ഇത്തിഹാദ് റെയില് അന്തിമ ഘട്ടത്തിലേക്ക്
രാജ്യത്തെ വ്യവസായ കേന്ദ്രങ്ങള്, വാണിജ്യ കേന്ദ്രങ്ങള്, നിര്മാണ കേന്ദ്രങ്ങള്, പ്രധാന കയറ്റുമതി- ഇറക്കുമതി സ്ഥലങ്ങളും തുടങ്ങിയവയെ പരസ്പരം ബന്ധിപ്പിക്കുന്ന പദ്ധതി രാജ്യത്തിന്റെ ഗതാഗത, സാമ്പത്തിക രംഗങ്ങളില് വന് കുതിച്ചു ചാട്ടത്തിന് കാരണമാവുമെന്നാണ് വിലയിരുത്തപ്പെടുന്നത്. യാത്രക്കു പുറമെ ചരക്കുകടത്തിലും നിര്ണായക മുന്നേറ്റം കൈവരിക്കാന് ഈ പദ്ധതിയിലൂടെ സാധിക്കും. ഷാര്ജ, റാസല്ഖൈമ എന്നിവക്കിടയിലെ പാതനിര്മാണ ജോലികള് പൂര്ത്തിയായതോടെ ഇത്തിഹാദ് റെയില്ശൃംഖലയുടെ നിര്മാണ പ്രവൃത്തികള് അന്തിമ ഘട്ടത്തിലേക്ക് നീങ്ങുകയാണ്.
ഏറ്റവും വലിയ നിര്മാണ പദ്ധതിയെന്ന് ദുബായ് ഭരണാധികാരി
യുഎഇയുടെ അടിസ്ഥാന സൗകര്യ വികസനത്തില് ഇത്തിഹാദ് റെയില് പദ്ധതി നിര്ണായകമായി മാറുമെന്ന് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശെയ്ഖ് മുഹമ്മദ് ബിന് റാശിദ് അല് മക്തും പറഞ്ഞു. രാജ്യത്തെ 11 നഗരങ്ങളെയും ഏഴ് ലോജിസ്റ്റിക് കേന്ദ്രങ്ങളെയും നാല് അന്താരാഷ്ട്ര തുറമുഖങ്ങളെയും പരസ്പരം ബന്ധിപ്പിക്കുന്ന പദ്ധതി രാജ്യത്തെ ഏറ്റവും വലിയ അടിസ്ഥാന സൗകര്യവികസന പദ്ധതിയാണെന്നും അദ്ദേഹം അഭിപ്രായപ്പെട്ടു. ഇത്തിഹാദ് റെയിലിന്റെ 75 ശതമാനം പ്രവൃത്തികളും പൂര്ത്തിയായതായി കഴിഞ്ഞ മെയില് അധികൃതര് അവകാശപ്പെട്ടിരുന്നു. ജിസിസി, മിഡില്ഈസ്റ്റ് റെയിലുമായി ഇത്തിഹാദ് റെയിലിനെ ബന്ധിപ്പിക്കുന്നതോടെ മധ്യപൂര്വദേശ രാജ്യങ്ങളുടെ യാത്രാ, ചരക്ക് ഗതാഗതത്തില് വിപ്ലവകരമായ മാറ്റമുണ്ടാകും.
