ദുബായ്: 10 ലക്ഷം ഭക്ഷണപ്പൊതികള് സൗജന്യമായി വിതരണം പ്രമുഖ ഇ-കൊമേഴസ് സ്ഥാപനമായ ആമസോണ്. യുഎഇ, സൗദി അറേബ്യ, ഈജിപ്ത്, ജോര്ദാന് എന്നിവിടങ്ങളിലെ പാവങ്ങള്ക്കിടയിലാണ് ഇവ വിതരണം ചെയ്യുക. പ്രാദേശികമായി പ്രവര്ത്തിക്കുന്ന ജീവകാരുണ്യ സംഘടനകളുമായി സഹകരിച്ച് 1,074,080 ഭക്ഷ്യക്കിറ്റുകള് വിതരണം ചെയ്യാനാണ് ആമസോണ് പദ്ധതിയിട്ടിരിക്കുന്നത്.
ദാനധര്മങ്ങളുടെ മാസമായ റമദാനില് ഭക്ഷണം ഏറ്റവും കൂടുതല് ആവശ്യമുള്ള 10 ലക്ഷത്തിലേറെ പേരുടെ അടുത്ത് എത്തിക്കുന്നതിനുള്ള സംവിധാനമാണ് ആമസോണ് ഒരുക്കിയിരിക്കുന്നതെന്ന് മധ്യപൗരസ്ത്യ ദേശത്തെ ആമസോണിന്റെ വൈസ് പ്രസിഡന്റ് റൊണാള്ഡോ മൗച്ചവാര് അറിയിച്ചു. കൊവിഡ് വ്യാപനത്തിന്റെ ആദ്യഘട്ടം മുതല് തന്നെ അത്യാവശ്യ സാധനങ്ങള് സുരക്ഷിതമായി വീട്ടുപടിക്കല് എത്തിക്കുന്നതിലും ജീവനക്കാരുടെയും ഉപഭോക്താക്കളുടെയും പങ്കാളികളുടെയും സുരക്ഷ ഉറപ്പാക്കുന്നതിലും വലിയ ജാഗ്രതയാണ് ആമസോണ് കൈക്കൊണ്ടതെന്നും അദ്ദേഹം പറഞ്ഞു.
യുഎഇ ഫുഡ്ബാങ്കുമായി സഹകരിച്ചാണ് ഭക്ഷണപ്പൊതികള് വിതരണം ചെയ്യുക. പങ്കുവയ്ക്കലിന്റെ മാസമായി റമദാനില് ഇത്തരമൊരു പുണ്യകര്മത്തില് ആമസോണുമായി സഹകരിക്കാനായതില് വലിയ സന്തോഷമുണ്ടെന്നും ദുബായ് മുനിസിപ്പാലിറ്റി ഭക്ഷ്യ സുരക്ഷാ വകുപ്പ് തലവനും ഫുഡ് ബാങ്ക് കമ്മിറ്റി അംഗവുമായ ഇമാന് അല് ബസ്താക്കി പറഞ്ഞു.
ഇതിനു പുറമെ, റമദാനില് 20 രാജ്യങ്ങളില് നിന്നുള്ള 10 കോടി ആളുകള്ക്ക് സൗജന്യ ഭക്ഷണം എത്തിക്കാനുള്ള പദ്ധതി യുഎഇ നടപ്പിലാക്കിവരുന്നുണ്ട്. പദ്ധതി പ്രഖ്യാപിച്ച യുഎഇ വൈസ് പ്രസിഡന്റും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന് റാശിദ്, മധ്യപൗരസ്ത്യ ദേശത്തെ 52 ദശലക്ഷം ആളുകള് ഉള്പ്പെടെ ലോകത്ത് 82 കോടി ജനങ്ങള് പോഷകാഹാരക്കുറവ് നേരിടുന്നതവരാണെന്ന് പറഞ്ഞിരുന്നു.
കൊവിഡിന്റെ പശ്ചാത്തലത്തില് കഴിഞ്ഞ വര്ഷം യുഎഇ നടപ്പിലാക്കിയ 10 മില്യന് സൗജന്യ ഭക്ഷണ പദ്ധതിയുടെ തുടര്ച്ചയായാണ് 100 മില്യന് ഭക്ഷണ പദ്ധതി ആവിഷ്ക്കരിച്ചിരിക്കുന്നത്. കൊവിഡ് കാരണം തൊഴില് നഷ്ടമായവര്ക്കും ശമ്പളം കിട്ടാത്തവര്ക്കും പള്ളിയിലെയും മറ്റും ഇഫ്ത്താറുകള് മുടങ്ങിയതു കാരണം സൗജന്യ ഇഫ്ത്താര് ലഭിക്കാത്തവരുമായ ആളുകള്ക്ക് ഇത് ഏറെ പ്രയോജനകരമായിരുന്നു.