അനുശ്രീയെ ഞെട്ടിച്ച് മസാല കിംഗ്; വിവാഹ സമ്മാനമായി നല്‍കിയത് ഒരു ലക്ഷം രൂപ

ദുബായ്: കരിപ്പൂര്‍ വിമാനാപകടത്തില്‍ മരിച്ച പ്രവാസി മലയാളി രാജീവന്റെ മകള്‍ അനുശ്രീക്ക് വിവാഹ സമ്മാനവുമായി മസാല കിംഗ് വീണ്ടും. ഇത്തവണ അനുശ്രീക്ക് വിവാഹ സമ്മാനമായി ഒരു ലക്ഷം രൂപ നല്‍കിയാണ് പ്രവാസി വ്യവസായിയും അല്‍ ആദില്‍ ട്രേഡിങ് ചെയര്‍മാനും മാനേജിങ് ഡയറക്ടറുമായ ഡോ. ധനഞ്ജയ് ദത്തര്‍ സഹായ ഹസ്തവുമായി എത്തിയത്.

അനുശ്രീക്കുള്ള തന്റെ ദീപാവലി സമ്മാനമാണിതെന്ന് ഡോ. ദത്തര്‍ പറഞ്ഞു. ആവശ്യക്കാരെ സഹായിക്കുകയും അവരുടെ ജീവിതത്തിലേക്ക് വെളിച്ചമെത്തിക്കുകയും ചെയ്യുമ്പോഴാണ് ആഘോഷം സാര്‍ഥകമാവുന്നതെന്നും അദ്ദേഹം അഭിപ്രായപ്പെട്ടു. മകളുടെ വിവാഹത്തിനായി നാട്ടിലേക്ക് തിരിച്ചതായിരുന്നു രാജീവ്. എന്നാല്‍ ദുരന്തം അദ്ദേഹത്തിന്റെ ജീവന്‍ തട്ടിയെടുത്തു. അചഛന്‍റെ മരണത്തോടെ വിവാഹം തല്‍ക്കാലത്തേക്ക് മാറ്റിവയ്ക്കുകയും ചെയ്തു. അനുശ്രീയുടെ വിവാഹക്കാര്യം അറിഞ്ഞതോടെ അവര്‍ക്കൊരു ചെറിയ സമ്മാനം നല്‍കാന്‍ തീരുമാനിക്കുകയായിരുന്നുവെന്നും ഡോ. ദത്തര്‍ പറഞ്ഞു.



Also Read: 'പ്രവാസികൾക്ക് തിരിച്ചടി, മടങ്ങാതെ രക്ഷയില്ല'; 60 വയസ് കഴിഞ്ഞെങ്കിൽ തൊഴില്‍ കരാര്‍ പുതുക്കില്ലെന്ന് കുവൈറ്റ്


ജീവകാരുണ്യ പ്രവര്‍ത്തനങ്ങള്‍ക്ക് പേരുകേട്ട അദ്ദേഹം, ആഗസ്തിലുണ്ടായ കരിപ്പൂര്‍ വിമാനാപകടത്തില്‍ മരിച്ചവരുടെ കുടുംബങ്ങള്‍ക്ക് 20 ലക്ഷം രൂപ ധനസഹായമായി അദ്ദേഹം നല്‍കിയിരുന്നു. നഷ്ടപ്പെട്ട ജീവന് പകരമാവില്ല ധനസഹായമെങ്കിലും സാമ്പത്തികമായി ബുദ്ധിമുട്ടുന്ന കുടുംബങ്ങള്‍ക്ക് ചെറിയൊരു ആശ്വാസമാകും ഇതെന്നായിരുന്നു അദ്ദേഹം അന്നു പറഞ്ഞത്. ജോലി നഷ്ടപ്പെട്ടവരാണ് വിമാനത്തിലുണ്ടായിരുന്നവരില്‍ ഏറെയും. ഇവരുടെ കുടുംബങ്ങള്‍ സാമ്പത്തികമായി ഏറെ പ്രതിസന്ധി നേരിടുന്നവരാണ്. അവരുടെ കുടുംബത്തെ ചെറിയ രീതിയിലെങ്കിലും സഹായിക്കാനാണ് തുക നല്‍കുന്നതെന്നും അദ്ദേഹം അന്നു പറയുകയുണ്ടായി.

കൊവിഡിനെത്തുടര്‍ന്ന് വിദേശ രാജ്യങ്ങളില്‍ കുടങ്ങിപ്പോയ 3800 ഓളം ഇന്ത്യക്കാരെ തിരിച്ചെത്തിക്കാന്‍ ഡോ. ധനഞ്ജയ് ദത്തര്‍ മുന്‍കൈയെടുത്തതും ഏറെ പ്രശംസിക്കപ്പെട്ടിരുന്നു. ഇവര്‍ക്കാവശ്യമായ യാത്ര ടിക്കറ്റിനിനോടൊപ്പം കോവിഡ് പരിശോധനയ്ക്കുള്ള സൗകര്യങ്ങളും ക്വാറന്റൈന്‍ സൗകര്യങ്ങളും ഭക്ഷണക്കിറ്റുകളും അദേഹത്തിന്റെ നേതൃത്വത്തില്‍ അല്‍ ആദില്‍ ട്രേഡിങ് ഗ്രൂപ്പ് ലഭ്യമാക്കിയിരുന്നു. ഇത് കേന്ദ്ര സര്‍ക്കാരിന്റെ തന്നെ പ്രശംസയ്ക്കും അംഗീകാരത്തിനും ഇത് കാരണമായിരുന്നു.
മകളുടെ വിവാഹത്തിന് തയ്യാറെടുക്കുന്ന സമയത്ത് അപ്രതീക്ഷിതമായി ലഭിച്ച ഈ സഹായം തങ്ങള്‍ക്ക് ഏറെ അനുഗ്രഹമായതായി അനുശ്രീയുടെ അമ്മ നിഷി പറഞ്ഞു. ഡോക്ടര്‍ ദത്തറിനെ പോലുള്ള ഉദാരമനസ്‌കതയാണ് തങ്ങളെ പോലുള്ളവര്‍ക്ക് മാന്യമായി ജീവിക്കാന്‍ സഹായകമാവുന്നതെന്ന് അനുശ്രീയും പറഞ്ഞു. അദ്ദേഹം നല്‍കിയ സഹായങ്ങള്‍ക്ക് നന്ദി പറയാന്‍ വാക്കുകളില്ലെന്നും അവര്‍ കൂട്ടിച്ചേര്‍ത്തു.