യുഎഇയില്‍ ലുലു ഗ്രോസറി, ഫ്രഷ് ഉല്‍പ്പന്നങ്ങള്‍ ഇനി ആമസോണിലും; ഓണ്‍ലൈന്‍ സഹകരണ കരാറില്‍ ഒപ്പുവച്ചു

അബുദാബി: യുഎഇയിലെ ലുലു ഹൈപ്പര്‍മാര്‍ക്കറ്റുകളില്‍ നിന്നുള്ള പലചരക്ക് സാധനങ്ങളും പഴം പച്ചക്കറി ഉള്‍പ്പെടെയുള്ള ഫ്രഷ് ഉല്‍പ്പന്നങ്ങളും ഇനി മുതല്‍ ആമസോണ്‍ വഴിയും വാങ്ങാം. യുഎഇയില്‍ ഓണ്‍ലൈന്‍ വിപണന രംഗത്ത് പരസ്പരം കൈകോര്‍ക്കുന്നതിന്റെ ഭാഗമായി പുതി സഹകരണ കരാറില്‍ ലുലു ഗ്രൂപ്പും ആമസോണും ഒപ്പുവച്ചു. അബൂദാബി സാമ്പത്തിക വകുപ്പ് ചെയര്‍മാന്‍ മുഹമ്മദ് അലി അല്‍ ഷുറാഫയുടെ സന്നിധ്യത്തില്‍ ലുലു ഗ്രൂപ്പ് ചെയര്‍മാന്‍ എം എ യൂസഫലിയും ആമസോണ്‍ മിഡില്‍ ഈസ്റ്റ്് വൈസ് പ്രസിഡന്റ് റൊണാള്‍ഡോ മോചവറുമാണ് ഇതുമായി ബന്ധപ്പെട്ട സഹകരണ കരാറില്‍ ഒപ്പ് വെച്ചത്.

യുഎഇയിലെ ഉപഭോക്താക്കള്‍ക്ക് ലുലു ഹൈപ്പര്‍മാര്‍ക്കറ്റുകളിലേക്ക് നേരിട്ടെത്താതെ ഇനി ആമസോണില്‍ കൂടി ലുലു ഉല്‍പ്പന്നങ്ങള്‍ ഓര്‍ഡര്‍ ചെയ്യാന്‍ സാധിക്കും. ഇത് പ്രകാരം ഉപഭോക്താക്കള്‍ ഓര്‍ഡര്‍ ചെയ്യുന്ന ഉല്‍പ്പന്നങ്ങള്‍ ആമസോണ്‍ ഉപഭോക്താക്കള്‍ക്ക് വേഗത്തില്‍ എത്തിക്കും. ആദ്യഘട്ടത്തില്‍ ദുബായ് മറീന, അല്‍ ബര്‍ഷ, പാം ജുമൈറ, അറേബ്യന്‍ റാഞ്ചസ് എന്നീ പ്രദേശങ്ങളിലാണ് ലുലു ഉല്‍പ്പന്നങ്ങള്‍ ആമസോണ്‍ വഴി വിതരണം ചെയ്യുക. പിന്നീട് യുഎഇയിലെ മറ്റു ഭാഗങ്ങളിലേക്കും ഇത് വ്യാപിപ്പിക്കും. വേഗമേറിയതും സൗകര്യപ്രദവുമായ ഡെലിവറി ഓപ്ഷനുകള്‍ക്കൊപ്പം യുഎഇയിലെ ഉപഭോക്താക്കള്‍ക്കായി ഉയര്‍ന്ന ഓണ്‍ലൈന്‍ ഗ്രോസറി ഓഫറുകള്‍ ലഭ്യമാക്കുക എന്നതാണ് കരാറിന്റെ പ്രധാന ലക്ഷ്യമെന്ന് അധികൃതര്‍ അറിയിച്ചു.

Also Read: ഭാര്യക്കൊപ്പം വിസിറ്റ് വിസയിൽ പേരകുട്ടിയുടെ അടുത്തേക്ക്; മലയാളി സൗദിയില്‍ മരിച്ചു

