൂളിലെയും വിദ്യാര്‍ഥികള്‍ക്കും അധ്യാപകര്‍ക്കും മറ്റു ജീവനക്കാര്‍ക്കുമായി നിശ്ചിത ദിവസങ്ങളില്‍ പിസിആര്‍ ടെസ്റ്റുകള്‍ നടത്താനാണ് സിഹ കേന്ദ്രങ്ങള്‍ക്ക് നല്‍കിയിരിക്കുന്ന നിര്‍ദ്ദേശം.

ആര്‍ട്ടിക്കിള്‍ ഷോ