ബാക്കിയുള്ളത് ഫുജൈറയിലേക്കുള്ള പാത
രണ്ടു ഘട്ടങ്ങളിലായാണ് ഇത്തിഹാദ് റെയിലിന്റെ നിര്മാണ പ്രവര്ത്തനങ്ങള് പുരോഗമിക്കുന്നത്. ഹബ്ഷാനില് നിന്ന് റുവൈസിലേക്കുള്ള എണ്ണപ്പാടങ്ങള് തമ്മില് ബന്ധിപ്പിക്കുന്ന റെയിലിന്റെ നിര്മാണമായിരുന്നു അദ്യ ഘട്ടത്തില് നടന്നത്. 2016ല് ഇത് പൂര്ത്തിയായി. ഇതു വഴി ഓരോ ദിവസവും ഹബ്ഷാനില് നിന്നും ഷാഹില് നിന്നുമുള്ള 22,000 ടണ് സള്ഫറാണ് അബൂദാബി നാഷനല് ഓയില് കമ്പനിക്കു വേണ്ടി ഇവിടെ നിന്ന് കൊണ്ടുപോവുന്നത്. ഷാര്ജയെയും റാസല് ഖൈമയെയും പരസ്പരം ബന്ധിപ്പിച്ച് ഗുവൈഫാത്തിലേക്ക് നീളുന്ന റെയില്വേ പാത നിര്മാണമാണ് പദ്ധതിയുടെ രണ്ടാം ഘട്ടം. ഈ ഘട്ടവും കഴിഞ്ഞ ദിവസം പൂര്ത്തിയായതായി അധികൃതര് അറിയിച്ചു. ഇനി ഫുജൈറയുമായി ഇതിനെ ബന്ധിപ്പിക്കുന്ന റെയില് പാതയുടെ നിര്മാണ പ്രവര്ത്തനങ്ങളാണ് നടക്കാനുള്ളത്.
ചരക്കു കടത്ത് കൂലി 30 ശതമാനം കുറയും
പുതിയ ട്രെയിനുകള് ഓടിത്തുടങ്ങുന്നതോടെ രാജ്യത്തെ ചരക്ക് കടത്തു കൂലി 30 ശതമാനം കണ്ട് കുറയ്ക്കാനും ട്രക്കുകള് കാരണം റോഡുകളില് അനുഭവപ്പെടുന്ന രൂക്ഷമായ ഗതാഗതക്കുരുക്ക് കുറയ്ക്കാനും സാധിക്കും. പുതിയ സംവിധാനം നടപ്പില് വരുന്നതോടെ യുഎഇ നാഷനല് യെില് നെറ്റ് വര്ക്കിന്റെ ശേഷി 60 ദശലക്ഷത്തില് അധികം കണ്ട് വര്ധിക്കുമെന്നാണ് കണക്കുകൂട്ടല്. ഇതുവഴി വാഹനങ്ങള് പുറത്തുവിടുന്ന കാര്ബണ് വാതകങ്ങളുടെ തോതില് വലിയ അളവില് കുറവു വരുത്താനും ഇതു വഴി സാധിക്കും. യൂറോപ്യന് ട്രെയിന് കണ്ട്രോള് സിസ്റ്റം ലെവര്-2 പോലുള്ള അത്യാധുനിക സാങ്കേതിക വിദ്യയിലധിഷ്ഠിതമായ സിഗ്നലിംഗ് സംവിധാനമാണ് പുതിയ ട്രെയിനിന്റേത്. അതുകൊണ്ടു തന്നെ ഏറ്റവും പുതിയ സുരക്ഷാ സംവിധാനങ്ങള് ഇതിലുണ്ടാകും.
11 യുഎഇ നഗരങ്ങളെ പരസ്പരം ബന്ധിപ്പിക്കും
ചരക്കു നീക്കത്തിനു പുറമെ, യുഎഇയിലെ നഗരങ്ങളെയും മരുഭൂമിയെയും പര്വത നിരകളെയും കീറി മുറിച്ച് പാലങ്ങളിലൂടെയും തുരങ്കങ്ങളിലൂടെയും കടന്നു പോവുന്ന ഇത്തിബാദ് റെയില് വഴി പാസഞ്ചര് ട്രെയിനുകളും താമസിയാതെ ഓടിത്തുടങ്ങും. യുഎഇയിലെ അല് സില മുതല് ഫുജൈറ വരെയുള്ള അല് റുവൈസ്, അല് മിര്ഫ, ദുബായ്, ഷാര്ജ, അല് ദൈദ്, അബൂ ദാബി എന്നിവ ഉള്പ്പെടെ 11 നഗരങ്ങളെ കോര്ത്തിണക്കിയാണ് ഇത്തിഹാദ് റെയില് കടന്നുപോവുന്നത്. 1200 കിലോമീറ്ററാണ് ഇത്തിഹാദ് റെയിലിന്റെ ഭാഗമായുള്ള റെയില്വേയുടെ നീളം. 2030ഓടെ 365 ലക്ഷം യാത്രക്കാരെ കൊണ്ടുപോവാന് പദ്ധതി വഴി സാധിക്കുമെന്ന കണക്കുകൂട്ടലിലാണ് അധികൃതര്.
