യുഎഇ കിരീടാവകാശി ഇസ്രായേല്‍ പ്രധാനമന്ത്രിയുമായി സംസാരിച്ചു; സഹകരണം ശക്തമാക്കും

അബുദാബി: ഉഭയകക്ഷി ബന്ധം ശക്തമായി മുന്നോട്ടു കൊണ്ടുപോകാന്‍ യുഎഇ-ഇസ്രായേല്‍ നേതാക്കള്‍ തമ്മില്‍ ധാരണ. അബുദാബി കിരീടാവകാശിയും യുഎഇ സായുധസേന ഡെപ്യൂട്ടി സുപ്രീം കമാന്‍ഡറുമായ ശെയ്ഖ് മുഹമ്മദ് ബിന്‍ സായിദ് അല്‍ നഹ്‌യാന്‍ ഇസ്രായേല്‍ പ്രധാനമന്ത്രി നഫ്താലി ബെനെറ്റുമായി നടത്തിയ ഫോണ്‍ സംഭാഷണത്തിലാണ് പരസ്പര സഹകരണം കൂടുതല്‍ ശക്തമാക്കാന്‍ ധാരണയായത്.

പ്രാദേശികവും അന്തര്‍ദേശീയവുമായ വിവിധ വിഷയങ്ങള്‍ ഇരുവരും ചര്‍ച്ച ചെയ്തതായി ഔദ്യോഗിക വൃത്തങ്ങളെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഇസ്രായേല്‍ പ്രധാനമന്ത്രി സ്ഥാനം ഏറ്റെടുത്ത നഫ്താലി ബെനെറ്റിനെ ശെയ്ഖ് മുഹമ്മദ് അഭിനന്ദിച്ചു. മേഖലയിലെ ജനങ്ങള്‍ക്കിടയില്‍ സമാധാനവും വളര്‍ച്ചയും സാധ്യമാക്കുന്നതിനുള്ള വഴികളും ഇരുനേതാക്കളും ചര്‍ച്ചചെയ്തതായും ഔദ്യോഗിക വാര്‍ത്താ ഏജന്‍സി അറിയിച്ചു. സമാധാനത്തിനും സുസ്ഥിരതയ്ക്കും വികസനത്തിനുമായി ഒരുമിച്ച് പ്രവര്‍ത്തിക്കാനുള്ള ആഗ്രഹവും ശെയ്ഖ് മുഹമ്മദ് പ്രകടിപ്പിച്ചു.

Also Read: ഒമാനില്‍ സമ്പൂര്‍ണ ലോക് ഡൗണ്‍ അവസാനിച്ചു; ജൂലൈ 31 വരെ രാത്രികാല കര്‍ഫ്യൂ തുടരും
ഇരു രാജ്യങ്ങളിലും എംബസികള്‍ നിലവില്‍ വരികയും നയതന്ത്ര ബന്ധം ശക്തമാവുകയും ചെയ്തതോടെ വിവിധ മേഖലകളില്‍ വന്‍ വികസനത്തിന് അവസരമൊരുങ്ങിയതായാണ് വിലയിരുത്തപ്പെടുന്നത്. കഴിഞ്ഞ വര്‍ഷം ഇരുരാജ്യങ്ങളും തമ്മില്‍ ഒപ്പുവച്ച അബ്രഹാം കരാറിനെ തുടര്‍ന്ന് വ്യാപാര, ടൂറിസം, നിക്ഷേപ മേഖലകളില്‍ വലിയ പുരോഗതിയാണ് ചുരുങ്ങിയ കാലം കൊണ്ട് ഇരുരാജ്യങ്ങളും കൈവരിച്ചത്. കൊവിഡ് പ്രതിസന്ധി അവസാനിക്കുന്നതോടെ സഹകരണം കൂടുതല്‍ വ്യാപിപ്പിക്കാനാവുമെന്നാണ് ഇരുരാജ്യങ്ങളുടെയും പ്രതീക്ഷ.