ഇഷ്ടികകള് ചുമന്ന് യുഎഇ പ്രതിനിധികള്
ക്ഷേത്ര നിര്മാണത്തിന്റെ ഭാഗമായുള്ള സുപ്രധാന ചടങ്ങിലാണ് യുഎഇ വിദേശ വ്യാപരത്തിനായുള്ള സഹമന്ത്രി ഡോ. താനി ബിന് അഹ്മദ് അല് സയൂദി, അബൂദാബി കമ്മ്യൂണിറ്റി ഡെവലപ്മെന്റ് വിഭാഗം ചെയര്മാന് ഡോ. മുഗീര് ഖമീസ് അല് ഖൈലി, ആഭ്യന്തരമന്ത്രാലയത്തിലെ എഡ്യുക്കേഷന് ആന്റ് ട്രെയിനിംഗ് ഡെവലപ്മെന്റ് വിഭാഗം ഡയരക്ടര് ജനറല് ഡോ. ത്യയിബ് അല് കമാലി തുടങ്ങിയവര് പങ്കെടുത്തത്. ചടങ്ങില് യുഎഇയിലെ ഇന്ത്യന് അംബാസഡര് സഞ്ജയ് സുധീറും പങ്കെടുത്തിരുന്നു. ചടങ്ങില് പങ്കെടുത്ത മുതിര്ന്ന യുഎഇ ഉദ്യോഗസ്ഥര് ക്ഷേത്ര നിര്മാണത്തിനായുള്ള ഇഷ്ടികകള് എടുത്തുവയ്ക്കുന്നതും എംബസി പുറത്തുവിട്ട ചിത്രത്തിലുണ്ട്.
ഇന്ത്യ- യുഎഇ സ്നേഹത്തിന്റെ പ്രതീകം
യുഎഇ ഭരണകൂടത്തിന്റെ പ്രതിനിധികളുടെ സാന്നിധ്യത്തില് ക്ഷേത്രത്തിന്റെ തൂണ് നാട്ടുന്ന ചടങ്ങിന്റെ ചിത്രങ്ങള് ബാപ്സ് ഹിന്ദു മന്ദിര് പ്രതിനിധികളും പങ്കുവയ്ക്കുകയുണ്ടായി. ചടങ്ങില് ആയിരത്തിലേറെ പേരാണ് പങ്കെടുത്തത്. ക്ഷേത്ര നിര്മാണത്തിന് പിന്തുണയും സഹായവും നല്കി വരുന്ന യുഎഇ ഭരണകൂടത്തിന് ചടങ്ങ് നന്ദി രേഖപ്പെടുത്തി. ക്ഷേത്രം നിര്മിക്കുന്ന കരകൗശല വിദഗ്ധര്ക്കും മറ്റ് ജോലിക്കാര്ക്കുമൊപ്പം യുഎഇ പ്രതിനിധികള് ഫോട്ടോ എടുത്താണ് മടങ്ങിയത്. കലയുടെയും ഹൃദയങ്ങളുടെയും മനസ്സുകളുടെയും സമ്മേളനത്തെ ആഘോഷിക്കുന്ന സവിശേഷമായ ചടങ്ങായിരുന്നു അതെന്ന് ബാപ്സ് ഹിന്ദു മന്ദിര് മുഖ്യ പൂരോഹിതന് സ്വാമി ബ്രഹ്മവിഹാരി ദാസ് അറിയിച്ചു. ഇന്ത്യയും യുഎഇയും തമ്മില് നിലനില്ക്കുന്ന സ്നേഹത്തിന്റെയും സഹകരണത്തിന്റെയും മകുടോദാഹരണം കൂടിയായിരുന്നു ചടങ്ങെന്നും അദ്ദേഹം കൂട്ടിച്ചേര്ത്തു. ക്ഷേത്രത്തിന്റെ ആദ്യ മാര്ബിള് തൂണ് സ്ഥാപിക്കുന്നതിന് മുന്നോടിയായി പ്രാര്ഥനാ ചടങ്ങുകള് സംഘടിപ്പിച്ചിരുന്നു. ഇതിന് ബാപ്സ് അന്താരാഷ്ട്ര കണ്വീനറും മുതിര്ന്ന പുരോഹിതനുമായ ഈശ്വരചരണ് സ്വാമി നേതൃത്വം നല്കി. ചടങ്ങിന് വേണ്ടി അദ്ദേഹം ഇന്ത്യയില് നിന്ന് ഇവിടെ എത്തുകയായിരുന്നു.
