സന്ദർശക വിസയില്‍ എത്തുന്നവര്‍ക്ക് പ്രവേശനം കൂടുതൽ കർശനമാക്കി അബുദാബി

അബുദാബി: സന്ദര്‍ശക വിസയില്‍ അബുദാബിയിലേക്ക് എത്തുന്നവര്‍ക്ക് നിബന്ധനകള്‍ കര്‍ശനമാക്കിയിരിക്കുകയാണ്. ഗ്രീൻ രാജ്യങ്ങളിൽനിന്നുള്ള സന്ദർശകർ തടസ്സമില്ലാതെ യാത്ര ചെയ്യാം. എന്നാല്‍ റെഡ് ലിസ്റ്റിലുള്ള രാജ്യത്ത് നിന്നും എത്തുന്നവര്‍ക്ക് കടുത്ത നിയന്ത്രണങ്ങള്‍ ആണ് ഏര്‍പ്പെടുത്തിയിരിക്കുന്നത്.

വിസിറ്റ് വിസയില്‍ എത്തുന്നവര്‍ക്ക് അബുദാബിയിലേക്ക് വിമാന മാർഗം പ്രവേശിക്കാന്‍ സാധിക്കില്ല. അതിനാല്‍ ദുബായ്, ഷാർജ, റാസൽഖൈമ തുടങ്ങി മറ്റു എമിറേറ്റുകളിൽ എത്തിയ ശേഷം റോഡ് മാര്‍ഗ്ഗം ആണ് യാത്രക്കാര്‍ അബുദാബിയില്‍ എത്തുന്നത്. രാജ്യത്ത് കൊവിഡ് വ്യാപനം ശക്തമായ സാഹചര്യത്തില്‍ ആണ് നിയന്ത്രണങ്ങള്‍ കര്‍ശനമാക്കിയത്. കഴിഞ്ഞ ദിവസം റോഡ് മാര്‍ഗം എത്തിയവര്‍ക്ക് അതിർത്തിയിൽ പ്രവേശനാനുമതി നല്‍കിയില്ല. ഔദ്യോഗിക അറിയിപ്പ് വന്നിട്ടില്ലെങ്കിലും അതിര്‍ത്തി കടക്കാന്‍ സാധിക്കുന്നില്ല.

Also Read: ബഹ്‌റൈനിലേക്ക് വരുന്ന കുട്ടികള്‍ക്ക് നെഗറ്റീവ് സര്‍ട്ടിഫിക്കറ്റ് വേണ്ട
പരീക്ഷകളുടെ മേൽനോട്ടത്തിനായി ദുബായിലെത്തി 10 ദിവസത്തെ ക്വാറന്റീൻ പൂർത്തിയാക്കിയ ശേഷം അബുദാബിയിലേക്ക് പോകുന്നവരേയും തിരിച്ചയച്ചവരില്‍പ്പെടും. ബന്ധുക്കളെ കാണാനും, ജോലി അന്വേഷിച്ച് എത്തിയവരും ഇത്തരത്തില്‍ മടങ്ങിപോയവരില്‍ ഉള്‍പ്പെടുന്നു. എന്നാല്‍ അബുദാബിയില്‍ താമസിക്കുന്ന മാതാപിതാക്കളെ കാണാനും, ജോലിക്ക് എത്തുന്നവര്‍ എന്നിവര്‍ക്ക് ഇളവ് നല്‍ക്കുന്നുണ്ട്. എന്നാല്‍ പലരും വ്യാജ രേഖകള്‍ ഉണ്ടാക്കി അബുദാബിയില്‍ എത്താന്‍ ശ്രമിച്ചത് കാരണം ആണ് നിയന്ത്രണങ്ങള്‍ കടുപ്പിക്കാന്‍ തീരുമാനിച്ചത്.