സ്വകാര്യ മേഖലയിലെ ഇത്തരം സംയുക്ത സംരംഭങ്ങള്‍ യുഎഇ വാണിജ്യ മേഖലയെ കൂടുതല്‍ ശക്തിപ്പെടുത്തുമെന്ന് അബൂദാബി സാമ്പത്തിക വകുപ്പ് ചെയര്‍മാന്‍ മുഹമ്മദ് അലി ഷുറാഫ അഭിപ്രായപ്പെട്ടു. ഉപഭോക്താക്കള്‍ക്ക് നവീനവും തടസ്സരഹിതവുമായ ഷോപ്പിംഗ് അനുഭവങ്ങള്‍ നല്‍കാനും, ബിസിനസ്സിനും നിക്ഷേപങ്ങള്‍ക്കും ഇഷ്ടപ്പെട്ട ലക്ഷ്യസ്ഥാനമെന്ന നിലയില്‍ അബൂദാബിയുടെ പദവി ഉറപ്പിക്കുന്നതിനും പിന്തുണ നല്‍കുന്ന ആമസോണിനെയും ലുലു ഗ്രൂപ്പിനെയും അദ്ദേഹം അഭിനന്ദിച്ചു. ഉപഭോക്താക്കളുടെ ആവശ്യങ്ങള്‍ക്കാണ് ലുലു എന്നും മുന്‍ഗണന നല്‍കിയിട്ടുള്ളതെന്ന് എം എ യൂസഫലി പറഞ്ഞു. ഏറ്റവും മികച്ച ഷോപ്പിംഗ് അനുഭവം നല്‍കുന്നതിനായി ആമസോണുമായി സഹകരിക്കുന്നതില്‍ ഏറെ സന്തോഷമുണ്ടെന്നും അദ്ദേഹം അറിയിച്ചു. യുഎഇയിലെ ഈ യാത്രയില്‍ ആമസോണ്‍ ടീമിനൊപ്പം പ്രവര്‍ത്തിക്കുന്നതില്‍ സന്തോഷമുണ്ട്. നൂതനമായ ഓണ്‍ലൈന്‍ പലചരക്ക് ഷോപ്പിംഗ് അനുഭവം വാഗ്ദാനം ചെയ്യുന്നതിനായി ആമസോണിന്റെ നൂതന സാങ്കേതിക കഴിവുകള്‍ ലുലു ഗ്രൂപ്പിന്റെ ദശാബ്ദങ്ങളുടെ അനുഭവ സമ്പത്തുമായി ചേരുമ്പോള്‍ അദ്ഭുതങ്ങള്‍ സൃഷ്ടിക്കപ്പെടും. ആമസോണ്‍ വഴി ഷോപ്പിംഗ് നടത്തുന്ന ദശലക്ഷക്കണക്കിന് പുതിയ ഉപഭോക്താക്കളിലേക്ക് എത്തിച്ചേരാന്‍ ഇത് വഴിതുറക്കുമെന്ന് പ്രതീക്ഷിക്കുന്നതായും യൂസഫലി പറഞ്ഞു.

Also Read: അര്‍ജന്‍റീനയെ കുപ്പുകുത്തിച്ചത് ആഘോഷമാക്കി സൗദി, വമ്പന്‍ പ്രഖ്യാപനവുമായി ലുലു

ലുലു ഗ്രൂപ്പുമായുള്ള ഈ സംയുക്ത സംരംഭം ഉപഭോക്താക്കള്‍ക്ക് മികച്ച സേവനമാണ് നല്‍കുകയെന്ന് ആമസോണ്‍ മിഡില്‍ ഈസ്റ്റ് വൈസ് പ്രസിഡന്റ് റൊണാള്‍ഡോ മോചവറും പറഞ്ഞു. 'ലുലു ഗ്രൂപ്പിനൊപ്പം പ്രവര്‍ത്തിക്കുന്നതില്‍ ഞങ്ങള്‍ക്ക് അഭിമാനമുണ്ട്. ആമസോണില്‍ ഷോപ്പിംഗ് നടത്തുമ്പോള്‍ ലുലു ഉപഭോക്താക്കള്‍ക്ക് അധിക ആനുകൂല്യങ്ങള്‍ നല്‍കുന്നതിനുള്ള വഴികള്‍ ഞങ്ങള്‍ അന്വേഷിച്ചുവരികയാണ്'- അദ്ദേഹം അറിയിച്ചു. താമസിയാതെ യുഎഇയില്‍ ഉടനീളം പദ്ധതി വ്യാപിപ്പിക്കുമെന്നും രണ്ടാം ഘട്ടത്തില്‍ മറ്റ് ജിസിസി രാജ്യങ്ങള്‍, ഈജിപ്ത് എന്നിവിടങ്ങളിലും ഉല്‍പ്പന്നങ്ങള്‍ ഉപഭോക്താക്കള്‍ക്ക് വേഗത്തിലും ആയസരഹിതമായും ലഭ്യമാക്കുമെന്നും ലുലു ഗ്രൂപ്പ് വൃത്തങ്ങള്‍ അറിയിച്ചു. ലുലു ഗ്രുപ്പ് ചീഫ് എക്സിക്യൂട്ടീവ് ഓഫീസര്‍ സൈഫി രൂപാവാല, എക്സിക്യൂട്ടീവ് ഡയറക്ടര്‍ എംഎ അഷ്റഫ് അലി എന്നിവരും സംബന്ധിച്ചു.

Read Latest Gulf News and Malayalam News