നിര്മാണം അക്ഷര്ധാനം ക്ഷേത്ര മാതൃകയില്
ന്യൂഡല്ഹിയിലെ അക്ഷര്ധാം ക്ഷേത്ര മാതൃകയില് അബുദാബിയില് നിര്മ്മിക്കുന്ന ക്ഷേത്രത്തിന്റെ ഡിസൈന് നേരത്തേ തയ്യാറാക്കിയിരുന്നു. ഹൈന്ദവ പുരാണങ്ങള്, കഥകള് എന്നിവയില് നിന്നുള്ള സംഭവങ്ങള് ആവിഷ്കരിക്കുന്ന ചിത്രങ്ങള് കൊത്തിവെച്ച കല്ലുകളാല് അലംകൃതമാണ് ക്ഷേത്രത്തിന്റെ മുന്വശം. പരമ്പരാഗത ഡിസൈനില് ഇന്ത്യയില് നിന്ന് തയ്യറാക്കുന്ന കൊത്തുപണിയില് തീര്ത്ത തൂണുകള് ഉപയോഗിച്ചാണ് ക്ഷേത്രം നിര്മിക്കുന്നത്. നിലവില് പ്രധാന കെട്ടിടത്തിന്റെ ഫൗണ്ടേഷന് പ്രവൃത്തികള് പൂര്ത്തിയായിക്കഴിഞ്ഞു.
ശിലകള് എത്തിച്ചത് ഇന്ത്യയില് നിന്ന്
ലൈബ്രറി, ക്ലാസ്റൂം, ആളുകള്ക്ക് ഒത്തുചേരാനുള്ള മജ്ലിസ്, കമ്മ്യൂണിറ്റി സെന്റര്, തുടങ്ങിയവയും അബൂദാബിയിലെ അബൂ മുറൈഖയില് നിര്മാണം പുരോഗമിക്കുന്ന ക്ഷേത്രത്തിന്റെ ഭാഗമായി ഒരുക്കും. ക്ഷേത്രപ്പടികളിലെ ഇരുവശങ്ങളിലൂടെ ഒഴുകിയിറങ്ങുന്ന ജലധാരയും ക്ഷേത്രസമുച്ചയത്തെ ചുറ്റിയൊഴുകുന്ന അരുവിയും മനോഹരമായ കാഴ്ചകളാണ് സന്ദര്ശകര്ക്ക് സമ്മാനിക്കുക. അബൂദാബി-ദുബായ് അതിര്ത്തിയില് അബൂ മുറൈഖയില് ഹൈവേയോട് ചേര്ന്നാണ് ക്ഷേത്രം നിര്മ്മിക്കുന്നത്. 10.9 ഹെക്ടര് സ്ഥലത്ത് 32 മീറ്റര് വീതം ഉയരമുള്ള ഏഴ് കൂറ്റന് ഗോപുരങ്ങളോടു കൂടിയാകും ക്ഷേത്രം നിര്മ്മിക്കുക. യുഎഇയിലെ ഏഴ് എമിറേറ്റുകളുടെ പ്രതീകമായാണിത്. ക്ഷേത്രനിര്മ്മാണത്തിനുള്ള ശിലകള് ഇന്ത്യയില് നിന്നാണെത്തിച്ചിരിക്കുന്നത്.
ക്ഷേത്രത്തിന് ഭൂമി നല്കിയത് യുഎഇ ഭരണാധികാരി
യൂഎഇ ഭരണാധികാരി ശെയ്ഖ് മുഹമ്മദ് ബിന് സായിദ് അല് നഹ്യാനാണ് ക്ഷേത്രനിര്മ്മാണത്തിനുള്ള സ്ഥലം അനുവദിച്ചത്. ശില്പനിര്മ്മാണത്തില് വൈദഗ്ധ്യമുള്ള നൂറുകണക്കിനു തൊഴിലാളികള് ഉള്പ്പെടെ മൂവായിരത്തിലധികം പേരാണ് നിര്മ്മാണത്തില് പങ്കാളികളാകുന്നത്. കമ്യൂണിറ്റി സെന്റര്, ഹാളുകള്, എക്സിബിഷന് കേന്ദ്രം തുടങ്ങിയവയാണ് ആദ്യ ഘട്ടത്തില് നിര്മിക്കുക. മാര്ബിളിലെയും ശിലകളിലെയും കൊത്തുവേലകള് ഈ വര്ഷത്തോടെ പൂര്ത്തീകരിക്കും. 2024ല് ക്ഷേത്രത്തിന്റെ ഉദ്ഘാടനം നിര്വഹിക്കാനാവുമെന്നാണ് അധികൃതരുടെ കണക്കുകൂട്ടല്.
Read Latest Gulf News and Malayalam News