സ്ഥാപനങ്ങളിലും പുറത്തും കൂടിനില്‍ക്കാന്‍ പാടില്ല
വലിയ ആള്‍ക്കൂട്ടങ്ങള്‍ ഉണ്ടാവുന്നത് തടയുകയാണ് ഇതിലൂടെ പ്രധാനമായും ലക്ഷ്യമിടുന്നത്. പബ്ബുകള്‍, ബാറുകള്‍ തുടങ്ങിയ ഇടങ്ങളില്‍ ആളുകള്‍ കൂടനില്‍ക്കുന്നത് തടയാന്‍ കര്‍ശന നിര്‍ദ്ദേശം നല്‍കിയിട്ടുണ്ട്. വീട്ടിലായാലും സ്ഥാപനങ്ങളിലായാലും ചടങ്ങുകളില്‍ 30ല്‍ കൂടുതല്‍ പേര്‍ പാടില്ല. വലിയ ഹാളുകളിലും ടെന്റുകളിലും പരമാവധി 200 പേര്‍ വരെ പോകാം. പക്ഷെ, കൃത്യമായ സാമൂഹിക അകലം പാലിച്ചിരിക്കണം. നാല് ചതുരശ്ര മീറ്ററില്‍ ഒരാള്‍ എന്ന രീതിയില്‍ ആളുകള്‍ തമ്മില്‍ അകലം വേണമെന്നാണ് ദുബായ് ഹെല്‍ത്ത് അതോറിറ്റിയുടെ നിര്‍ദ്ദേശം. മുഴുവന്‍ സമയവും മാസ്‌ക്ക് ധരിക്കുകയും ഇടയ്ക്കിടെ കൈകള്‍ അണുവിമുക്തമാക്കുകയും വേണം.
സംഘാടകര്‍ക്ക് പിഴ 50,000 ദിര്‍ഹം, പങ്കെടുത്തവര്‍ക്ക് 15,000
കൊവിഡ് പെരുമാറ്റച്ചട്ടങ്ങള്‍ ലംഘിച്ച് ചടങ്ങുകള്‍ സംഘടിപ്പിക്കുന്നവര്‍ക്കും വ്യാപാര സ്ഥാപനങ്ങള്‍ നടത്തുന്നവര്‍ക്കും 50,000 ദിര്‍ഹമാണ് പിഴ ചുമത്തുക. അതേപോലെ നിയന്ത്രണങ്ങള്‍ ലംഘിച്ച് നടക്കുന്ന ചടങ്ങുകളില്‍ പങ്കെടുക്കുന്നവരില്‍ നിന്ന് 15,000 ദിര്‍ഹം പിഴ ഈടാക്കും. വീടുകളിലായാലും പുറത്തായാലും ഈ നിയമം ബാധകമാണ്. നിയമലംഘനങ്ങള്‍ കണ്ടെത്തുന്നതിന് പരിശോധന വ്യാപകമാക്കാനും അധികൃതര്‍ തീരുമാനിച്ചിട്ടുണ്ട്.
മുന്‍ കൂട്ടി സീറ്റുകള്‍ ബുക്ക് ചെയ്യണം
ഹോട്ടലുകള്‍, ബാറുകള്‍, പബ്ബുകള്‍ തുടങ്ങിയ ഇടങ്ങളിലേക്ക് പോകുന്നവര്‍ ആദ്യം സീറ്റ് ബുക്ക് ചെയ്തു വേണം പോവാന്‍. ചെല്ലുമ്പോള്‍ സീറ്റുകള്‍ ഒഴിവില്ലെങ്കില്‍ പുറത്തോ വാഹനങ്ങളിലോ കാത്തിരിക്കണം. സീറ്റ് ഒഴിഞ്ഞാല്‍ മാത്രം അകത്തു കടക്കുക. ഒരു വലിയ ടേബിളില്‍ പരമാവധി ആറു പേര്‍ മാത്രമേ പാടുള്ളൂ. ടേബിളുകള്‍ തമ്മിലും രണ്ട് മീറ്റര്‍ അകലമുണ്ടായിരിക്കണം. പരമാവധി മുഖാമുഖം ഇരിക്കാതിരിക്കാന്‍ ശ്രദ്ധിക്കണം. ഇരുന്നതിനു ശേഷം മാത്രമേ മാസ്‌ക്ക് അഴിക്കാവൂ എന്നും ആരോഗ്യമന്ത്രാലയം നിര്‍ദ്ദേശിച്ചു. പരസ്പരം കൈകൊടുക്കല്‍, കെട്ടിപ്പിടിക്കല്‍, ചുംബിക്കല്‍ തുടങ്ങിയ ഉപചാര രീതികളൊന്നും പാടില്ലെന്നും നിര്‍ദ്ദേശമുണ്ട്.
ചടങ്ങുകള്‍ നാല് മണിക്കൂറിലേറെ നീളരുത്
വീടുകളിലായാലും ഹോട്ടലുകളിലായാലും ചടങ്ങുകള്‍ നാല് മണിക്കൂറിനേക്കാള്‍ നീളരുതെന്നാണ് മറ്റൊരു നിര്‍ദ്ദേശം. പ്രായമുള്ളവര്‍, വിട്ടുമാറാത്ത അസുഖങ്ങളുള്ളവര്‍, ഗുരുതരമായ രോഗങ്ങളുള്ളവര്‍ തുടങ്ങിയവര്‍ ചടങ്ങുകളില്‍ പങ്കെടുക്കാതിരിക്കാന്‍ ശ്രദ്ധിക്കണം. ചുമ, പനി പോലുള്ള കൊവിഡ് ലക്ഷണങ്ങളുള്ളവര്‍ നിര്‍ബന്ധമായും ചടങ്ങുകളില്‍ നിന്ന് വിട്ടുനില്‍ക്കണമെന്നും മീഡിയ ഓഫീസ് പുറത്തുവിട്ട നിര്‍ദ്ദേശങ്ങളില്‍ വ്യക്തമാക്കി.