പദ്ധതി ചെലവ് 200 ബില്യന് ദിര്ഹം
നിലവില് യുഎഇയെയും സൗദിയെയും ബന്ധിപ്പിച്ച് നിര്മാണം പുരോഗമിച്ചു കൊണ്ടിരിക്കുന്ന ഇത്തിഹാദ് റെയില്വേ നെറ്റ് വര്ക്ക് പദ്ധതിയുടെ അനുബന്ധമായാണ് യാത്രാ റെയില്വേ പദ്ധതി നടപ്പിലാക്കുന്നത്. യുഎഇയിലെ തുറമുഖങ്ങളെയും പ്രധാന നഗരങ്ങളെയും ബന്ധിപ്പിച്ച് കടന്നുപോവുന്ന ഇത്തിഹാദ് റെയില് നിലവില് ചരക്കുനീക്കത്തിന് മാത്രമായാണ് ഉപയോഗിക്കുന്നത്. ഇത്തിഹാദ് റെയില്വേ വഴി ദുബായില് നിന്ന് അബുദാബിയിലേക്കുള്ള യാത്രാ സമയം 50 മിനുട്ടായി ചുരുങ്ങും. അബുദാബിയില് നിന്ന് ഫുജൈറയിലേക്കുള്ള യാത്രാ സമയം 100 മിനുട്ടായും കുറയും. യാത്രാ റെയില് പദ്ധതിക്ക് 200 ബില്യന് ദിര്ഹമാണ് ചെലവ് കണക്കാക്കുന്നത്. 20,000 കോടി ദിര്ഹമിന്റെ വരുമാനമാണ് പദ്ധതി വഴി പ്രതീക്ഷിക്കുന്നത്.
ട്രെയിനിന്റെ ശരാശരി വേഗത മണിക്കൂറില് 200 കിലോമീറ്റര്
ഇത്തിഹാദ് റെയില് ശൃംഖലയുടെ ഭാഗമായി നിര്മിക്കുന്ന യാത്രാ റെയില് സര്വീസിന് മണിക്കൂറില് 200 കിലോമീറ്റര് വേഗതയാണ് പ്രതീക്ഷിക്കുന്നത്. ഒരു ട്രെയിനില് 400 പേര്ക്ക് യാത്ര ചെയ്യാനാവും. യുഎഇയുടെ കിഴക്കേ അറ്റമായ ഫുജൈറ മുതല് സൗദി അതിര്ത്തിക്ക് സമീപമുള്ള അല് സില വരെ നീണ്ടുകിടക്കുന്നതാണ് യാത്രാ റെയില്. യുഎഇയിലെ 11 നഗരങ്ങളെയും ബന്ധിപ്പിക്കുന്ന ഇത്തിഹാദ് റെയില്വേ ശൃംഖല നിലവിലെ പ്രധാന ഹൈവേകള്ക്ക് സമാന്തരമായാണ് ഓടുക. നഗര കേന്ദ്രങ്ങളില് തന്നെയായിരിക്കും ട്രെയിന് സ്റ്റേഷനുകള് നിര്മിക്കുക. 5000 കോടി ദിര്ഹം ചെലവില് നിര്മിക്കുന്ന യാത്രാ റെയിലിന്റെ പ്രഖ്യാപനം കഴിഞ്ഞ ഡിസംബറിലാണ് സൗദി ഭരണാധികാരികള് പ്രഖ്യാപിച്ചത്. 2030ഓടെ 9000 പേര്ക്ക് തൊഴില് നല്കാന് ഇത്തിഹാദ് റെയില്വേയ്ക്ക് സാധിക്കുമെന്നാണ് വിലയിരുത്തപ്പെടുന്നത്.