ശ്രദ്ധിക്കുക ! യുഎഇയില്‍ നിന്ന് യുഎസിലേക്ക് പോകുന്നവര്‍ക്ക് കൊവിഡ് നിബന്ധനകളില്‍ മാറ്റം

അബുദാബി: യുഎഇയില്‍ നിന്ന് യുഎസിലേക്ക് യാത്ര ചെയ്യുന്നവര്‍ക്ക് കൊവിഡ് നിബന്ധനകളില്‍ മാറ്റം. സെന്റേഴ്‌സ് ഓഫ് ഡിസീസ് കണ്‍ട്രോള്‍ ആന്റ് പ്രിവന്‍ഷന്റെ (സിഡിസി) ഏറ്റവും പുതിയ നിര്‍ദേശം പ്രകാരം അമേരിക്കയിലേക്കുള്ള എല്ലാ യാത്രക്കാരും രണ്ട് വയസോ അതില്‍ കൂടുതല്‍ പ്രായമുള്ളവര്‍ വിമാനത്തില്‍ കയറുന്നതിന് മുമ്പ് കൊവിഡ് നെഗറ്റീവ് പരിശോധനാ ഫലം സമര്‍പ്പിക്കണം. പുതിയ നിബന്ധന യുഎഇയില്‍ നിന്ന് ജനുവരി 26 മുതല്‍ യാത്ര ചെയ്യുന്നവര്‍ക്ക് ബാധകമായിരിക്കും.

Also Read: കൊവിഡ് വ്യാപനം അതിരൂക്ഷം; വിനോദപരിപാടികള്‍ നിര്‍ത്തിവെച്ചു, ദുബായില്‍ കൂടുതല്‍ നിയന്ത്രണങ്ങള്‍

നിര്‍ബന്ധിത പരിശോധന യുഎസ് പൗരന്മാര്‍ക്കും സ്ഥിര താമസക്കാര്‍ക്കും ഉള്‍പ്പെടെ എല്ലാ യാത്രക്കാര്‍ക്കും ബാധകമാണെന്ന് അതോറിറ്റി അറിയിച്ചു. 'യുഎസിലേക്ക് വിമാനത്തില്‍ യാത്ര ചെയ്യുന്നതിന് മൂന്ന് ദിവസം മുമ്പ് കൊവിഡ് പരിശോധന നടത്തേണ്ടതില്ല, വിമാനത്തില്‍ കയറുന്നതിന് മുമ്പായി കൊവിഡ് നെഗറ്റീവ് ഫലമോ കൊവിഡ് രോഗമുക്തി നേടിയതിന്റെ രേഖകളോ കാണിച്ചാല്‍ മതി', സിഡിസി വ്യക്തമാക്കി.

പുതിയ യാത്രാ മാര്‍ഗ്ഗനിര്‍ദേശങ്ങള്‍ എമിറേറ്റ്‌സ് എയര്‍ലൈനിന്റെ ഔദ്യോഗിക വെബ്‌സൈറ്റില്‍ അപ്‌ഡേറ്റ് ചെയ്തിട്ടുണ്ട്. 'ജനുവരി 26 മുതല്‍ യുഎസിലേക്ക് പുറപ്പെടുന്നതിന് 3 ദിവസത്തിനുള്ളില്‍ 2 വയസ്സും അതില്‍ കൂടുതല്‍ പ്രായമുള്ള എല്ലാ യാത്രക്കാരുടെയും കൊവിഡ് പരിശോധനാ ഫലം യാത്ര ചെയ്യുന്നതിന് മുമ്പ് സമര്‍പ്പിക്കണ' മെന്ന് പുതിയ നിബന്ധനയില്‍ പറയുന്നു.

'യാത്രക്കാര്‍ അവരുടെ കൊവിഡ് പരിശോധനയുടെ നെഗറ്റീവ് ഫലത്തിന്റെ രേഖാമൂലമുള്ള ഡോക്യുമെന്റുകള്‍ എയര്‍ലൈനിന് നല്‍കണം. പരിശോധന ഫലം, ലഭിച്ച തീയതി, ഏത് പരിശോധന എന്നിവ കാണിക്കണം. പുറപ്പെടുന്നതിന് മുമ്പുള്ള 3 ദിവസത്തിലധികം ദൈര്‍ഘ്യമുള്ള പരിശോധനാ ഫലങ്ങള്‍ സ്വീകരിക്കില്ല'.

Also Read: വിലങ്ങ് വീഴുമോ? കുവൈറ്റില്‍ വിസ ലംഘകര്‍ക്കുള്ള ഗ്രേസ് പിരിയഡ് അവസാനിക്കാന്‍ ഏതാനും ദിവസങ്ങള്‍

അമേരിക്കയിലേക്ക് യാത്ര ചെയ്യുന്നതിന് 2 വയസ്സും അതില്‍ കൂടുതലും പ്രായമുള്ള എല്ലാ യാത്രക്കാരും പുറപ്പെടുന്നതിന് മുമ്പായി ഒരു അറ്റസ്റ്റേഷനില്‍ ഒപ്പിടേണ്ടതുണ്ട് (മാതാപിതാക്കള്‍ അല്ലെങ്കില്‍ മറ്റ് അംഗീകൃത വ്യക്തികള്‍ 2 മുതല്‍ 17 വയസ്സ് വരെ പ്രായമുള്ള യാത്രക്കാര്‍ക്ക് വേണ്ടി ഒപ്പിടാം). അല്ലാത്തപക്ഷം യാത്ര ചെയ്യാന്‍ അനുവദിക്കില്ല.